Монголчуудын талаас илүү хувь нь шилдэг ажилтан болоход хэдхэн хоног үлдлээ. Цэнгээний газруудаас “Цалин мөнгөн тэнгэртээ цасан угалз наадуулсан” хэмээх дуу цуурайлж, оны шилдэг болсон  хүмүүс энгэртээ алтан медаль гялалзуулж, бие ороосон том тууз зүүгээд маадгар гэгч алхах цаг айсуй.  Төр засгийн шагнал урамшууллаас гадна аж ахуй нэгж, албан байгууллагууд өөрсдийн шилдэг ажилчдаа шагнаж урамшуулна. Ганц ажилтан биш нэжгээд ажилтнаа сүр дуулиантай шагнана. Ганц азгүй ч гэх юм уу хүн бүлтийгээд хоцордог нь нууц биш. Хөлөө олж, санхүүгийн эрх чөлөөнд хүрсэн том, том байгууллагууд ажилчдаа байр, машинаар шагнадаг бол дөнгөж зах зээлд өрсдөгч болохоор үйл ажиллагаа эхэлж буй нэг газрууд ганц хүн үлдээхгүй шагнана. Тухайлбал таван ажилтантай нэг байгууллага шилдэг ажилтан, дэд шилдэг, манлайлагч, дэд манлайлагч гэх мэтээр шагначихдаг нь гайхалтай. Тиймээс ч шагнал урамшуулалт хорхойссон монголчууд шинэ жилийн баяр тэмдэглэх үнэнхүү дуртай болсон. Ганц шинэ жилийн баяр гэлтгүй Цагаан сар, Мартын найман, Хүүхдийн баяр, Хичээлийн шинэ жил, Улс тунхагласны өдөр гээд монголчуудын шагнал авах, гардуулах нь дон мэт боллоо.

Шилдэг ажилтан, тэргүүний ажилтан, манлайлагч ажилтан, шилдэг алба, тэргүүний алба гэх зэргээр уртаас урт цуваа үргэлжилнэ

Урлагийн жаахан авьяастай байхад л СТА болох шиг амархан зүйл болжээ. Худлаа, үнэн дуулдаг СТА цол тэмдэгтэй алиалагчид шинэ жилийн арга хэмжээг хөтөлж, “Хундагатайгаа нэг татъя, хоёр татъя” гэх мэт хөнгөн элэглэж, согтоочихоод халамцаад ирэхээр ам барьж, дуулсан болоод арилж өгнө. Харин халамцуухан ажилчид байгууллагынхаа ээлж дараалсан шагнал, сугалаанд даруулна. Шилдэг ажилтан, тэргүүний ажилтан, манлайлагч ажилтан, шилдэг алба, тэргүүний алба гэх зэргээр уртаас урт цуваа үргэлжилнэ. Зарим нь бүр өөр өөртөө шагнал гардуулж байсан удаатай. Ер нь хөгтэй ард түмэн л дээ.

Энэ бүхнээс үүдэн шагнал, цол, одон, тэмдгийн үнэ цэнэ буурсаар нийтэд хавтгайруулан олгодог явдлыг болиулъя гэх санал ч нийгмийн зүгээс гарч байлаа