Монголчууд төрөө төвхнүүлж, төсвөө тэлсэн эдийн засаг өссөн, том төслүүдээ хөдөлгөсөн дэлгэр  сайхан жилийг үдэж, шинэ онтой золгож байна. 2024 онд УИХ-ын ээлжит сонгууль болж, 126 гишүүнтэй анхны парламентыг бүрдүүлсэн. Улмаар Аймаг, нийслэл, сум дүүргийн ИТХ-ын сонгуулиа амжилттай явуулсан. 126 гишүүнтэй анхны парламент 30 их наядын орлого бүхий түүхэнд байгаагүй өндөр төсөв баталсан билээ. Угтаа бол эдийн засгийн таатай цаг үе ирж, Монгол Улсын хөгжилд хувь нэмэр оруулах цаг үе ирсэн гэж харж болохоор байна. Түүнчлэн УИХ-ын сонгуульд олон намын төлөөлөл сонгогдож, Их хуралд суух эмэгтэйчүүдийн тоо нэмэгдсэн давуу талтай сонгуулийг явуулсан билээ.

        Сонгуулийн үр дүнд олонхын суудал авсан намууд хамтарсан Засгийн газар  байгуулж, томоохон төсөл хөтөлбөрүүдээ урагшуулахаар болсон нь эдийн засгийн хувьд ахиц гарах түүхэн үйл явдал байв. Энэ жил 2024 онд ДНБ 74 их наяд төгрөг, нэгдсэн төсвийн орлого 27.2 их наяд төгрөг, тэнцвэржүүлсэн орлого 25.3 их наяд төгрөгт хүрэхээр тооцжээ. Улмаар уул уурхайн экспортын голлох түүхий эд болох нүүрсний экспортыг 60 сая тоннд хүргэх зорилт тавьж, эдийн засгийн өсөлтийг хувьд хүргэхээр тооцсон. Улмаар гадаад өрийн хэмжээ багасч, зээлжих зэрэглэл нэмэгдсэн нь эдийн засагт гарсан том амжилт байлаа.

       2024 онд монголчууд нийгэм, эдийн засаг улс төрөөс гадна соёл урлаг спортын салбарт амжилтаа ахиулсан, дэлхийд Монгол Улсын нэрийг дахин алдаршуулсан онцлогтой жил байлаа.

           Тодруулбал, 33 дахь удаагийн зуны олимпын  наадамд Монгол Улсын баг тамирчид амжилттай, сайн оролцлоо. Энэ удаагийн олимпын наадын  жүдо бөхийн тэмцээнд МУГТ, Б.Баасанхүү амжилттай оролцож, олимпийн наадмын мөнгөн медаль хүртсэн юм. “Парис-2024” паралимпын наадмын таеквондогийн төрөлд хөдөлмөрийн баатар У.Сүрэнжав алт, гавьяат тамирчин Г.Болор-Эрдэнэ мөнгө, пауэрлифтингийн төрөлд хөдөлмөрийн баатар, гавьяат тамирчин Э.Содномпилжээ, хөнгөн атлетикийн төрөлд гавьяат тамирчин Ц.Баттулга нар мөнгөн медаль хүртсэн юм.

 Харин соёл урлагийн салбарт Монгол жүжиг анх удаа дэлхийн тайзнаа олон улсын хэлээр орчуулагдан тоглогдсон баяр үйл явдал тохиолоо. Монгол Улсын хөдөлмөрийн баатар, ардын уран зохиолч Б.Лхагвасүрэн агсны зохиол "Тамгагүй төр" жүжгийг “Херо энтертайнмент”-ийн ерөнхий найруулагч Б.Баатар физикл драмын хэлбэрт оруулан найруулсан.

         Монгол Улсын эдийн засагт шинэчлэл хийхээс гадна өнгөрсөн нэг жилийн хугацаанд бид олон жил төрд бугшсан авлига, хээл хахуультай тэмцэх үйл ажлыг үргэлжлүүллээ. Тухайлбал, өнгөрсөн нэг жил гаруй хугацаанд Хөгжлийн банкны найдваргүй зээлдэгч нарыг олон нийтэд нээлттэй зарлаж, тус банканд үүрлэсэн булхай, луйврыг илчилж, хуулийн байгууллагаас хариуцлага тооцсон. Цаашлаад Хөгжлийн банкны зээлдэгч нарын дунд нийтийн нээлттэй сонсгол зохион байгуулж, олон нийтэд нээлттэй шүүх боломж олгов.

      Авлигатай тэмцэх, улс төрд үүрлэсэн том гэмт хэргийг илчлэх дараагийн том алхам нь Нүүрсний хулгайн хэргийг олны дунд илчилж, улс төрд үүрлэсэн том хэрэгт бөмбөг тэслэв. Улсын эдийн засгийг цөөн хэдхэн хүн зашиж байсан том хэргийг илрүүлэх эхлэлийг тавьсан нь нүүрсний хулгай гэх тодотголтой шинэ хэрэг байв.. Нүүрсний хулгайн хэрэг илчлэгдснээр эдийн засагт экпортын хэмжээ нэмэгдэх, эдийн засаг сэргэхэд чухал нөлөө үзүүлсэн билээ. Нүүрсний хулгайн хэргийг шалгах том ажил эхэлсэн ч улс төрд үүрлэсэн эдийн засгийн гэмт хэргийг илчлэх хамгийн том алхам энэ байв. Түүнчлэн Үндсэн хуулийн өөрчлөлтөөр хүн бүр байгалийн баялгаас үр өгөөж хүртэх боломжийг нээж, Үндэсний баялагийн сангийн тухай хуулийг баталсан. Ингэснээр иргэд эхнээсээ Үндэсний баяллагийн сангаар дамжуулан байгалийн баялгаас хүртсэн амжилттай байлаа.

        Ийн ололт амжилт дүүрэн нэгэн он улирч байна. Ирэх жилүүдэд эдийн засгийн өсөлттэй, иргэдийн амьдрал ахуй тэгширсэн дэлгэр сайхан жил байхын ерөөл өргөж байна.