Монгол Улс зургаа дах Ерөнхийлөгчөө сонгох түүхэн өдөр өнөөдөр тохиож буй. Энэ удаад Үндсэн хуулийн нэмэлт, өөрчлөлтөөр Монгол Улсын Ерөнхийлөгчийг зургаан жилд нэг удаа сонгох гэж буйгаараа онцлогтой болж байна. Ерөнхийлөгчийн сонгуульд нэр дэвшигчид сонгуулийн хуулийн хугацаанд мөрийн хөтөлбөрөө танилцуулж, бүрэн эрхийн хугацаанд хэрэгжүүлэх боломжтой бодлогоороо өрсөлддөг уламжлалтай. Түүнчлэн нэр дэвшигч тус бүр өөрийн гэсэн уриа үгээр бодлогоо тодорхойлж, өөрийгөө ард түмэнд танилцуулдаг билээ. Энэ удаад үе үеийн Ерөнхийлөгчид ямар уриа үг дэвшүүлэн оролцож байсныг эргэн сануулж байна.

П.Очирбат: Шилжилтийн үеийг цэглэнэ, амьдралын доройтлыг арилгана

            1990 онд Ардчилсан хувьсгал ялж, парламентын засаглалтай болсноор 1993 зургадугаар сарын 6-нд Монгол Улс анхны Ерөнхийлөгчийн сонгуулиа хийж байв. Тухайн үед Ерөнхийлөгчийн сонгуульд МАХН-аас Лодонгийн Түдэв МҮАН, МСДН-аас Пунсалмаагийн Очирбат нар нэр дэвшиж, П.Очирбат олонхын санал авсан. Тодруулбал, тэрбээр нийт сонгогчдын 57.8 хувийн саналыг авч Монгол Улсын анхны Ерөнхийлөгч болж байлаа. Тухайн үед тэрбээр “Шилжилтийн үеийг цэглэнэ, амьдралын доройтлыг арилгана” уриаг дуугаа болгож байжээ.

Н.Багабанди: Таны итгэл бидний зүтгэл

      Монгол Улсын Ерөнхийлөгчийг сонгох сонгууль дөрвөн жилд нэг удаа зохион байгуулагддаг  уламжлалтай. Анхны сонгуулиа 1993 онд зохион байгуулж П.Очирбат дөрвөн жил Ерөнхийлөгчөөр ажилласнаар хуулийн хугацаа дуусаж, Ерөнхийлөгчийн сонгууль 1997 онд болж байв.

Тухайн үед Ерөнхийлөгчийн сонгуульд МАХН-аас Нацагийн Багабанди, МҮАН, МСДН-аас П.Очирбат нар нэр дэвшиж, Н.Багабанди нийт сонгогчдын 60.81 хувийн санал авч ялалт байгуулсан юм. Тэрбээр Ерөнхийлөгчийн сонгуульд “Таны итгэл бидний зүтгэл” уриа үгийг дэвшүүлэн оролцож байв. Ийн тэрбээр 2001 Ерөнхийлөгчийн сонгуульд дахин нэр дэвшиж, олонхын санал авснаар найман жил Монгол Улсын Ерөнхийлөгчөөр ажилласан билээ.

Н.Энхбаяр: Төрөө хямралаас гаргая, түмнээ ядуурлаас аваръя

       2005 онд Монгол Улсын гуравдах Ерөнхийлөгчөөр Намбарын Энхбаяр сонгогдож байлаа. Тэрбээр Ардчилсан намаас нэр дэвшигч М.Энхсайхан, Эх орон намаас нэр дэвшсэн Бадарчийн Эрдэнэбат, Бүгд найрамдах намаас нэр дэвшсэн Базарсадын Жаргалсайхан нартай өрсөлдөж, нийт сонгогчдын 53.44 хувийн санал авч, “Төрөө хямралаас гаргая, түмнээ ядуурлаас аваръя” уриатай ялж байсан юм.

Ц.Элбэгдорж: Эх орны хишиг иргэн бүрд

     2009 онд Монгол Улсын дөрөвдөх Ерөнхийлөгч Цахиагийн Элбэгдорж сонгогдож байлаа. Тухайн үед МАХН-аас нэр дэвшигч Н.Энхбаяртай өрсөлдөж, нийт сонгогчдын 51.21 хувийн саналаар “Эх орны хишиг иргэн бүрд” гэсэн уриатай ялж, байв. Мөн 2013 онд Монгол Улсын Ерөнхийлөгчийн сонгуульд МАН-аас нэр дэвшигч Б.Бат-Эрдэнэ, МАХН-аас Н.Удвал нартай өрсөлдөж, нийт сонгогчдын 50.23 хувийн санал авч, хоёр дахь удаагаа Ерөнхийлөгч болж байсан билээ.

Х.Баттулга: Монгол ялна

      2017 оны сонгуулиар Ардчилсан намаас нэр дэвшигч Х.Баттулга МАН-аас нэр дэвшигч М.Энхболд, МАХН-аас нэр дэвшигч С.Ганбаатар нартай өрсөлдөж байсан. Тухайн сонгуульд Х.Баттулга 38.11 хувь, МАН-аас нэр дэвшигч М.Энхболд 30.32 хувь, МАХН-аас нэр дэвшигч С.Ганбаатар 30.19  хувийн санал авч, нэр дэвшигчдийн хэн нь ч саналаа өгсөн нийт сонгогчийн олонхын санал аваагүй юм. Тиймээс Монгол Улсын Ерөнхийлөгчийн ээлжит сонгуулийн хоёр дахь санал хураалтыг 2017 оны долдугаар сарын 7-нд хоёр дахь санал хураалт болсон юм. Улмаар СЕХ Ерөнхийлөгчийн сонгуулийн дүнг нэгтгэхэд Ардчилсан намаас нэр дэвшсэн Х.Баттулга 50.61 хувийн санал авч, Өнөөдрийг хүртэл Монгол Улсын Ерөнхийлөгчөөр ажилласан.

     Ийнхүү өнөөдөр Монгол Улсын зургаа дахь Ерөнхийлөгч сонгогдох аж.