Засгийн газрын ээлжит хуралдаан өнөөдөр боллоо. Энэ үеэр Аж үйлдвэр, эрдэс баялгийн сайд Г.Дамдинням мэдээлэл өглөө.

          Тэрбээр "Аж үйлдвэр, эрдэс баялгийн салбар бол улс орны төсвийн 33 хувь, экспортын 94 хувийг дангаараа бүрдүүлдэг. Бид эдийн засгийн хүндрэлтэй нөхцөл байдалд эхний ээлжид уул уурхайн бодлогыг зөв зохистой авч явах ёстой. Нэгдүгээрт, манай орны эдийн засаг овор хэмжээ ихтэй, нүүрс, жонс, төмрийн хүдэр нэртэй том хэмжээний ложистик шаарддаг. Энэ хүрээнд бид салбар дотроо төрөлжүүлэх ажлыг хийх ёстой байдаг. Мөн өнгөт металын салбараа дэмжих ёстой. Үүнтэй холбоотойгоор бид "Алт-3" аяныг идэвхжүүлэх УИХ-ын тогтоолын төсөл өргөн барихаар бэлтгэж байна. Тус аяныг идэвхжүүлэх Засгийн газрын шийдвэр гарсан. Алтны үнэ өнгөрсөн оноос 36 хувиар өсөж, дэлхийд байгалийн баялгийн төлөөх хөрөнгө оруулалт өрсөлдөж байгаа энэ үед манай орны металл тушаалт их буурсан байна. Өөрөөр хэлбэл, өнгөрсөн оноос 16 хувийн уналттайгаар буурсан. Гэтэл дэлхийд  нэг уут алтны үнэ 3300-гаас дээш үнэлгээ тогтчихоод явж байгаа. Манай улсад нийт бүртгэгдсэн 500 тонн орчим алт байдаг. Үүнийхээ шууд олборлох боломжтой 100 тонн алтны ордыг эргэлтэд оруулах боломжыг эрх зүйн орчинд чөлөөлж, нээж  өгөх зорилго тавьж байна. Энэ хүрээнд алтны хайгуулын салбарыг нэмэгдүүлнэ, хайгуулын тусгай зөвшөөрлийг авдаг, эзэмшдэг нөхцөл байдлыг хөнгөвчилнө. Одоо бол ганцхан тендерийн сонгон шалгаруулалт байгаа. Тиймээс бусад олон улсад ашиглагддаг, хөрөнгө оруулагчдад нээлттэй байх зарчим руу өөрчлөх боломжтой байна. Хоёрдугаарт, татварын босго буюу алтны борлуулалтын зургаан тэрбум төгрөг хүртэл үндсэндээ 10 хувийн татвартай байгаа. Зургаан тэрбумаас илүү гарсан борлуулалт дээр шууд 25 хувь өгөх шатлалтайгаар явж байгаа. Алтны салбарын тогтоол төслийг бид УИХ-д өргөн барьна. Энэ баригдсан тогтоол дээр УИХ-аас Ажлын хэсэг гараад ажлаад явна" гэв.