Засгийн газрын ээлжит хуралдаан өнөөдөр боллоо. Тус хуралдаанаас гаргасан шийдвэрийг Засгийн газрын Хэрэг эрхлэх газрын дарга Н.Учрал танилцууллаа.

      Тэрбээр “Өнөөдрийн Засгийн газрын хуралдаанаар Зөвшөөрлийн тухай хуульд нэмэлт өөрчлөлт оруулж, спортын бооцоо тааврыг зөвшөөрч, үүнээс бусад бооцоо таавар, цахим мөрийтэй тоглоомыг бүрэн хориглох хуулийн төслийг УИХ-д нэн яаралтай горимоор өргөн мэдүүлэхээр шийдвэрлэж байна. Үндэсний статистикийн хорооноос хийсэн судалгаагаар 2023 оны байдлаар эдийн засгийн гэмт хэрэг 200 бүртгэгдэж, 2024 онд эдийн засгийн гэмт хэргийн улмаас нийт 417.2 тэрбум төгрөгийн хохирол учирсан судалгаа гарсан. Үүний 18-29 насныхан 9.2 хувь, 30-39 насныхан 47.7 хувийг эзэлж байна. Харин санхүүгийн мөрдөн шалгах ажиллагааны явцад авсан мэдээллээс нэгтгэн дүгнэхэд, нийтдээ манай улсаас 1.7 их наяд төгрөг буюу 500 сая ам.доллар гадаад улс руу шилжсэн байна. 6000-77000 доллар хүртлэх гэрээ байгуулж, зөвхөн цахим мөрийтэй тоглоомын үйл ажиллагаа явуулдаг газраас манай улс руу зар суртчилгааны зорилгоор 976 сая доллар шилжиж ирсэн байна. Өнгөрсөн хугацаанд Харилцаа холбооны зохицуулах хороо цахим мөрийтэй тоглоомын үйл ажиллагаа явуулдаг 6036 домайн хаягийн Монгол Улсаас хандах хандалтыг хязгаарласан хэдий ч линкүүдийг сольж, энэхүү үйл ажиллагааг явуулсан хэвээр байна. Тиймээс бид Зөвшөөрлийн тухай хуульд өөрчлөлт оруулаад, зөвшөөрөл аваад явуулж байгаа цахим тоглоомтой холбоотой бүх аж ахуй нэгжүүдийг, зөвшөөрөлгүйгээр үйл ажиллагаа явуулж байгаа аж ахуй нэгжүүдийг, цахим мөрийтэй тоглоомын үйл ажиллагааг дэмждэг зуучлалын нэртэй үйл ажиллагааг энэ хуулиар бүрэн хориглохоор тогтож байна. Хууль хэрэгжиж эхэлсний дараа хууль зөрчөөд цахим мөрийтэй тоглоом тоглох, энэ төрлийн үйл ажиллагаа зохион байгуулах юм бол хуулийн хариуцлага хүлээлгэх юм" гэв.