Нийслэлд Х.Нямбаатарын “хаанчлал” дуусгавар болж, нийслэлийн МАН дээр өрнөсөн улс төрийн талцал дуусах шатандаа орлоо. Өөрөөр хэлбэл, хотын дарга асан Х.Нямбаатарын Улаанбаатарт эхлүүлсэн мега төслүүд удаан хугацаанд олны шүүмжлэл дагуулж, улс төрөөс унах шалтгааныг нь мөн чолон удаа бүрдүүлсэн.

     Харин тэрбээр энэ улс төрийн дулиан дунд удаан тэссэн ч эцэстээ махны үнийг тэнгэрт хадаасан буруутан болж, улс төрийн албан тушаалаа хүлээлгэж өгсөн удаатай. Улмаар Улаанбаатар хотын захирагчаар улс төрд туршлага багатай шинэ залуу үеийн төлөөлөл болох Б.Пүрэвдагвыг томилоод удаагүй  байгаа юм.  Тэгвэл хотын шинэ мээр Б.Пүрэвдагвын халаа сэлгээ нийслэл дээр өрнөж байна.

        Өчигдөр хотын даргын хуулийн зөвлөхөөр хуульч УИХ-ын Тамгын газрын дэд дарга асан Ү.Амарбат, Нийслэлийн Засаг дарга ажлын албаны даргаараа Ж.Эрдэнэбаяр нарыг томилоод байна.

      Сонирхолтой нь тэд УИХ-ын дарга асан Д.Амарбаясгалангийн үед УИХ-ын Тамгын газарт ажиллаж байлаа. Өөрөөр хэлбэл, өнгөрсөн хугацаанд улс төрд Д.Амарбаясгалангийн гэж овоглогдож, улс төрийн замаа засаж яваа хүмүүс. Хотын шинэ даргын хувьд ч УИХ-ын дарга асан Д.Амарбаясгалангийн ойрын хүн гэх яриа олны дунд явж ирсэн. Тэгэхээр хотын даргын зөвлөхүүдийн томилгооноос халуун намраар эхэлсэн МАН-ын талцал, улс төрийн зодооны шинэ дүр зураг тодорхойлогдож болох нь.

       Нэг ёсондоо Ерөнхий сайд Н.Учрал өнгөрсөн хугацаанд Д.Амарбаясгалан Л.Оюун-Эрдэнэ нартай муудаагүй ч Ерөнхийлөгчийн талынхантай ойрхон байж, намын даргын суудлын хайнааг хагалж, албан тушаалд хүрсэн. Улмаар Д.Амарбаясгалантай улс төрийн тохироонд хүрч, МАН-ын бүлэг дотроо хүч тэнцүү  үзэж байсан хоёр фракцыг буулгаж авсан гэсэн үг. Ингэхдээ танхимаа бүрдүүлэхдээ Д.Амарбаясгалангийн ойрын гэгдэх хүмүүсийг  сайдын суудалд хүргэсэн. Удаах нь хотод УИХ-ын гишүүн Д.Амарбаясгалангийн хүмүүсийг томилох байлаа.

     Ингэснээр Ерөнхий сайд Н.Учрал улс төрд удаан ханьсаж явсан хотын дарга асан Х.Нямбаатар, түүний үеэл Ерөнхий сайд асан Л.Оюун-Эрдэнэ нараас “нүүр” буруулж, Д.Амарбаясгалантай хоршиж эхэлсэн шинэ дүр зураг үзэгдэж байна.

Нийслэлийн Засаг дарга ажлын албаны дарга Ж.Эрдэнэбаярын хувьд ЦХХХ-ны сайд Ч.Номингийн зөвлөх байсан гэдгээрээ олон нийтэд танигдаж эхэлсэн. Түүний хувьд Монгол телевизэд хөтлөгчөөр ажиллаж,олон нийтэд танигдаж эхэлсэн ч сайдын зөвлөх болмогцоо зодоон хийсэн гэх дуулианы бай болж байлаа. "Apprentice” шоуны оролцогч, "Shark tank"-ийн хөтлөгч Ж.Эрдэнэбаяр олон нийтийн газар танхайрч, бусдын автомашиныг эвдэж, амь насанд нь заналхийлсэн. Тэрбээр “G glass” машиных нь дэргэд машинаа байрлуулан ном зөөж байсан иргэнд бухимдан  "Чамайг яг одоо алмаар байна. Буугаад ир. Чи намайг хэн болохыг мэдэхгүй байна уу"  гэсэн гэнэ лээ. Энэ нь нэг удаагийн үйлдэл биш бөгөөд СӨХ-ны ажилтанг боож унагасан гэх мэдээлэл ч тухайн үед гарч байсан юм.  

     Харин хотын даргын хуулийн зөвлөх Ү.Амарбатын хувьд Д.Амарбаясгаланг УИХ-ын дарга байхад УИХ-ын Тамгын газрын Хяналт шалгалт болон Үнэлгээ, мониторингийн асуудал хариуцсан дэд даргаар ажиллаж байсан. Харин Д.Амарбаясгаланг УИХ-ын даргаар чөлөөлөгдсөний дараа өөрийн хүсэлтээр дэд даргын ажлаа хүлээлгэж өгсөн удаатай.

      Энэ мэтээр Хотын дарга Б.Пүрэвдагва УИХ-ын дарга асан Д.Амарбаясгалангийн  тойрон хүрээлэгч фракцынхныг тултал тойглож байна. Улс төрд өрнөж байгаа энэ дүр зургаас харахад Ерөнхий сайд Н.Учрал УИХ-ын дарга асан Д.Амарбаясгалан нар хүч хавсарч эхэлсэн нь харагдаж байна. Нөгөө талаараа тэд нийслэл МАН-д ноёрхлоо тогтоосон хотын дарга асан Х.Нямбаатараас нийслэлийн МАН-ыг  авахаар хүч хавсарч эхэлсэн ч байж мэднэ. 

      Цаашлаад Д.Амарбаясгалан, Н.Учрал нар дээр хүч нэмэх улстөрчийн нэг нь хотын дарга асан Д.Сумъяабазар юм. Эндээс Х.Нямбаатараас хотын МАН-ын хорооны даргын сэтэрийг нь авахын тулд Д.Сумъяабазар, бас түүний фракцтай хүч хавсарч байж болох дүр зураг харагдаж байна.