Үеийн үед МАН-ын томчуудын эрх мэдлийн төлөө багачуудаа зодолдуулж, өөрсдөө ард үлдээд улс төрийг зохиомлоор идэвхижүүлж ирсэн арвин туршлагатай. Нэг ёсондоо МАН-ын дарга нарын “зодоон” багачууддаа халгаатай явсаар ирсэн нь ч бодит үнэн.

          Энэ жишиг одоо ч давтагдаж байна. МАН-ын даргад нэр дэвшигчид энэ намар улс төрийг зохиомлоор идэвхжүүлснээр үг дуугардаг юм уу гэмээр чимээгүй суусан УИХ-ын гишүүд эхнээсээ амь орж, чуулганы хуралдаанд хуурай агсамнаж, хэвлэлээр нэгнээ муулж, баалж, сошиалд попрох нь ч хэрээс хэтэрсэн. Цаашлаад нам доторх баривчилгааг багачуудаасаа эхлүүлж, томчуудаа сугалж үлддэг МАН-ын ээлжилт улс төрийн  “жүжиг” зохиолын дагуу өрнөж байна.

“ЭЛСНИЙ 13”-ААС ЭХЛЭЛТЭЙ БАГАЧУУДЫН ТАЛЦАЛ

          МАН-ын томчуудын зодоон үеийн үед ингэж л өрнөж ирсэн.  2007 онд “Элсний 13” –ын бүлэглэл ингэж л тухайн үеийн МАХН-ын цагаан байрнаас мэндэлж байлаа. Өөрөөр хэлбэл, МАХН-ын гишүүн асан Ч.Улаан, Л.Пүрэвдорж, Т.Ганди, Д.Тэрбишдагва, Д.Арвин, Л.Одончимэд,  Д.Одбаяр, Ц.Шаравдорж, А.Цанжид, Ц.Мөнх-Оргил, Ч.Авдай, Р.Нямсүрэн анр “Элсний 13”-ыг байгуулж, улс төрд дуулиан тарьсан ч түүний ард Ерөнхий сайд асан М.Энхболд Ерөнхийлөгч асан Н.Энхбаяр нарын улс төрийн зодоон өрнөж байсан. М.Энхболдын Засгийн газрыг унагаах улс төрийн зохиолыг “Элсний 13”-хан бичиж байсан гэсэн үг. Тухайн үедээ томчууд нь санасандаа хүрч, багачууд нь улс төрийн карьеараа өндөрлүүлснээр сүр дуулиантай зарлагдсан “Элсний 13”-ы тарж байсан удаатай.

ХӨГЖЛИЙН БАНКНЫ ХЭРЭГТ Ё.БААТАРБИЛЭГ, НҮҮРСНИЙ ХУЛГАЙН ХЭРЭГТ Т.АЮУРСАЙХАН НАР Л ХӨЛ ЧИРЭГДСЭН ДЭЭ

       Дараа нь МАН 32, 33-ын бүлэг болж хуваагдсан нь мөн л эрх мэдлийн төлөөх томчуудын зодоон байлаа. Парламентын танхимд 65-уулаа сууж байсан МАН-ынхан энэ тэнцүү хуваагдчихаад гишүүд нь хоорондоо үзэлцэж, “томчууд” нь чимээгүй ажиглаж байсан. ЖДҮХС, 60 тэрбумын хэрэгтэй жинхнээсээ тэмцэж байгаа юм шиг сүр дуулиан болгон зарласан улс төрийн хэргүүд өнөөдөр загасны ой санамжинд үлдэж, Монгол Улс хохироод үлдсэн гашуун түүх ч бий.

       Хамгийн сүүлд парламентын түүхэнд байгаагүй мэтээр зарлагдаж байсан Хөгжлийн банк, нүүрсний хулгайн хэргүүд ч улс төрийн зурагдсан зургийн дагуу явсан удаатай. Анх нүүрсний 17 нэрсийг зарлаж, ахиад 18 хүний нэрийг дугтуйтай сугалж үлдээлээ хэмээн улс төрд мөн ч их сүр дуулиан болж байсан даа. Хамгийн хачирхалтай нь, нүүрсний хулгайн хэрэгт холбогдсон хэмээн нэр цохиулсан гишүүдээс өдгөө парламентад хоёр дах удаагаа сонгогдчихсон бүрэн эрхээр хамгаалуулчихаад сууж байгаа нь ч бий.

        Хөгжлийн банкыг хуу тоносон гэх гэмт хэрэгтнүүдийн олонх нь цагаадаж, УИХ-ын гишүүн Ё.Баатарбилэгээр туг тахиад өнгөрсөн. Нүүрсний хулгайн гэмт хэргийн мөн л Т.Аюурсайхан, Б.Ганхуяг нараар түрүй барьж, туг тахиад өнөөдөр таг чиг мартагдчихсан байгаа нь ч нууц биш юм.

МАН-ЫН ДАРГЫН "ЗОДООН"-НЫ БАЙ НЬ Ц.ЧУЛУУНЗАГД БОЛЧИХЛОО

     Хамгийн ойрын жишээгээр үзэхэд МАН-ын даргын “зодоон” томчуудын дунд ширүүсч, нарийн бичгийн дарга Ц.Чулуунзагдыг цагдан хорьсноор улс төр улам бүр идэвхжсэн. МАН-ын байрнаас төрсөн учраа мэдэхгүй төөрч явсан УИХ-ын шинэ гишүүд улс төрд хөлд орж, фракц фракцынхаа талд чимээгүй хэрнээ үнэнчээр үйлчлэж байлаа.  Гэтэл багачууд нь хөнжилдөө хөлөө жийлцэж эхэлмэгц ах нар нь учраа олсон уу гэмээр нам жим болчихсон байгаа нь улс төрийн бодит үнэн байна.   Үндсэндээ улс төрийн “зодоон” дунд багачуудаараа туг тахиад томчууд нь суга дээшилдэг МАН-ын тавилттай жүжиг одоо ч ил цагаан өрнөж байна.     

    Шинэ, залуу улстөрчиддөө улс төрийн луужин болох ёстой атал улс төрийн золиос болгодог муу түүхээсээ салсан нь дээр биш үү дээ МАН-ын дарга нар аа.