Унтаа улс төр намрын чуулганаар сэрж, эд дундаа халуурч байна. Тэр тусмаа эрх баригч намын даргын өрсөлдөөн өндрөө авч, эхнээсээ багачуудаа баривчилж, томчууд нь “зодолдож” эхэлсэн. Улмаар УИХ-ын дарга Д.Амарбаясгаланг МАН-ын даргад нэр дэвшихээ мэдэгдснээс хойш мөн ч их дуулиан ар араасаа дэгдэж байна. Түүний хамгийн ойрын хүн гэгдэх МАН-ын нарийн бичгийн дарга Ц.Чулуунзагдыг цагдан хорьсон. Гэтэл УИХ-ын дарга Д.Амарбаясгалан хамгийн ойрын хүнээ хамгаалж ганц үг ган хийсэнгүй. Харин   60, 70-аад оныхоо ах нартай ана мана үзэлцэхээ мэдэгдэж, хариу барив. Хачирхалтай нь, МАН-ын энэ зодооны хөлд АН-ынхан үрэгдэж мэдэх нь.

       Түүний хамгийн эхний бай нь АН-ын гишүүд дундаа хамгийн туршлагатай улстөрч гэгдэх УИХ-ын гишүүн Х.Тэмүүжин байлаа. Өөрөөр хэлбэл, УИХ-ын нэр бүхий гишүүдийг АТГ-аас шалгаж, Ерөнхий прокуророос бүрэн эрхийг нь түтгэлзүүлэх санал оруулахаар хавтастай нэрс бэлдсэний нэг нь УИХ дахь АН-ын бүлгийн гишүүн Х.Тэмүүжин юм гэнэ. Түүнийг албан тушаалаа ашиглаж, бусдад давуу байдал олгосон гэх үндэслэлээр шалгаж эхэлсэн гэдгийг эх сурвалжууд мэдээллээд эхэллээ. Цаашлаад Х.Тэмүүжингийн ил хэрэгт 2012-2014 онд Хууль зүйн сайдаар ажиллаж байхад нь яамны Санхүү, хөрөнгө оруулалтын хэлтсийн даргаар ажиллаж байсан С.Мөнхбат, тухайн үед Гадаадын иргэн, харьяатын газрын дэд дарга байсан Б.Цолмон нарыг холбогдуулсан аж. Тэднийг 2012-2014 оны үед цагдаагийн байгууллага, тэр дундаа замын цагдаагийнханд олгосон бэлэн бус торгуулийн систем зэргийг хэрэгжүүлэхдээ албан тушаалаа ашиглаж бусдад давуу байдал олгосон, мөнгө угаасан байж болзошгүй хэмээн буруутгаж эхэлсэн гэх мэдээлэл бий.

        Тэгвэл УИХ-ын гишүүн Х.Тэмүүжингээс гадна АН-аас АТГ-ын газрын хаалгыг сахиж яваа гишүүн нь УИХ-ын гишүүн С.Ганбаатар.   Тодруулбал,АТГ-аас УИХ-ын гишүүн С.Ганбаатарыг авлигын хэргээр яллагдагчаар татах саналаа прокурорт хүргүүлээд буй. Саяхан С.Ганбаатар АТГ-ын хаалга татах болсон асуудлаараа тайлбар хийхдээ “Хууль хяналтынхан намайг хэдэн сар шалгаж байна. Надаас юу ч гарч ирэхгүй. Яах вэ, намайг “Land cruiser 300” унаад явж байна, хахуулиар авсан байх гээд шалгаж байгаа юм байна лээ. Би тэр машинаар тойргийнхоо сумдаар явахын тулд найзаасаа түрээсэлсэн. Минийх биш” гэж мэдэгдсэн. Ямартай ч АТГ-т шалгагдаж буй С.Ганбаатарын авлигын хэргүүд дотор “Land cruiser 300” автомашины асуудал байгаа гэсэн үг.  

           Тэгвэл АН-ынхан дотор С.Ганбаатарыг тэр “Land cruiser 300” автомашиныг “Мон-Лаа” ХХК-аас бэлгэнд буюу хахуульд авсан гэх шуум гараад эхэлжээ. Шалгаж үзвэл, “Мон-Лаа” ХХК-ийн захирал Х.Энхсайхан нь Баянхонгорын уугуул, С.Ганбаатарын багын найз. Бас Х.Энхсайхан нь С.Ганбаатарын туслахуудтай хоёр компани, нэг сан хамтран эзэмшдэг. Тэгээд болоогүй, С.Ганбаатарын туслахууд нь 2010 оноос хойш “Мон-Лаа” ХХК-аас цалинжиж, нийгмийн даатгалын шимтгэл төлж ирсэн гэх мэдээлэл ч байна. Гол нь, УИХ-ын гишүүн С.Ганбаатар багын найз Х.Энхсайханыхаа “Мон-Лаа” ХХК-д Хөгжлийн банкнаас 5.6 тэрбум төгрөгийн зээл авч өгсөн, авсан зээлээ төлөхгүй 10-аад жил гүрийхэд нь ч тусалсан бөгөөд энэ онд “Эрдэнэс тавантолгой” ХК-ийн туслан гүйцэтгэгч болоход нь ч тусалжээ. Өөрөөр бол, УИХ-ын гишүүн С.Ганбаатар багын найз Х.Энхсайханаасаа “Land cruiser 300” шагналд авах хэмжээний хангалттай “гавьяа” байгуулсан нэгэн аж. 

         АТГ -ын үүдийг АН-ын гишүүд татаж эхэлснээс гадна хамтарсан Засгийн газарт багтсан гишүүд нь эхнээсээ чих халууцуулаад эхэлсэн. Өөрөөр хэлбэл, Гашуунсухайтын хил холболтын төмөр замын гэрээтэй холбоотой асуудлаар УИХ-ын гишүүн Ц.Тувааныг Аж үйлдвэр, эрдэс баялагийн сайдаар ажиллаж байхдаа БНХАУ-ын “Чайна Энержи” ХК-д давуу байдал олгосон гэрээ хийсэн гэх асуудал сөхөгдөж эхэлсэн. Харин УИХ-ын гишүүн Ц.Туваан “Хил холболтын гэрээг байгуулснаараа бахархдаг. Зарим хүмүүс өөр шигээ санаад байх шиг байна. Авлига, албан тушаалын ямар ч асуудал байхгүйг хариуцлагатай хэлье. Шалгуулахад ч нээлттэй. Улс орны том асуудлыг намын даргын асуудлаас болж битгий зогсоогоосой гэж хүсэж байна. Одоо төмөр замын гэрээг цуцалбал жоомоо алах гээд гэрээ шатааж буйтай адил зүйл болно. Хэрвээ энэ гэрээг алдагдалтай болсон гэж байгаа бол цуцлаад дахин байгуулах бүрэн эрх нь Засгийн газарт бий. Хэрвээ Хятадын талаас авлига авсан бол шалгуулаад, хариуцлага хүлээхэд бэлэн” хэмээн мэдэгдэж амжсан.

        Энэ мэтээр Ардчилсан намынхан МАН-ын хөлд чирэгдэж, хөл толгойгоо олохгүй хуучин хэргүүд нь сөхөгдөж байна.

       Угтаа бол МАН ханиахад АН хатгаа авч эхэллээ. Хатгаа хүндрүүл амьд тулдаг  гэдгийг хэн хүнгүй мэдэж байгаа. Тиймээс МАН-ын “зодоон” төрийн хямралд хүргэж, хөлд нь АН-ынхан чирэгдэж мэдэхээр байна.