-АНХ УДАА ШИНЭ ГАР УТАС БЭЛГЭНД АВЧ БАЙГАА БОЛОХООР БАЯРЛАСАНДАА УЙЛЧИХСАН ЮМ АА, БИ-

       Сургуулийнхаа хашаанаас ээжийнхээ машин руу шар цамц, хар хөх өмд, хар цүнх, цагаан пүүзтэй хүү байдаг хурдаараа дэгдэж байгаа харагдана. Машин дотроос бичлэг хийж буй эмэгтэй “Миний дунд хүү ирж байна. Ээжийн ганц туслах. Хоёр ахыгаа байхгүйд гэрийнхээ хамаг ажлыг хийнэ. Сайн залуу” гэж ярихтай зэрэгцээд машины хаалга онгойлоо. Хүү “Явах уу” гэхэд ээж нь “За явъя. Ээж нь хүүдээ зөндөө хайртай шүү. Бүх юм хийж өгдөгт” гэхэд хүү “За, яасын ээж” гээд гайхав. Харин ээж нь “Хоёр ахынхаа хамаг ажлыг хийж өгдөгт баярлалаа, хүүдээ. Ээж нь хүүдээ хайртай шүү. Ээж нь хүүдээ зориулаад урд талын хайрцагт чихэр хийчихсэн байгаа” гэв. Хүү машины урд талын хайрцгийг сөхөж, улаан туузаар гоёсон, цагаан хайрцагтай iphone маркийн гар утсыг гартаа бариад уйлж орхилоо. Ээж нь “Яасан бэ, уйлчихсан уу” гээд мөн л хоолой нь зангирав. Ээжээсээ гар утас бэлгэнд авсан хүү уйлж, “Баярлалаа, та нарт бүгдэд чинь хайртай шүү” гэж хэлэхтэй зэрэгцээд бичлэг тасрав.  Ийм нэг 55 секунтын хөөрхөн бичлэг өчигдөр монголчуудыг ч өмөлзүүллээ.

       Гар утас бэлгэнд аваад баярласандаа уйлж суугаа уяхан хүүг Батхишигийн Давааням гэдэг. Тэр одоо 13 настай, Сэлэнгэ аймгийн Ерөө сумын ерөнхий боловсролын сургуулийн наймдугаар ангийн сурагч гэнэ. Аав, ээж нь түүнд гэнэтийн бэлэг барьж, шинэ гар утас авах мөрөөдлийг нь өчигдөр биелүүлжээ. Аав нь уурхайд ажилладаг учир хүүгийнхээ баярлаж байгааг хадгалж үлдээх зорилгоор ээж нь бичлэг хийсэн байна. Харин цахим хуудастаа оруулснаар хүүгийн бичлэг олон хүнд хүрчээ. Ердөө долоохон цагийн дотор 232 мянган хүн үзэж, 12 мянган хүн лайк, зүрх дарж, 1000 хүн сэтгэгдэл бичиж, 2500 хүн хуваалцаж, шэйр хийжээ.

       Бид бичлэгийн гол баатар, олон хүний хайрыг татаж, урмын үгэнд умбаж байгаа Б.Даваанямтай ярилцлаа. Тэр бидэнтэй ярьж байхдаа хэд хэдэн удаа хоолой нь зангирч, нулимс унагасан. Тэр дэндүү уяхан, өрөвч, сайхан сэтгэлтэй хүү байна лээ.

-Сайн уу. Шинэ утастай болсонд баяр хүргэе.

            -Сайн, сайн уу, баярлалаа. Мөн миний бичлэгийг үзэж, урмын үг хайрлаж, шинэ утастай болсонд баяр хүргэж байгаа хүмүүст баярлалаа гэж хэлмээр байна. Ээжийн хаяг руу зөндөө хүн гоё гоё үг бичсэн байна лээ.

-Шинэ утас авсан мэдрэмж гоё байна уу. Өдрийг юу хийж өнгөрүүлсэн бэ?

          -Үнэхээр гоё байлаа. Өдөр хичээлээ тараад ээж, дүүтэйгээ гэртээ ирсэн. Өдөр гэрийн ажил, гэрийн даалгавараа хийж байх хажуугаараа утсаараа оролдлоо. Шинэ утас учраас олон зүйл татах хэрэгтэй болсон. Дата аваад ганц, хоёроор нь татаж л байна. Хэсэгтээ дуусахгүй юм шиг байна лээ. Дөнгөж сая (өчигдөр 20:00 цагийн үед) хоолоо хийж идчихээд ээж, хоёр дүүтэйгээ эрхэлдээд л хэвтэж байна.

-Ямар хоол хийсэн юм бэ. Чи сайн тогооч байхдаа?

             -Мах чанаад, төмс, ногоо чигнэж, гурил хаяж идлээ. Монгол хоол хийсэн гэх юм уу даа. Хоол хийж чадалгүй яах вэ. Өөрийнхөө хүссэн хоолнууд хийж идэж чаддаг. Гэхдээ тийм ч сайн тогооч биш ээ. Том ах маань цэрэгт, дунд ах оюутан, дараагийнх нь би учраас гэрийн ажлаа хийхгүй бол болохгүй. Аав уурхайд ээлжийн ажилтай, ээж сумын төв, Сэлэнгэ, Дархан руу машинаараа хүн зөөж, мөнгө олдог юм. Манай аав, ээж байхаасаа байхгүй нь их болохоор өөрөө, хоёр дүүгээ өлсгөхгүйн тулд хоол хийж сурсан. Гэхдээ манай ээж мундаг болохоороо бүгдийг нь зааж өгсөн.

-Ямар хоол хийх дуртай вэ?

            -Хоолны материал байх юм бол гоё хоол хийж идэхийг хүсдэг. Бууз, хуушуур л хийж чаддаггүй юм. Пицца, бургер хүртэл хийж чаддаг. Интернэтээс жорыг нь хараад л ээжийг аймгийн төв явахаар хэрэгтэй хүнсээ захиад юм. Гэхдээ баяр ёслол, тэмдэглэлт баярын үеэр л чамин хоол хийдэг. Бусад үед ихэвхчлэн монгол хоол хийдэг.

-Тэгэхээр чи одоо шинэ утсаараа гоё гоё хоолны жор харах нь ээ.

         -Тийм ээ, миний хуучин утас гацаад, интернэтээс юм хайхаар удаад, “хар мянган жил” болдог юм аа. Одоо харин шинэ утас маань сүн сүн гээд л хайх байх. Шинэ хоолны жор харахаас гадна хичээлээ хийхэд утас хэрэг болдог. Янз бүрийн хэрэгтэй мэдээллээ хайх хэрэг гардаг юм. Одоо ч хичээлээ хийхэд саадгүй боллоо доо.

-Хичээл нь ямархуу байна даа. Их зүйл сурч байна уу?

          -Тийм ээ, багшийнхаа заасан бүгдийг л сурч байгаа.

-Хуучин утсаа дүүдээ өгсөн юм уу?

          -Тийм ээ, тавдугаар ангийн дүүдээ бэлэглэсэн. Тэр утас ахын хуучин утас байсан юм. Харин одоо дүү барих нь дээ. Дүүг шинэ утастай болоход хамгийн бага дүү маань барих байх аа. Хоёр бага дүү маань миний хуучин утсыг булаацалдаад, хоорондоо жаахан таарамжгүй байгаа. Ээж байгаа болохоор тэр хоёр арай ч зодолдохгүй ээ.

-Чиний бичлэгийг хүмүүс үзээд зөндөө гоё сэтгэгдэл бичсэн байна лээ. Гэрийнхэн нь юу гэж байна вэ?

           -Баяртай байгаа. Байн, байн бичлэг рүү орж хараад, хэдэн хүн үзэж вэ гээд л бас хүмүүсийн сэтгэгдлийг алгасахгүй уншсан. Хоёр дүү маань “Агаа та бүүр лааж байна шүү дээ” гээд инээлдээд байна лээ. Харин аав орой ярихдаа “Миний од хүүгээр юу байна даа” гэж асуусан. Би тоглоомоор “Од хүү нь шинэ утсаа бариад л сууж байна” гэж хэлсэн. Би үнэхээр их баяртай байгаа. Шинэ утас бэлэглэнэ гэж бодоогүй. Анх удаа шинэ утас барих болж байгаа болохоор бүүр ч баяртай байна.

-Аав, ээждээ баярлалаа гэдгээ хэлсэн үү. Аав, ээж нь ч гэсэн баяртай байгаа байх даа.

         -Тийм ээ, хэлсэн. Утсаа авсан даруйдаа л баярлаж байгаагаа, хайртай гэдгээ хэлсэн. Оюутан ах маань залгаад миний өмнөөс мөн л аав, ээжид баярлалаа гэж хэлсэн байна лээ. Аав, ээж хоёр ярьж байгаад аавын цалинг буухаар Ерөөгийн шар дэлгүүрээс 460 мянган төгрөгөөр авсан гэж байна лээ. Аавынхаа цалингаар авсан үнэтэй утсыг нь хаяхгүй, эвдэхгүй олон жил барина аа. Тэгээд дахиад шинэ утас авахаараа дүүдээ өгнө дөө.

-Ангийхантайгаа уулзсан уу?

         -Өдрөөс хойш уулзаагүй. Ээж биднийг “Хичээлээ тарсан бол шууд гэртээ ир” гэдэг болохоор би өдөр гадуур, дотуур гардаггүй. Маргааш өглөө (өнөөдөр) ангийнхантайгаа уулзана. Од болсон байх аа. Миний утсыг бүгд сонирхоод, явуулахгүй байх вий.

-Чиний мөрөөдөл юу вэ?

         -Одоохондоо мэргэжлээ сонгоогүй л байна. Харин миний хобби эвдэрч, хэмхэрсэн эд зүйлсийг засаж, нааш, цааш шилжүүлж холбох дуртай. Хэрэв миний гар утас багахан шиг эвдэрвэл би лав засаж чадна аа.

-Чи их уяхан юм байна тэ?

         -Манай гэрийн эрчүүд бүгдээрээ над шиг. Бүгдээрээ л баярлахаараа уйлчихдаг юм. Бүүр бид хэд аавыгаа хүртэл уйлуулж байсан шүү дээ. Таван жилийн өмнө аавын төрсөн өдрөөр ажил  дээр нь бүгдээрээ хэлэхгүй очоод, гэнэтийн бэлэг барьсан чинь аав уйлчихсан.

        Б.Даваанямынх долуулаа. Тэр хоёр ах, хоёр эрэгтэй дүүтэй. Түүний аав, ээжийг Ерөө сумынхан сайхан сэтгэлтэй, бусдыг үргэлж баярлуулж байдаг гэдгээр нь андахгүй гэнэ. Хөөрхөн хүүгийн аав, ээж, гэрийнхэнд нь уншигчдынхаа өмнөөс аз жаргал хүсье.