“Питсанюлок, Пичит 2025” засмал замын дугуйн Ази тивийн аварга шалгаруулах тэмцээнд өндөрлөсөн. Манай дугуйчид эх орондоо өчигдөр ирсэн.  Монголын дугуйн спортын түүхэнд анх удаа баг тамирчдын тивийн аваргын өмнө 16 хоногийн цугларалтад хамруулж тэмцээн болох газрын цаг агаар, уур амьсгал, уралдах замтайгаа танилцах боломж бүрдүүлсэн байна. Монголын дугуйн спортын түүхэнд анх удаа тивийн аваргад эмэгтэй өсвөрийн баг тамирчдыг оролцуулсан байна.

    “Элит” эрэгтэйчүүдийн бөөн гараатай уралдаанд ОУХМ Сайнбаярын Жамбалжамц хүрэл медаль авч, хувийн уралдаанд Азийн аваргын гурван медальтай болжээ. Спортын мастер Хадбаатарын Тэмүүлэн Ази тивийн аваргын залуучуудын ангилалд Монгол Улсын анхны мөнгөн медалийг хүртсэн байна. Монголын дугуйн спортын түүхэнд анх удаа эрэгтэйчүүдийн элит, залуучуудын ангилалд нэгэн зэрэг медаль авчээ.

    Мастеруудын ангилалд нэг алт, долоон мөнгө, нэг хүрэл, нийт есөн медаль авав. Эрэгтэйчүүдийн 55-59 насанд ОУХМ Д.Шинэбаяр алт, мөнгө, 60-64 насанд ОУХМ Д.Энх-Од хоёр мөнгө, 64-69 насанд ОУХМ Г.Анхбаяр мөнгө, хүрэл, эмэгтэйчүүдийн 44-49 насанд Д.Эрдэнтуяа хоёр мөнгө, 40-44 насанд А.Оюун-Эрдэнэ мөнгөн медаль/ медаль хүртсэн зэрэг амжилт гаргалаа.

    Баг тамирчдыг МДХ-ны ЕНБД Т.Төгөлдөр ахалж, дасгалжуулагчаар Э.Алтан-Очир, А.Алтансүх /залуучууд С.Түмэндэмбэрэл, өсвөр үе Г.Батсүх, М.Нямлхагва/, багийн менежерээр МДХ-ны Шүүгчдийн зөвлөлийн дарга А.Эрдэнэболд нар ажиллажээ.

    Монголын дугуйн холбооны ерөнхийлөгч Б.Гүрсоронзон тэмцээний өмнө Тайландын Бангкок хотод болсон Азийн дугуйн холбооны их хуралд оролцсон байна. Тэрбээр хурлын үеэр Азийн дугуйн холбооны ерөнхийлөгчийн сонгуульд улсаа төлөөлөн саналаа өгч, Питсанюлок, Пичит хотод хуваагдан бэлтгэл хийж байсан тамирчдадаа эргэн очиж амжилт хүсэж байжээ.