Өмнөговь аймаг орон нутгийн төсвийн хөрөнгөөрөө аймгийнхаа хамгийн алслагдсан сумдыг авто замаар холбож буйгаараа анхны аймаг юм. Даланзадгад-Гурвантэс чиглэлийн авто замын бүтээн байгуулалт нь “Өсөлттэй Өмнөговь” хөтөлбөрийн хүрээнд хэрэгжүүлж буй голлох бүтээн байгуулалтын нэг.  Даланзадгад-Гурвантэс чиглэлийн авто зам 220 км үргэлжилсэн, харин энэ онд 15 км зам тавихаар төлөвлөсөн боловч сонгон шалгаруулалттай холбоотой маргааны улмаас тухайн ажил хойшилжээ.

   Гэвч Гурвантэс сум талаас угтуулан хэрэгжүүлж буй замын ажилд нэмэлтээр 10 км замын бүтээн байгуулалт энэ онд хийгдэж, нийт 25 км замыг үргэлжлүүлэн бүтээн байгуулсан байна.  Шинээр баригдсан 10 км замыг 2026 оны арваннэгдүгээр сард нээхээр төлөвлөж байна. Өмнөговь аймаг алслагдсан сумдыг авто замаар холбох нь ард иргэдийн зорчих нөхцөлийг сайжруулахаас гадна баруун бүсийн эдийн засаг, аялал жуулчлал, үйлдвэрлэл, худалдааны эргэлтийг нэмэгдүүлэхэд чиглэсэн хөгжлийн гол бодлогыг баримталж байгаа ажээ.