Татвараас зайлсхийсэн, мөнгө угаасан, авлига, хээл хахуулийн хэрэгт холбогдсон цагаан захтнууд буюу ямарваа нэгэн улсын төрийн өндөр албан тушаалтнууд эх орноосоо зугтаж, гадаад орогнохдоо хууль бусаар олсон хөрөнгөө үрж, зугаацахад тохиромжтой гэсэн газар сонгодог гэнэ. Гэсэн ч уг төрлийн гэмт хэрэгт холбогдсон этгээдүүдийг хаанаас, хэрхэн баривчилснаа FBI, Интерпол зэрэг олон улсын тагнуул, мөрдөх товчоо мэдээлдэггүй. Харин энэ тал дээр баримттайгаар таамаг дэвшүүлсэн эдийн засгийн гэмт хэрэгтнүүдийн орогнох газар болдог дэлхийн хэд хэдэн хотыг уншигч танд танилцуулъя.

                        Цагаан захтан, эдийн засгийн гэмт хэрэгтнийг мөрдөж, баривчлахад орогносон улсынх нь хууль, эрх зүй зэргээс шалтгаалан хүндрэл учирдаг аж. Тухайлбал, “CNBC”-гийн хийсэн судалгаагаар дэлхийн 100 орчим орон хоорондоо ялтан шилжүүлэх гэрээгүй байдаг бөгөөд зарим оронд тухайн улсын иргэнээр бүртгүүлэхэд хялбар, нэгэнт бүртгүүлсэн бол тус улс нь харьяа иргэнээ бусад орны тагнуул, хууль хүчний байгууллагаас хамгаалдаг гэнэ.

-ХЭМЖЭЭЛШГҮЙ ХӨРӨНГӨТЭЙ ГЭМТ ХЭРЭГТНҮҮДИЙН ОРОГНОДОГ ГАЗАР БУЮУ МАКАО-

Хятадын баячуудын казинод нь мөнгө угаадаг гэдгээрээ “зартай” Макао Хонконгийн бүс нутагт багтдаг ч улсаасаа зарим хууль, эрх зүйн орчин нь өөр байдаг аж. Тодруулбал, Хонконг дэлхийн олон оронтой ялтан шилжүүлэх гэрээтэй ч Макао хотод ялтан шилжүүлэх гэрээ байдаггүй. Хятадын баячуудаас эхлээд дэлхийн олон орны тэрбумтан, саятнуудын мөнгөө угаах “уурхай” болсон Макаод эдийн засгийн томоохон гэмт хэрэгтнүүд, онц ноцтой хүн амины хэргийн сэжигтнүүд ч орогнож байж болохыг “Business Insider” онцолж байжээ. Макао казиногоороо алдартай ч бүхлээр нь авч үзвэл хагас сая орчим хүн амтай тус хотод орогнох, нуугдах илүү хялбар гэнэ.

                       Саяхны жишээ дурдахад, Хонконгийн хөрөнгийн биржид бүртгэлтэй “South Shore Holdings” компанийн эзэн Питер Кокер гэгч АНУ-ын үнэт цаасны зах зээлд хөөсрөл үүсгэж, мөнгө угааж, залилан хийсэн хэрэгт холбогдсоноосоо хойш удаан хугацааны турш сураггүй болоод байв. Тэгвэл тус этгээдийг өнгөрсөн нэгдүгээр сард АНУ-ын Батлан хамгаалах яамны тусгай ажилтнууд Макаогоос баривчилсан байдаг. Баривчлагдах үедээ Питер Кокер Макаод 13 давхар томоохон зочид буудал барьж байсан бөгөөд сэжигтнийг АНУ татаж авснаас хойш тус буудал дампуурсан талаар Макаогийн шүүхээс мэдэгдсэн юм. Энэ мэт өөр олон гэмт хэрэгтэн Макаогоос баривчлагдаж байсан бөгөөд Хонконг руу гарснаас хойш сураг нь тасарсан олон гэмт хэрэгтэн байгааг FBI-н албан ёсны цахим хуудаснаас харж болно.

“ТАЙВАН” БАЙХ ДУРТАЙ ХЭРЭГТНҮҮДИЙН СОНГОДОГ АНДОРРА-

Франц, Испанийн дунд орших 14 мянга гаруй хүн амтай Андорра эдийн засгийн гэмт хэрэгтнүүдийн сонгож очдог, орогнодог “топ” газруудын нэг гэнэ. Газар нутгийн байршлын хувьд Андоррагаас хөрш Франц, Испани руу нэвтрэхэд хялбар бөгөөд тус улсад консулын газар ч байдаггүй учир тэнд очсон гадаадын гэмт этгээдүүд эрх чөлөөтэй гадуур “зугаалж” байдаг гэх. 2010-аад оны эхээр Андорра дэлхийн орнуудтай ялтан шилжүүлэх гэрээгүй байсан. Тухайн үед олон орны гэмт хэрэгтнүүд тус улсыг орогнох газраа болгон сонгож байж. Харин түүнээс хойш Андоррагийн эрх баригчид гаднын тагнуул, хууль хүчний байгууллагатай хамтарч улсад нь орогнож байсан хэд хэдэн гаднын том албан тушаалтныг баривчилж байжээ.

                       Тухайлбал, хууль бусаар газрын тосны компанитай гэрээ байгуулж, хоёр тэрбум орчим евро авсан гэдэг Венесуэлийн Ерөнхийлөгч агсан Уго Чавесыг Андоррад орогнож байхад нь баривчилсан байдаг. Баривчлагдсанаасаа хойш Уго Чавес өвчнөө дийлэлгүй нас барсан бөгөөд одоог хүртэл түүний хоёр тэрбум евро хаана байгаа нь мэдэгддэггүй гэх. Үүнтэй холбоотойгоор түүнтэй хамт ажиллаж байсан тухайн үеийн дэд сайд, бизнесменүүд, гэр бүлийг нь одоо ч хууль хүчний байгууллагаас шалгадаг. Мөн тус улсад мөнгө угаадгаараа “зартай”, “Banca Privada d'Andorra” компанийн эзэн, Андоррагийн томоохон бүлэглэлүүдийн нэгнийнх нь толгойлогч Жоан Пау Микелыг тус улсын Andorra la Vella хотоос баривчилж байсан юм. Өвлийн улиралд хэт хүйтэрдэг ч зундаа сэрүүн байдаг Андорраг “тайван” байх дуртай гэмт хэрэгтнүүд сонгодог гэх.

-ОРСОН, ОЧСОН ЦАГААН ЗАХТНУУД “СУРАГГҮЙ” БОЛДОГ САНКТ-ПЕТЕРБУРГ ХОТ-

ОХУ-ын Санкт-Петербуг хот зах захтнуудын томоохон орогнол гэдгээрээ алдартай. 5.4 сая хүн амтай тус газар авлига, албан тушаалын хэрэгт богдсон гаднын томчуудын “үүр” болж байгаа гэнэ. Жилийн олонх өдөрт нь хасах градусын хүйтэн заадаг Санкт-Петербуг ялтан шилжүүлэх гэрээгүй. Жишээлэхэд, FBI, АНУ-ын Батлан хамгаалах яам тэргүүтэй хэд хэдэн газар эрэн сурвалжлагдаж байгаа гэмт хэрэгтнийг Санкт-Петербургт байгаа гэх мэдээлэл авч, дотогшоо нэвтэрч шалгах, баривчлах зөвшөөрөл хүссэн ч тэр бүр амжилт олдоггүй аж.

-10 САЯ ХҮН АМТАЙ ТЯНЬЖИН-

Нийслэл Бээжин хотоос ердөө хоёрхон цагийн зайд оршдог Тяньжин хотыг олон гэмт хэрэгт холбогдсон цагаан захтан сонгосон гэнэ. Тяньжин нь 10 сая орчим хүн амтай боомт хот бөгөөд өдөр тутмын амьдрал, хүмүүсийн хөл хөдөлгөөн дийлдэхгүй байсаар өдөр өнгөрдөг. Гэхдээ тус хотыг сонгосон чинээлэг хүмүүсийг зугаацуулах, мөнгийг нь үрэхэд зориулсан олон зүйл байдаг гэх.

                    Тяньжин ялтан шилжүүлэх гэрээгүй гэдэг ч 2021 онд Мэн Ванжоу гэх “зартай” эмэгтэйг шилжүүлэн авахын тулд Канадын нэгэн дипломат ажилтныг шилжүүлсэн явдал болсон. Тухайлбал, 2021 оны наймдугаар сард Тяньжинд байсан Канадын дипломатч Майкл Спаворт Хятадын шүүхээс 11 жилийн хорих ял ногдуулсан байдаг. Харин үүнээс хойш удалгүй Канадад баривчлагдсан Хятадын “Huawei Technologies” компанийн санхүүгийн захирал Мэн Ванжоутай талууд ялтнаа шилжүүлсэн аж.