Үндэсний сэтгүүл зүй үүсэж хөгжсөний 110 жилийн ойг тохиолдуулан дэлхийн шилдэг хэвлэл мэдээллийн байгууллагуудын нэг “New York Times” сонин өглөөний шуурхай хурлаас эхлэн уншигчийн гарт сониноо хүргэх хүртэл хэрхэн ажилладаг талаарх сонирхолтой сурвалжилгыг хөрвүүлэн хүргэж байна.

-“НЬЮ-ЙОРК ТАЙМС” СОНИНЫ СЭТГҮҮЛЧ, УНШИГЧИД-

АНУ-ын Нью-Йорк хотод төвтэй 1851 онд байгуулагдсан дэлхийн хамгийн нөлөө бүхий хэвлэлүүдийн нэгт тооцогддог “Нью-Йорк Таймс” сонин 2000 гаруй сэтгүүлч, ажилтантай. “Нью-Йорк Таймс” сонины сэтгүүлчийн нэг жилд авах үндсэн цалин нь  79,882 ам.доллар байдаг. Харин бусад ажилтан, албан тушаалтнуудын нэг жилийн 43,606 ам.доллароос 223,553 ам.долларын цалин авдаг аж.

2022 оны байдлаар 170 гаруй жилийн түүхтэй “Нью-Йорк Таймс” сонины өдөр тутмын дугаарыг 831 мянган иргэн захиалан уншиж, 4.6 сая хэрэглэгч цахимаар захиалж байна. Уг салбарт ажиллаж байгаа олон улсын мэргэжилтнүүдийн хэлж байгаагаар цахим сэтгүүл зүйн үе гэгдэж буй технологийн зуунд “Нью-Йорк Таймс”-ын цаасан хэвлэл ч захиалга өндөр байгаа нь сонины үндсэн фонтоо сольсон нь асар их нөлөө үзүүлсэн гэнэ. “Нью-Йорк Таймс” сонины захиалагчид буурч, уналтад орж байх үед тус сонин “Times New Roman” үндсэн фонтоо “Georgia” болгон өөрчилсөн нь цаасан хэвлэл уншигчдад илүү амар, хялбар болсон аж.

-РЕДАКТОРУУДЫН ХУРАЛ 09:40 ЦАГААС ЭХЭЛДЭГ-

               “Нью-Йорк Таймс” сонины 2000 гаруй ажилтан ээлж ээлжээрээ бүтэн 24 цагийн турш ажилладаг. Ажлын өдрүүдэд сонины сэтгүүлч, ажилтнууд өглөөний 08:00 цагт ажилдаа ирж, өдрийн чухал сэдэв, санаагаа олно. Харин энэ үед буюу ажлын цаг эхэлснээс хойших дөрвөн цагийн дотор хоёр том хурал болдог нь редакторуудын уулзалт болон албаны дарга нарын хурал гэнэ.

09:40 цагт  “Нью-Йорк Таймс” сонины төв оффис дахь редакторууд АНУ-ын хотууд болон бусад орон суух редакторуудтай хурал зохион байгуулж, өдрийн онцлох сэдэв, санааг ярилцана. Харин редакторуудын уулзалт үргэлжилж байх үеэр буюу 10:00 цагаас  “Нью-Йорк Таймс”-ын албаны дарга нар албаны дотоод хурлаа явуулж, тус албаны хариуцаж авсан сэдвээр тухайн өдөр болох бүх үйл явдлаас нэгийг ч орхигдуулалгүй хуваан авч, хурал дуусахад сэтгүүлч, гэрэл зурагчид өөр өөрийн сэдвийн дагуу ажиллахаар оффисоо орхидог. 2000-аад оны үед “Нью-Йорк Таймс” сонины нэг албанд 10 хүн байхаар тогтож байсан ч, одоо цаг үеийн нөхцөл байдалтай холбоотойгоор зарим алба 40-100 хүнтэй байгаа гэнэ.

               Сэтгүүлч, гэрэл зурагчдыг сэдвийн ажлаа хийж байх үеэр үдээс хойш 16:00 цагт хамгийн чухал хурал болох аж. “Нью-Йорк Таймс” сонины ерөнхий эрхлэгч том хурлын танхимын ширээг тэргүүлж суугаад төв оффист ажилладаг 30 редактораа тойруулан суулгаад маргааш өглөө нь уншигчдын гарт хүрэх шинэ сониныхоо үндсэн сэдэв, голлох зургийг хэлэлцэх юм. Өдөр тутамд хэвлэгдэж, уншигчдын гарт хүрэх сонин 16 нүүртэй байх бөгөөд бүтэц нь гол нүүр, дотоод мэдээний найм, гадаад мэдээллийн долоон нүүртэй байна. Гол хурал дууссаны дараа редактор бүр дороо хариуцсан албанаасаа онцлох нийтлэл, сурвалжилга, ярилцлага, мэдээг шигшиж, маргаашийн дугаартаа бэлтгэх аж. Ийнхүү сонины редактор, алба болгон ажилдаа орж, сонины эхийг 21:00 цагт бэлэн болгосон байх юм. Харин үүнээс хойших ажлыг нь “цус сорогчид” гэж өөрсдөө нэрлэдэг шөнийн ээлжийнхэн гүйцэлдүүлдэг.

-“НЬЮ-ЙОРК ТАЙМС” ШӨНИЙН ЭЭЛЖИНДЭЭ 350 ГАРУЙ ХҮН АЖИЛЛУУЛЖ, НЭГ ШӨНӨ 3000 ХАВТАН АШИГЛАДАГ-

“Нью-Йорк Таймс” сонины шөнийн ээлжид 350 гаруй ажилтан ажиллана. Шөнийн ээлжид гарч байгаа ажилтнууд нэг ээлжид гарсан бол дараагийн шөнө нь амраад хоёр өдрийн дараа нь дахин гарах журамтай ажилладаг гэнэ.

               “Нью-Йорк Таймс” сонин дугаарыг хэвлэхэд нэг шөнийн дотор 3000 хавтан ашигладаг ажээ. 3000 хавтангаа цагт 80 мянган цаас хэвлэх чадалтай төхөөрөмжид хийж, шөнийн турш ажиллуулдаг. Сонины цаасан хэвлэлийг үйлдвэрлэж байх энэ үед их хэмжээ чимээ гарч, децибелийн түвшин 87-д хүрдэг. Тус үйлдвэрт удаан ажиллавал сонсголоо алдах өндөр эрсдэлтэй тул цаасан хэвлэл хариуцаж ажилладаг ажилтнууд өндөр цалин авч, эрт тэтгэвэртээ гардаг гэнэ.

Ийн цаасан хэвлэлийн үйлдвэрлэл дуусах үед түгээлт, хүргэлтийг хариуцсан хэдэн зуун ажилтан 03:25 цагаас өмнө түгээлтийн машинд ачих ётой. Сонины түгээлтийн машин тус бүр дотроо найман тавиуртай бөгөөд тавиуруудад нийт 14 мянган ширхэг “Нью-Йорк Таймс” сонины нэг өдрийн дугаар багтах юм. Харин чиргүүлтэй түгээлтийн машинд 50 мянган сонины дугаар багтдаг гэх. Түгээлтийн машин үйлдвэрээс хөдөлснөөс хойш машин тус бүрийг 30-40 хүргэгч хариуцаж, өглөөний 06:00 цагаас өмнө урьтаж, захиалагчдадаа шинэхэн сонины дугаараа хүргэж өгснөөр “Нью-Йорк Таймс” сонины 24 цагийн ажил бүтэх аж.