Турк, Сирийн хилийн бүс нутагт 7.8 магнитудын хүчтэй газар хөдөлснөөс хойш дөрвөн өдөр өнгөрч байна. Энэ хугацаанд дээрх хоёр орны болон олон улсын эрэн хайх, аврах баг, хүчин газар хөдлөлтийн бүсэд аврах ажиллагаа зохион байгуулж, нурангинаас иргэдийн аварч, амиа алдсан иргэдийг албан ёсоор бүртгэж байгаа. Тэгвэл газар хөдлөлт, нурангид дарагдсаны улмаас амиа алдсан хүний тоо албан ёсоор 20 мянгад хүрснийг “BBC” агентлаг мэдээлэв. Сирийн Хүний эрхийн байгууллагын мэдэгдсэнээр тус улсад 3200 орчим хүн амиа алдаад байгаа бол Ерөнхийлөгч Режеп Тайип Эрдоган Туркт амиа алдсан хүний тоо 16,500 давсныг мэдэгджээ. Турк, Сирийн хилийн бүсэд газар хөдлөлтийн анхны чичирхийлэл орон нутгийн цагаар хоёрдугаар сарын 6-ны 04:00 цаг орчимд мэдрэгдсэн бөгөөд түүнээс хойш давтан 14 удаа чичирхийлсэн аж. Хүчтэй чичирхийллийн улмаас Туркийн хилтэй ойр оршдог хотууд гамшигт нэрвэгдэв. Үүнтэй холбоотойгоор газар хөдлөлт болон нурангид дарагдаж, амиа алдсан, бэртэж, гэмтсэн алдартнуудын тухай хүргэж байна.

Туркийн Парламентын гишүүн ЯКУП ТАШ

БНТУ-ын Парламент болон эрх баригч Шударга ёс, хөгжлийн намын гишүүн Якуп Таш Адьяман мужид болсон газар хөдлөлтийн улмаас нурангид дарагдан амиа алджээ. Тэрээр 1959 оны зургадугаар сарын 16-нд Адьяман мужид төрж, төрөлх мужаасаа 27 удаа Шударга ёс, хөгжлийн намын депутатаар сонгогдож, 2018 оны сонгуулиар Парламентын гишүүнээр сонгогдон ажиллаж байсан аж. Якуп Таш нь эхнэр, зургаан хүүхэдтэй бөгөөд холбогдох албанаас гэр бүлийнхэн нь аюулгүйг байгааг мэдэгдээд байна.

Английн хөл бөмбөгийн “Челси” клубын довтлогч асан КРИСТИАН АЦУ

Гана гаралтай, Английн хөл бөмбөгийн “Челси” клубын довтлогч асан Кристиан Ацу Туркт болсон газар хөдлөлтөд өртөж, нурангид дарагджээ. Кристиан Ацу Гана Улсынхаа шигшээ багийн төлөө 65 тоглолтод оролцож, Английн хөл бөмбөгийн “Ньюкасл” клубт 107 тоглолтод орсныхоо дараа “Челси”, “Эвертон”, “Борнмут” клубын төлөө тоглож байгаад өнгөрсөн оны дөрөвдүгээр улирлаас эхлэн Туркийн “Хатайспор” клубын төлөө тоглох болсон. Хөл бөмбөгчийг нурангид дарагдсан талаар түүний одоогийн харьяалагдаж буй “Хатайспор” клубын менежер Волкан Демирел мэдэгдсэн. Тэгвэл нурангид дарагдсан хөл бөмбөгийн нэр тоглогчийг аварсан талаар Туркийн Онцгой байдлын албанаас мэдэгдсэн. Гэвч Кристиан Ацугийн агент хаана байгаа нь мэдээгүй талаараа мэдээлсэн нь олны анхаарлыг татсан. Харин уг мэдээлэлд Туркийн холбогдох байгууллагаас залруулга хийж, хөл бөмбөгч Кристиан Ацуг аварсан, биеийн байдал нь хэвийн байгаа талаар мэдэгдсэн юм.

И-спортын од ГИЗЕМ ХАРМАНКАЯ

Туркт орон нутгийн цагаар хоёрдугаар сарын 6-ны даваа гарагт болсон 7.8 магнитудын хүчтэй газар хөдлөлтийн улмаас тул улсын и-спортын од “Luie” хочит Гизем Харманкая амиа алдсан талаар түүний хуучин и-спортын багийн хамтрагч цахим хуудсаараа дамжуулан мэдэгджээ. “Luie” Гизем нь и-спортын төрөлд “Valorant” видео тоглоомын мэргэжлийн тамирчин бөгөөд олон улсын “Valorant Game Changers” тэмцээнд оролцож, чамгүй амжилт үзүүлсэн байдаг. Гиземийн амиа алдсанд “Valorant” видео тоглоомын үүсгэн байгуулагчдаас албан ёсны цахим хуудсаараа дамжуулан эмгэнэл илэрхийлжээ.

Чөлөөт бөхийн олимпын аварга ТАХА АКГУЛЬ болон олон улсын чөлөөтийн бөхчүүд

Туркийн Кахраманмараш мужийн спортын ордон нурангид дарагдаж, тус газарт болох байсан чөлөөт бөхийн тэмцээнд оролцохоор очсон олон улсын бөхчүүд амиа алдаж, гацсан талаар олимпын аварга Таха Акгуль цахим хуудсаараа дамжуулан мэдэгдсэн. Цахим хуудсаар дамжуулсан мэдээллийн дагуу Туркийн эрэн хайх, аврах баг ажиллагаа явуулж, Франц, Косово, Узбекистаны бөхчүүдийг аюулгүй газарт хүргэжээ. Гэвч энэ сайн мэдээний зэрэгцээ нурангид дарагсдсан спортын ордноос Туркийн долоон бөхийн цогсныг гарган авсан байна. Одоогийн байдлаар холбогдох албанаас амиа алдсан долоон бөхийн нэрийг зарлаагүй байгаа юм.