• Өнөөдөр 2024-03-28

“ДАВОС-2023”: Дэлхийн эдийн засгийн “дайн” эхэллээ

2023-01-19,   404

Дэлхийн эдийн засгийн чуулган 53 дахь удаагаа Швейцарийн Давос хотод эхэлсэн. Энэ удаагийн чуулган "Хуваагдаж байгаа дэлхий, хамтарч байгаа ертөнц" сэдвийн хүрээнд болж байгаа бөгөөд цар тахал, үнийн өсөлт, эрчим хүч, геополитикийн зөрчилдөөнийг шийдвэрлэх арга зам хайж, дэлхийн эдийг засгийг сэргээх арга замыг олохоор хэлэлцэх юм.

                      "Давос-2023" эдийн засгийн чуулга уулзалтад олон улсын Засгийн газар, олон улсын байгууллагын 370 гаруй төлөөлөгч, 56 Сангийн сайд, 19 Төв банкны тэргүүн, 30 Худалдааны сайд, 36 Гадаад хэргийн сайд, бизнесийн салбарын 1500 гаруй төлөөлөгч оролцож байна. Уулзалт эхлэхээс өмнө уригдаж ирсэн төлөөлөгчдийн аюулгүй байдлыг хангах үүднээс 5000 хүртэлх тооны хууль хүчний албан хаагчийг дайчлан ажиллахаа мэдэгдсэн. Тэгвэл уулзалтад оролцож буй хэвлэлийнхний мэдээлснээр цагдаа, цэргийнхэн Давос хотоос орох, гарах бүр замыг хааж, хүн бүрийн бичиг баримт, хурууны хээг шалгаж байгаа аж.

-ОЙРЫН ХОЁР ЖИЛД АМЬЖИРГААНЫ ӨРТГИЙН ХЯМРАЛ НҮҮРЛЭХ ЭРСДЭЛТЭЙ-

"Давос-2023" эдийн засгийн чуулга уулзалт олон улсын Засгийн газар, бизнесийн салбарын төлөөлөгчдийн зэрэгцээ дэлхийн нөлөө бүхий 200 гаруй тэрбумтныг оролцуулснаараа онцлог болжээ.

Тэгвэл чуулгын эхний хоёр өдрийн уулзалтад тэрбумтнуудын клуб дэлхийн хүн амын орлогын хэт ялгаатай байдлыг буруулахад санал нэгдэж, хөрөнгөтэй хүмүүсээс илүү өндөр татвар авах нь зүйтэй гэсэн уриалга гаргасан байна.

                         Харин Олон улсын валютын сангийн захирал Кристалина Георгива, Европын төв банкны ерөнхийлөгч Кристин Лагард зэрэг албаны төлөөлөгч энэ удаагийн чуулга уулзалтын гол сэдэв дэлхийн эдийн засгийн удаашрал байхыг онцолжээ. Цар тахлын сөрөг нөлөө, ОХУ, Украины дайнаас үүдэлтэй геополитикийн зөрчилдөөн нь дэлхийн даяар эрчим хүч, хүнсний үнийн хөөрөгдөл үүсгэхээс гадна Америк, Европ тивд инфляц өндөр байгаа нь эдийн засгийн гол хүндрэл болоод байгаа юм. Энэ тухай Олон улсын валютын сангийн захирал Кристалина Георгива ойрын хоёр жилд олон улсад амьжиргааны өртгийн хямрал нүүрлэх эрсдэлтэйг анхааруулж, дэлхийн даяар дахин худалдааны салбарыг бэхжүүлж, эмзэг бүлгийн орнуудын өрийн асуудлыг шийдвэрлэх, уур амьсгалын өөрчлөлтийн эсрэг яаралтай арга хэмжээ хэрэгжүүлэхийг уриалав.

-"ДАВОС-2023"-Т ХЭН ЮУ ХЭЛЭВ-

                   Дэлхийн эдийн засгийн чуулга уулзалтын эхний хоёр өдрийн хурлын хэд хэдэн орон Украинд цэргийн тусламж үзүүлэхээ мэдэгдсэний нэг нь Польш. Хэдэн өдрийн өмнө Их Британи Украинд "Apache" загварын нисдэг тэрэг, "Challenger-2" загварын байлдааны танк нийлүүлсэн. Харин Польш Улс "Давос-2023" чуулга уулзалтын үеэр Украинд 14 нэг "Леопард-2" загварын танз илгээхээ мэдэгдсэн юм. Мөн Польшийн Ерөнхий сайд Матеуш Моравецкий Рамштейнд Олон улсын танкийн эсвэл байгуулж, Украинд  100 нэг "Леопард-2" танк илгээх шийдвэр гарах боломжтой талаар мэдээлэв. Харин Украинд цэрэг, зэвсгийн тусламж үзүүлэхээс мэдэгдлээс гадна хурлын хоёр өдөрт НҮБ-ын Ерөнхий нарийн бичгийн дарга Антонио Гутерреш, Украин Улсын тэргүүн хатагтай Олена Зеленска нарын тавьсан илтгэл дэлхийн дахины анхаарлыг татсан юм.

Украины тэргүүн хатагтай ОЛЕНА ЗЕЛЕНСКА:

Бидний ойлгож байгаагаар хоёр орны эвлэрэл энх тайвантай тэнцэхгүй. Дэлхийн өнцөг, булан бүрд тарсан манай ард түмэн эх орондоо эргэж ирэх, дайны фронтод тулалдаж, гэр бүлээсээ хагацсан аавууд дахин гэр бүлээ нэгтгэх боломжийг нээж байж л энх тайвныг олно.

НҮБ-ын Ерөнхий нарийн бичгийн дарга АНТОНИО ГУТЕРРЕШ:

Одоогийн дэлхийн геополитикийн нөхцөл байдал миний амьдралаа харж байснаас илүү ярвигтай нөхцөлд хүрлээ. Миний бодлоор хүйтэн дайны үеийн геополитикийн хуваагдал одоогийнхоос арай дээр байжээ. Хүн төрөлхтөнд одоо хурцадмал байдлыг намжаах арга замгүй үед сөргөлдөөн илүү аюултай болно.

-ЭДИЙН ЗАСГИЙН ЧУУЛГА УУЛЗАЛТ ДАХЬ УЛС ТӨРИЙН НӨХЦӨЛ БАЙДАЛ-

                   "Давос-2023"-ын эхний хоёр өдрийн хурал ОХУ, Украины асуудлыг голчлон анхаарч байгааг шүүмжлэгчид буруушааж байна. Тухайлбал, Украиныг дайны гол хохирогчоор авч үзэн ОХУ-ын талаар тус улсын төлөөлөгчгүйгээр хэлэлцсэнийг шүүмжилж байгаа юм. Америкийн "PBS" телевизийн үзэж байгаагаар дэлхийн эдийн засгийн чуулга уулзалт дуусахад хуралд оролцсон төлөөлөгч болон дэлхийн удирдагчдад хариуцлага тооцохыг шаардсан идэвхтнүүдийн жагсаал болж болзошгүй гэнэ. Харин энэ асуудалд "Давос-2023" дэлхийн эдийн засгийн чуулга уулзалтын ерөнхийлөгч Борге Бренде "Үүнээс илүү чухал нь ногоон хөтөлбөрийг хэлэлцэхдээ ирээдүйд дэлхийг хэрхэн хөдөлж, эдийн засгийг дээшлүүлэх тохиролцоо хийх явдал юм" хэмээжээ.

 
 

“ДАВОС-2023”: Дэлхийн эдийн засгийн “дайн” эхэллээ
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188