Хар тэнгисээр дамжуулж Украины үр тариаг экспортод гаргах хэлцлийг сэргээхээр Оросын тал зөвшөөрсөн тухай Туркийн Ерөнхийлөгч Режеп Тайип Эрдоган мэдэгдсэн байна. Оросын Батлан хамгаалахын сайд Сергей Шойгу лхагва гарагт өөрийнх нь улсын Батлан хамгаалахын сайдтай холбогдож, Москва үр тарианы экспортыг хэвээр үргэлжлүүлэх болно гэж мэдэгдсэнийг Режеп Тайип Эрдоган мэдээлжээ.

      Өөрийг нь Ерөнхийлөгч Владимир Путинтай утсаар ярьж хэлэлцээ хийсний дараа Оросын сайд Сергей Шойгу улсынх нь Батлан хамгаалахын сайд Хулус Акартай утсаар ярьж энэ тухай мэдэгдсэнийг Режеп Тайип Эрдоган дурджээ. Туркийн Ерөнхийлөгч тэрчлэн, экспортод гарсан үр тарианы дийлэнх хувь нь чинээлэг орнууд руу гарч байна гэдэг Оросын зовнилыг дурдаж, одооноос нийлүүлэлтэд Африкийн орнууд голчлох болно гэсэн байна. Москва мөн үр тарианы экспортын хэлэлцээрт оролцохоо зогсоосон шийдвэрээсээ буцсан гэдгээ нотоллоо. “ОХУ одоо авсан баталгааг хангалттай гэж үзсэнээр хэлэлцээрийн хэрэгжилтийг сэргээж байна” гэж БХЯ-ных нь мэдэгдэлд өгүүлсэн байна.

      Өнгөрөгч бямба гарагт Хар тэнгисийн флот руу нь халдсан хэрэг явдлаас үүдэн Орос улс НҮБ болон Туркийн зуучлалтай олон улсын хэлэлцээрт оролцохоо зогсооно гэж мэдэгдээд байсан. Хэлэлцээрт Москваг эргэн нэгдсэнд хүнс нийлүүлэлтийн энэ амин чухал гарц нээлттэй үлдэж байгаад НҮБ-ын ЕНБД Антонио Гутерреш баяр хүргэжээ. Тэрчлэн НҮБ-ын Хүмүүнлэгийн асуудал эрхэлсэн зохицуулагч Мартин Гриффитс даваа гарагт Украинаас үр тарианы санаачилга хэлэлцээрийн хүрээнд тээвэрлэгдсэн нийт ачааны 23 хувь нь дундаас доош болон доогуур орлоготой орнууд руу хүргэгдсэн, мөн улаанбуудайн тээвэрлэлтийн 49 хувийг ийм орнууд хүлээж авсан гэж мэдэгдсэн.

     Үүнээс гадна Оросын Ерөнхийлөгч Владимир Путин Украин аюулгүй байдлын баталгааг дахин зөрчих нөхцөлд тус улс үр тарианы хэлцлээс бүрмөсөн гарах эрхтэйг сануулсан байна. Орос лхагва гарагаас хэлэлцээрийг эргэн дагаж мөрдөх болсон тухай гаргасан мэдэгдэлд Владимир Путин, энэ мэт аливаа эргэж буцах тохиолдолд Турк руу үр тариа гаргах экспортод нөлөөлөхгүй гэдгийг амлажээ. Турк улсын төвийг сахисан байр суурь, зуучлагчийн хувиар гаргаж байгаа хүчин чармайлтыг үүний шалтгаан гэж тэр дурджээ. Украины Ерөнхийлөгч Володимир Зеленский мөн үр тарианы хэлцлийг сахин хамгаалахад хүчин туслалцаж, басхүү Украин улсын тусгаар эрх, нутаг дэвсгэрийн бүрэн бүтэн байдлыг дэмжиж байгаа Режеп Тайип Эрдоган Ерөнхийлөгчид талархал илэрхийлсэн гэдгээ мэдэгджээ. Украин, Орос хоёр улаанбуудай, арвай, наранцэцгийн тос болон бусад хүнсний бүтээгдэхүүний дэлхийд томоохон нийлүүлэгч орнууд. Үр тарианы хэлцэл байгуулагдахаас өмнө хангамж нийлүүлэлт тасарснаас эдгээр бүтээгдэхүүний үнэ дэлхийн зах зээлд өсч, эрчим хүчний үнийн хөөрөгдлийг дагуулан хэдэн арван сая хүнийг ядууралд хөтөлжээ.

       НҮБ-ын мэдээгээр, энэ оны гуравдугаар сард 15 хувьд туйлдаа хүртэл өсөөд байсан хүнсний үнэ долоодугаар сард хэлэлцээр байгуулагдсанаар 15 орчим хувиар буурсан байна. Мөн Оросыг эргээд энэхүү хэлцэлд нэгдсэн тухай лхагва гарагийн мэдээний дараа Чикагогийн бирж дээр өсч эхлээд байсан улаанбуудайн захиалга худалдааны үнэ 6 гаруй хувиар унасан мэдээтэй байна.