Евроазийг хурцадмал байдалд шилжүүлээд байсан ОХУ-Украин, БНХАУ-Тайваний нөхцөл байдал зогсонги байдалд орсон талаар олон улсын шинжээчид хэлж байна. Зүүн Европт өрнөсөн Донбассын төлөөх дайнд их хэмжээний зардал гаргасан ОХУ цэргийн хүч, дайралтаа тодорхойгүй хугацаагаар зогсоосон бол Украины талаас хүлээлтийн байдалтай байгаа бөгөөд гаднын цэрэг, техникийн тусламж авсан хэвээр байгаа юм. Харин “Азид дайн болох вий” хэмээн олон улсын анхаарлын төвд ороод байсан БНХАУ, Тайваний асуудал “хөшиг”-ний ард, эдийн засаг, зах зээлийн түвшинд үргэлжилж байгаа гэнэ.

БНХАУ, ТАЙВАНЬ

Тайваний тал Хятадын сөнөөгч онгоцууд Тайванийн хоолойг гаталж байгаа тухай бүх мэдээлэл худал болохыг баталжээ

БНХАУ, Тайваний асуудал олон улсын анхааралд өртөж, АНУ-ын Конгрессын Төлөөлөгчдийн танхимын тэргүүн Нэнси Пелоси Тайваньд айлчлах үеэр БНХАУ-ын хэвлэлүүд Хятадын сөнөөгч онгоцууд Тайванийн хоолойг гаталж байх тухай мэдээлэл цацсан. Тухайн үед сөнөөгч онгоц хоолойг давсан, эргүүл хийж байгаа гэх мэдээлэл олон өдрийн турш дараалан цацагдаж байв. Тэгвэл БНХАУ-ын хэвлэлүүдийн түгээж байсан мэдээлэл нь ор, үндэсгүй ташаа мэдээлэл болохыг Тайваний талаас баталжээ.

​                   Энэ талаар Тайваний “Taiwan News” мэдээллийн сайтад “Нийгмийн сүлжээгээр цацагдсан, тэр дундаа БНХАУ-ын “CGTN” агентлагийн мэдээлэл нь худал” гэж мэдэгдсэн байна. Харин Тайваний Батлан хамгаалах яамнаас “Хятадын хэвлэл мэдээллээр цацагдсан Тайванийн хоолойгоор сөнөөгч онгоцууд нэвтэрсэн тухай мэдээлэл нь үнэн биш болно” гэжээ.

БНХАУ-ын түрэмгийллийг тодорхой шалтгаан, шаардлагатай байх ёстой гэж шүүмжилж байна

БНХАУ-ын дарга Ши Жиньпин улс төрийн замналдаа АНУ-тай таарамжгүй харилцаатай байдгийг олон улс шүүмжилдэг. Харин нөгөө талаас АНУ нь Тайваньтай олон арван жилийн турш стратегийн тодорхой бус бодлогоор хамтран ажиллаж, дэмжлэг үзүүлж ирсэн гэдэг. АНУ-ын урьд өмнөх төрийн тэргүүнүүд БНХАУ-ын бодлого, төлөвлөгөөнөөс зайлсхийх, хурцадмал байдал үүсгэхгүй байхаас сэргийлж, тэнцвэрийг хадгалж ирсэн гэж улс төр судлаачид үздэг аж. Харин өнөөгийн АНУ-ын Ерөнхийлөгч Жо Байден тус бодлогын эсрэг зогсож, “Хэрэв БНХАУ Тайвань руу дайралт хийвэл АНУ-аас Тайваньд дэмжлэг үзүүлж, хамгаалах болно” гэдгээ хэд хэдэн удаа мэдэгдсэн.

​                   Цагаан ордны Гадаад харилцааны зөвлөлийн Ричард Хаас, Дэвид Сакс нарын шинжээч болон Конгрессын хэд хэдэн гишүүн Жо Байдены мэдэгдлийг сайшаасан байр сууриа мэдэгдээд байгаа. БНХАУ, Тайваний асуудалд Жо Байдены бүлэг “Хятад түрэмгийлэх тодорхой шалтгаан, шаардлагатай байх ёстой” гэсэн байр суурьт зогсож, шүүмжилж байна. Нөгөөтээгүүр Европын орны улс төр шинжээчид АНУ-ын болон Жо Байдены бүлгийн байр суурьтай санал нийлэхгүй, эсэргүүцэж байгаа юм.

“THE TELEGRAPH” СОНИН: Тайваниас үүдэлтэй АНУ, БНХАУ-ын сөргөлдөөн цэрэг, эдийн засгийн аймшигтай үр дагавар дагуулна

Лондонд төвтэй “The Telegraph” сонины тоймч Рожер Бутль дээрх асуудлаар бичсэн нийтлэлдээ БНХАУ, Тайваний асуудал бус, Тайваниас үүдэлтэй АНУ, БНХАУ-ын сөргөлдөөн эдийн засаг, зах зээлийг хямрал хүргэх талаар бичжээ. Тоймчийн онцолсноор, Тайваний бүс нутагт үйлдвэрлэдэг микро чипний үйлдвэрлэл зогсож болзошгүй нөхцөл байдал хүргэх гэнэ. Тэгвэл сүүлийн долоо хоногт ихэвчлэн БНХАУ, Тайваний бүс нутаг, компаниудын үйлдвэрлэдэг микро чипний эрэлт буурч, холбогдох зах зээлийн шугам зогсонги байдалд орсон байна.

​                   Түүнчлэн тоймч Рожер Бутлийн онцолсноор дэлхийн нийт бараа, бүтээгдэхүүний экспортын 15 хувь нь БНХАУ-д ногддог. Иймд, Тайваниас үүдэлтэй БНХАУ, АНУ-ын сөргөлдөөн цаашид даамжирвал дэлхий дахины нийлүүлэлтийн гинжин хэлхээ тасарч, зах зээл, эдийн засгийн “хар дарсан зүүд” эхлэх гэнэ.

ОХУ-УКРАИН

АНУ-аас Украинд гурван тэрбум ам.долларын зэвсгийн тусламж үзүүлэхээр болов

Өнгөрсөн лхагва гарагт АНУ-ын Ерөнхийлөгч Жо Байден Украинд зэвсгийн дэмжлэг үзүүлэхээ мэдэгдлээ. Албан ёсны мэдээллээр 2.98 тэрбум ам.доллартой тэнцэх хэмжээний зэвсэг, техникийг Украины аюулгүй байдлыг хангахад дэмжлэг үзүүлэхээр зорилгоор хандивлах юм байна.

Борис Жонсоны Украинд хийсэн гэнэтийн айлчлал

Украины Тусгаар тогтнолын өдрөөр нийслэл Киев хотод очсон онцлох зочин Их Британийн Ерөнхий сайд Борис Жонсон байлаа. Албан ёсны мэдэгдэл хийлгүйгээр Украинд айлчилсан Борис Жонсон цэргийн тусламж үзүүлэх гэнэ. Тухайлбал, цэргийн тусламжийн багцад суурин тосгонд ашиглах микро дрон, хуурай замын цэргийн техник зэрэг багтжээ. Уг тусламжийнхаа талаар Их Британийн Ерөнхий сайд Борис Жонсон “Энэхүү тусламжийн багц Украины зориг, тэсвэр тэвчээр, чадавхийг нэмэгдүүлж, Оросын талыг ухраах, эрх чөлөөнийхөө тэмцэх боломжийг олгоно гэж найдаж байна” гэсэн байна.