БНХАУ-ын талаас Тайвань Улсын хилийн бүс орчимд цэргийн тусгай бэлтгэл хийж байгаатай холбоотойгоор эхэлсэн хоёр орны харилцааны хурцадмал байдал олон улсад нөлөөлж байна.

-“ДАЙНЫ ШОУ” БУЮУ УЛС ТӨРИЙН ТОГЛООМ-

Шинж чанарын хувьд Нэнси Пелосигийн Тайваньд хийсэн айлчлал маргаан дагуулсан дайны хэмжээнд хүргэхгүй гэнэ. Тухайлбал, Пелоси болон Цагаан ордон, Төрийн департамент Тайвань дахь айлчлалын талаарх үг хэллэгийг ихээхэн анхаарч АНУ “нэг хятад бодлого”-ыг баримталдаг гэдгийг удаа дараа хэлж байв. Мөн Ази тивд айлчлах дөрвөн улсдаа Тайванийг оруулж хэлээгүй нь БНХАУ-ыг хэт өдөөн хатгахаас болгоомж байгааг харуулж байгаа юм. АНУ Пелосигийн Тайваньд хийсэн айлчлалыг “албан бус айлчлал” гэж байгаа. Энэ нөхцөлд БНХАУ дайн хийх хэмжээний эрсдэлтэй алхам хийхгүй гэсэн хүлээлттэй байгаа аж.

Өөрөөр хэлбэл дэлхий дахиныг түгшээж буй БНХАУ, Тайваний асуудал илүү хурцдаж, дайны нөхцөл байдал шилжилгүй бусад улс төрийн “шоу”-ны адил дуусах гэнэ. Бүр Тайваниар айлчилсан АНУ-ын Конгрессын Төлөөлөгчдийн танхимын дарга Нэнси Пелоси БНСУ руу очтол тус улсын Ерөнхийлөгч Юн Сук Ёл хүлээж ч аваагүй аж.

БНХАУ: ТАЙВАНЬД ТУСАЛБАЛ МАНАЙ ДАРААГИЙН БАЙ БОЛНО

БНХАУ-ын талаас хийсэн анхааруулгыг сөрж, АНУ-ын Конгрессын Төлөөлөгчдийн танхимын дарга Нэнси Пелоси Тайваньд айлчилсан. Тэгвэл дахин ийм үйлдэл гаргахгүй байх асуудлаар буюу “Тайваний талд тусалбал манай дараагийн бай болно” гэж БНХАУ-ын Батлан хамгаалах яамны хэвлэлийн төлөөлөгч мэдэгджээ.

-ОХУ ТАЙВАНИЙ АСУУДАЛД БНХАУ-ЫГ ДЭМЖИНЭ ГЭВ-

Өнгөрсөн долоо хоногт БНХАУ-ын дарга Ши Жиньпин АНУ-ын Ерөнхийлөгч Жо Байдентай утсаар ярьж, Тайванийн асуудалд хүчтэй нөлөө оруулахгүй байхыг анхааруулсан. Гэсэн ч уг уулзалтыг дараа буюу өнөөдөр АНУ-ын Төлөөлөгчдийн танхимын дарга Нэнси Пелоси Тайвань руу айлчилсан нь өдөөн хатгасан үйлдэл болж байгаа талаар албаны эх сурвалжууд онцолж байгаа юм.

Тэгвэл АНУ-ын Төлөөлөгчдийн танхимын дарга Нэнси Пелоси Тайваньд газардсаны дараа ОХУ-аас албан мэдэгдэл хийсэн. Үүнд тус улсын Ерөнхийлөгч Владимир Путин “АНУ-ын өдөөн хатгасан үйлдлийн эсрэг БНХАУ-ыг дэмжинэ” гэдгээ илэрхийлсэн байна.

-БНХАУ-ЫН ЦЭРГИЙН ХҮЧ ТАЙВАНИЙН ХООЛОЙ ОРЧИМ ХҮРЧ ОЧЖЭЭ-

БНХАУ-ын тэнгисийн цэргийн хөлөг онгоцууд өнөөдөр хоёр орныг тусгаарласан албан бус шугам гэгддэг Тайванийн хоолойг давжээ. Эх сурвалжийн мэдээллээр 10 орчим хөлөг байсан бөгөөд одоогоор тандалтын байдалтай байгаа аж.

Мөн Тайванийн хоолойн ойролцоох БНХАУ-ын Пинтан арлаар олон тооны цэргийн нисдэг тэрэг явж өнгөрч байгаа тухай зураг цахим сүлжээнд түгээд байгаа юм. Эх сурвалжийн мэдээллээр БНХАУ-ын байлдааны онгоцууд Тайванийн хоолойд хүрсэнтэй холбоотойгоор Тайванийн талын онгоцууд байлдааны бэлэн байдалд шилжсэн гэнэ.

-ТАЙВАНЬ АЮУЛГҮЙ БАЙДЛЫН ТҮВШНЭЭ ХОЁРДУГААР ЗЭРЭГЛЭЛД ШИЛЖҮҮЛЖ, ТҮРҮҮЛЖ ГАЛ НЭЭХГҮЙ БАЙХ ТУШААЛ ӨГЧЭЭ-

Тайванийн хоолой орчимд БНХАУ-ын байлдааны онгоцууд эргүүл хийж байсантай холбоотойгоор БНХАУ-ын дөрвөн байлдааны хөлөг хөөрсөн талаар “China Times” мэдээлжээ. 

Улмаар болж байгаа үйл явдалтай холбоотойгоор Тайваний эрх баригчид аюулгүй байдлын түвшнээ хоёрдугаар зэрэглэлд шилжүүлжээ. Ингэхдээ тагнуул, эргүүлд гарч байгаа алба хаагчдад түрүүлж гал нээхгүй байх тушаал өгсөн байна.