БНХАУ-ын цэргийн хүч Тайванийн хил орчимд цэргийн тусгай бэлтгэл хийж, нөхцөл байдал хурцадсантай холбоотойгоор АНУ-ын Төлөөлөгчдийн танхимын дарга Нэнси Пелоси Тайваньд айлчилж байна. Айлчлалыг хийхгүй байх тал дээр БНХАУ-ын удаа дараа анхааруулсан ч, ийн айлчлал хийж, хоёр орны хурцадмал байдалд гуравдагч орон оролцож байгаад бусад орон ч өөрийн байр сууриа илэрхийлж эхлэв. 

-АНУ-ЫН ТӨЛӨӨЛӨГЧДИЙН ТАНХИМЫН ДАРГА НЭНСИ ПЕЛОСИ ТАЙВАНЬД ГАЗАРДАЖ, БНХАУ-ЫН БАЙЛДААНЫ ОНГОЦУУД ХӨӨРӨВ- 

Агаарын цэргийн хүчнээр хамгаалуулж явсан Пелосиг Тайванийн Тайбэй хотын Соншан нисэх онгоцны буудалд Тайванийн Гадаад хэргийн сайд Жозеф Ву болон АНУ-ын Тайвань дахь дээд төлөөлөгч Сандра Оудкирк нар угтан авсан байна. Пелосиг газардсаны дараа АНУ-ын Конгрессоос “Манай төлөөлөгч Тайваньд айлчилж байгаа нь АНУ-аас Тайванийн ардчиллыг дэмжих амлалтаа хүндэтгэж байгаа явдал. Дэлхий дахинд дарангуйлал, ардчилал хоёрын аль нэгийг нь сонгох ёстой болоод байгаа хэцүү үед 23 сая хүн амтай Тайвань АНУ шиг эв санааны нэгдэлтэй байх нь чухал” гэсэн мэдэгдэл хийжээ.  

                 Мөн АНУ-ын Төлөөлөгчдийн танхимын дарга Нэнси Пелоси Тайваньд газардсанаас хойш БНХАУ-ын байлдааны онгоцууд хөөрсөн талаар эх сурвалж “Reuters” агентлагт мэдээлсэн аж.  

-ТАЙВАНЬ АЮУЛГҮЙ БАЙДЛЫН ТҮВШНЭЭ ХОЁРДУГААР ЗЭРЭГЛЭЛД ШИЛЖҮҮЛЖ, ТҮРҮҮЛЖ ГАЛ НЭЭХГҮЙ БАЙХ ТУШААЛ ӨГЧЭЭ- 

АНУ-ын Төлөөлөгчдийн танхимын дарга Нэнси Пелосиг Тайваньд газардахаас ердөө цагийн өмнө Тайванийн хоолой орчимд БНХАУ-ын байлдааны онгоцууд эргүүл хийж байсан талаар эх сурвалжууд мөн “Reuters” агентлагт мэдэгдсэн гэнэ. Харин “China Times”-ын мэдээллээр нөгөө талаас БНХАУ-ын дөрвөн байлдааны хөлөг хөөрсөн аж. 

                 Улмаар болж байгаа үйл явдалтай холбоотойгоор Тайваний эрх баригчид аюулгүй байдлын түвшнээ хоёрдугаар зэрэглэлд шилжүүлжээ. Ингэхдээ тагнуул, эргүүлд гарч байгаа алба хаагчдад түрүүлж гал нээхгүй байх тушаал өгсөн байна. 

-ОХУ ТАЙВАНИЙ АСУУДАЛД БНХАУ-ЫГ ДЭМЖИНЭ- 

Өнгөрсөн долоо хоногт БНХАУ-ын дарга Ши Жиньпин АНУ-ын Ерөнхийлөгч Жо Байдентай утсаар ярьж, Тайванийн асуудалд хүчтэй нөлөө оруулахгүй байхыг анхааруулсан. Гэсэн ч уг уулзалтыг дараа буюу өнөөдөр АНУ-ын Төлөөлөгчдийн танхимын дарга Нэнси Пелоси Тайвань руу айлчилж байгаа нь өдөөн хатгасан үйлдэл болж байгаа талаар албаны эх сурвалжууд онцолж байгаа юм. 

Тэгвэл АНУ-ын Төлөөлөгчдийн танхимын дарга Нэнси Пелоси Тайваньд газардсанаас хойш ОХУ-аас албан мэдэгдэл хийжээ. Үүнд тус улсын Ерөнхийлөгч Владимир Путин “АНУ-ын өдөөн хатгасан үйлдлийн эсрэг БНХАУ-ыг дэмжинэ” гэдгээ илэрхийлсэн аж. 

- “ДАЙНЫ ШОУ” БУЮУ УЛС ТӨРИЙН ТОГЛООМ- 

Шинж чанарын хувьд Нэнси Пелосигийн Тайваньд хийх айлчлал маргаан дагуулах ч дайн болох хэмжээнд хүргэхгүй гэнэ. Тухайлбал, Пелоси болон Цагаан ордон, Төрийн департамент Тайвань дахь айлчлалын талаарх үг хэллэгийг ихээхэн анхаарч АНУ “нэг хятад бодлого”-ыг баримталдаг гэдгийг удаа дараа хэлж байв. Мөн Ази тивд айлчлах дөрвөн улсдаа Тайванийг оруулж хэлээгүй нь БНХАУ-ыг хэт өдөөн хатгахаас болгоомж байгааг харуулж байгаа юм. АНУ Пелосигийн Тайваньд хийж буй айлчлалыг “албан бус айлчлал” гэж байгаа. Энэ нөхцөлд БНХАУ дайн хийх хэмжээний эрсдэлтэй алхам хийхгүй гэсэн хүлээлттэй байгаа аж. 

Өөрөөр хэлбэл дэлхий дахиныг түгшээж буй БНХАУ, Тайваний асуудал илүү хурцдаж, дайны нөхцөл байдал шилжилгүй бусад улс төрийн “шоу”-ны адил дуусах гэнэ.