Монгол Улсын Засгийн газрын ээлжит хуралдаанаас ирэх зургадугаар сарын 1-нээс БНСУ-ын иргэд 2024 оныг дуустал 90 хүртэлх хоног виз мэдүүлэхгүйгээр шууд нэвтрэх боломж бүрдэж байна.

               “Ковид-19” цар тахлын өмнө Монгол Улс жилд дунджаар БНСУ-ын 100 мянган жуулчныг хүлээж авдаг байв. 2019 онд нийт 577,300 гаднын жуулчин хүлээн авч, “Түүхэн дээд амжилт тогтоолоо” гэж БОАЖЯ-наас мэдээлж байлаа. Тэгвэл цар тахалтай холбоотойгоор “сураггүй” болсон аялал жуулчлалын салбарыг сэргээж, гаднын жуулчдыг олноор татах замаар эдийн засгаа сэргээх гэж байгаа алхмуудын нэг нь энэ болж байна.

Өнөөдрийн байдлаар Монгол Улс дэлхийн 62 улстай визийн шаардлагаас чөлөөлөх, энгийн паспорт эзэмшигч 25, дипломат болон албан паспорт эзэмшигч 37 улстай харилцан визгүй зорчих арга хэмжээ авчээ.

               Монгол Улсын эдийн засаг уул уурхайн салбараас орж ирэх экспортын орлогоос шууд хамааралтай. Гэвч БНХАУ-ын баримталж байгаа “ковид тэг” бодлоготой холбоотойгоор урд хөрш рүү гарах экспорт удааширч байна. Харин энэ үед аялал жуулчлалын салбарыг хөгжүүлэх нь “Зөвхөн уул уурхайн салбараас хамааралтай” гэгддэг эдийн засгаа төрөлжүүлэх боломжтой болж байгаа юм.

Өнгөрсөн 2021 оны есдүгээр сарын 10-нд Монгол Улсын Ерөнхийлөгч У.Хүрэлсүх БНСУ-ын Ерөнхийлөгч Мүн Жэ Ин нар цахимаар уулзалт зохион байгуулсан. Тус уулзалтын үеэр БНСУ-ын Ерөнхийлөгч Мүн Жэ Ин “БНСУ Монгол Улсын зургаа дахь стратегийн түнш боллоо” гэж мэдэгдсэн билээ.

Тэгвэл Монгол Улсын Засгийн газар БНСУ-аас ирэх жуулчдыг 90 хоногийн турш виз мэдүүлэхгүйгээр зорчих шийдвэр гаргасны дараа БНСУ-ын Засгийн газраас Монгол иргэдийг визгүй зорчуулах журмаа сэргээв. БНСУ 2002 оноос гаднын иргэд визгүй зорчих тогтолцоог нэвтрүүлж, БНСУ-ын Хууль зүйн яамнаас хориглосон 24 улсаас бусад дэлхийн бүх орны иргэд тус улсын аялал жуулчлалын төв болох Чежү арал руу 30 хоногийн турш визгүй зорчих боломжтой болсон. Гэвч цар тахалтай холбоотойгоор 2020 оны дөрөвдүгээр сарын 4-нөөс зогсоод байсан визгүй зорчих журмыг дахин сэргээж байгаа юм.

Гаднын орноос Монголд ирэх жуулчдын тоо. "Ковид-19" цар тахлаас өмнө.

БНСУ гаднаас иргэдийг тусгаарлах, вакцинжуулалтад хамрагдсан байх, олон нийтийн газар амны хаалт зүүх зэрэг бүх журмаа цуцалсан. Тус улсын Дотоод хэргийн сайд Жон Хэ Чеолын мэдэгдсэнээр “Гаднын орны иргэдийг визгүй зорчих журмыг сэргээж, аялал жуулчлалын зах зээлээ идэвхжүүлнэ” гэжээ. Өөрөөр хэлбэл, өмнө нь зөвхөн БНСУ-ын томоохон аялал жуулчлалын бүс гэгддэг байсан Чежү арал руу визгүй зорчдог байсан монголчууд одоо эх газрын Солонгос руу визгүй нэвтэрч, хоёр орон түншлэлийнхээ хүрээнд харилцан аялал жуулчлалын салбараа сэргээж, хөгжүүлэх гэнэ.