Цөмийн хэлэлцээрийн дүнд хүлээсэн үүргээ Иран биелүүлэхгүй байна гэсэн үндэслэлээр АНУ Тегеранд тавьсан хоригуудаа сэргээхээр болсон тухай Төрийн нарийн бичгийн дарга Майк Помпео мэдэгдлээ. НҮБ болон Европын холбооны эрх баригчид Вашингтоны энэ байр суурьтай санал нийлэхгүй байгаа юм. Одоогоос хоёр жилийн өмнө Вашингтон Тегераныг нууцаар цөмийн зэвсэг бүтээж байна гэсэн шалтгаанаар Ираны цөмийн хөтөлбөрийн асуудлаарх хэлэлцээрээс гарсан билээ. ХБНГУ, Их Британи, Францын Гадаад хэргийн сайд нарын үзэж буйгаар нэгэнт АНУ хэлэлцээрт оролцогч тал биш тул энэ асуудлаархориг арга хэмжээ авах хуульзүйн үндэслэл байхгүй гэж тэд үзэж буй. 

А.Меркель: НҮБ-ыг өөрчлөх хэрэгтэй 

НҮБ-ын 75 жилийн ойд зориулсан Ерөнхий ассамблейн хүндэтгэлийн чуулган болж байна. ХБНГУ-ын Канцлер Ангела Меркель чуулганы үеэр НҮБ-д өөрчлөлт хийх хэрэгтэй гэж үзэж буйгаа мэдэгдлээ. “Дэлхий нийтийг хамарсан, тулгамдсан асуудлыг шийдэхэд улс орны хил хязгаараас үл хамаарсан зөвшилцөл, хамтын ажиллагаа чухал байна” гэж тэрбээр онцолсон агаад чухал шийдвэр гаргах үед НҮБ-ын Аюулгүйн зөвлөлийн гишүүд олон тохиолдолд санал зөрөлддөг гэж мэдэгдсэн. НҮБ-ын цаашдын хөгжлийн төлөөх өөрчлөлтийг эхлүүлэхэд Герман оролцоход бэлэн гэдгийг тэрбээр мөн уламжиллаа. 

Аяллын тийзний үнийн 50 хувийг  буцаан олгоно 

Коронавирусийн улмаас хамгийн их хохирол хүлээсэн аялал жуулчлалын салбараа дэмжихийн тулд Аргентин Улсын  эрх баригчид арга хэмжээ авч эхэллээ. Энэ он дуустал дотоодын аяллын тийз худалдан авсан хүмүүст энэ зардлын хагасыг нь улсаас нөхөн олгохоор шийдвэрлэжээ. Ингэснээр иргэд эх орноороо аялаад, дараа нь аяллын тийзний үнийн дүнгийн 50 хувийг буцааж авах юм. Мөн бизнесийн байгууллага, компаниудад татвар хөнгөлөх, бага хүүтэй зээл олгох зэргээр дэмжлэг үзүүлэхээр шийдвэрлэжээ.