НҮБ-ын Ерөнхий Ассамблейн 79 дүгээр чуулганы 2025 оны зургадугаар сарын 3-ны өдрийн хуралдаанаар Монгол Улсын Ерөнхийлөгч У.Хүрэлсүхийн санаачилсан “Дэлхийн адууны өдрийн тухай” тогтоолыг албан ёсоор баталсан түүхэн үйл явдал болсон билээ. Уг тогтоолоор жил бүрийн  долдугаар сарын 11-ний өдрийг “Дэлхийн адууны өдөр” болгон тэмдэглэн өнгөрүүлэхээр шийдвэрлэсэн бөгөөд “Дэлхийн адууны өдөр”-ийг тохиолдуулан зохион байгуулах анхны олон улсын арга хэмжээг 2026 оны долдугаар сарын 11-13-ны өдрүүдэд Монгол Улсын нийслэл Улаанбаатар хот, Хүй долоон худагт зохион байгуулах юм.

     Энэхүү наадам нь Монголын адууны өв соёл, нүүдэлчин ахуй, ёс заншил, уламжлалт мэдлэг, адуутай холбоотой биет болон биет бус соёлын өвийг дэлхий дахинд сурталчлан таниулах, олон улсын соёлын солилцоог өргөжүүлэх, соёлын аялал жуулчлал, бүтээлч үйлдвэрлэлийн хөгжлийг дэмжих зорилготой юм. Мөн НҮБ-ын тогтоолд хамтран зохиогчоор нэгдсэн 55 улсын төр, засгийн төлөөлөл, олон улсын байгууллага, дипломат төлөөлөгчийн газар, адуу судлал, морин спорт, соёлын өвийн чиглэлээр үйл ажиллагаа явуулдаг байгууллага, эрдэмтэн, судлаачид болон гадаад, дотоодын жуулчдын өргөн оролцоог хангахаар ажиллаж байна.  НҮБ-аас баталсан энэхүү тогтоол нь хүн төрөлхтний хөгжил дэвшил, нүүдэлчин иргэншил, дэлхийн соёлын өвд адууны оруулсан үнэт хувь нэмрийг олон улсад таниулахын зэрэгцээ адуутай холбоотой өв соёл, уламжлал, мэдлэг, туршлагыг хадгалан хамгаалах, хойч үед өвлүүлэн үлдээх чиглэлээр улс орнуудын хамтын ажиллагааг өргөжүүлэхэд чухал ач холбогдолтой юм. Арга хэмжээний хүрээнд Монгол үндэстний адууны өв соёл, уламжлалыг илэрхийлэх дараах олон талт үйл ажиллагааг зохион байгуулна. Үүнд:

• Монгол угшлын хурдан морины уралдаан

• Сонгомол болон эрлийз адууны уралдаан

• Арван мянган морьтны парад

• Хүчит бөхийн барилдаан

• Морьт харвааны олон улсын тэмцээн

• Адууны тоног хэрэгсэл, эмээл, хазаар, арьс ширэн эдлэл, уламжлалт гар урлалын үзэсгэлэн

• Эмнэг сургах, морь уургалах, уурга болон ташуур шүүрэх зэрэг үндэсний уламжлалт тэмцээн

• Айраг фестиваль

• Адуутай холбоотой аман уламжлал, язгуур урлагийн тоглолт

• Монголын уламжлалт хоол хүнс, гар урлалын үзэсгэлэн, худалдаа

• Соёл, урлагийн тоглолт болон үндэсний өв соёлыг сурталчлах тусгай хөтөлбөрүүд

     Энэхүү олон улсын арга хэмжээ нь Монгол Улсын нүүдэлчин соёл иргэншлийн үнэт өвийг дэлхий дахинд таниулах, адуутай холбоотой өв соёлыг хадгалан хамгаалах, олон улсын хамтын ажиллагааг өргөжүүлэх, соёлын аялал жуулчлал, бүтээлч үйлдвэрлэлийн хөгжилд бодит хувь нэмэр оруулах ач холбогдолтой юм. Арга хэмжээг төр, хувийн хэвшил, олон улсын байгууллага, эрдэм шинжилгээний байгууллага, соёл, урлагийн байгууллага болон иргэдийн өргөн оролцоотойгоор зохион байгуулахаар бэлтгэл ажлыг ханган ажиллаж байна.