Б.ШИЖИРБОЛДЫН ТОДРОЛ

Д. Бямбасүрэн:
Соёл урлаг

2026-05-13, 1068

Түүний буруу гарын бүлэглэлийн босс, архаг хар тамхичин болсон хоёр ч дүрийг нь үзлээ. Хар тамхи байхгүй бол хором ч тэсэхээ больсон, түүнийг олж хэрэглэхийн төлөө юу ч хийхээс буцахгүй байж ядах нэгний дүрийг ямар чадварлаг бүтээгээ вэ.

“Хавтаст хэрэг-2” кинонд охидыг худалдаж, биеийг нь үнэлүүлдэг бүлэглэлийн боссын дүрийг мөн л хүйтэн, тийм нэг жийрхмээр зэвүүн гаргаж байсныг үзэгчидсанаж байгаа байх. Тэр характерыг “Ганц удаа гэж үгүй” киноны хар тамхичны дүрээс нь дахин үзсэн учир ээлжит соёл урлагийн бичвэртээ жүжигчин Б.Шижирболдыг онцлохыг зорилоо.

БҮЖИГ БОЛ ТҮҮНИЙ ХУВЬД БҮГДИЙН ЭХЛЭЛ

Б.Шижирболдын уран бүтээлийн он цагийг ухрааж, эхлэлийн цэг дээр сум заавал бүжиглэх дуртай, цэнгээнт бүжгийн тэмцээн, урлагийн үзлэгт алгасалгүй оролцдог хүү зогсож байх нь мэдээж. Учир нь, бүжиг түүний хувьд бүх л уран бүтээлийнх нь эхлэл, мөнхүү хамгийн том давуу тал нь. Бүжгийн ертөнцөд хөл тавьж, тэр дундаа орчин цагийн бүжгийн хөдөлгөөнөөр өөрийгөө илэрхийлж, чадварлаг бүжиглэж сурахын тулд түүнд сэтгэл зүрх, цаг заваа ч зориулж, өөрийгөө бэлтгэснээр нэг л мэдэхэд салшгүй нэгэн хэсэг нь болж, бүжиглэж, бүжиг зааж амьдрах болжээ. Үүнийг бид “Aimar4” продакшны хамтралаас нь мэдэх билээ. Тэд хамтдаа олон ч тоглолт, шоунд бүжиглэж, мөнхүү орчин цагийн бүжгийг хүмүүст зааж, тэр хэрээр өөрсдөө давхар хөгжиж, улам ч өөрсдийгөө дайчлан шахаж, өсгөн сайжруулж байсан. Энэ нь багийн гишүүн бүрийн амжилтын том суурь болж, өдгөө өөрсдийн замаар улам ч тодорцгоож байна. Үүний нэг нь Б.Шижирболд. Бүжиг бүгдийнх нь суурь болсон тэрбээр хэрхэн чадварлаг дуу уран бүтээлээ хийж, мөнхүү дүрүүд бүтээж байгааг ч үзэгчид харж буй.

Бүжиг түүнийг улам ч ихээр нээн задалж, өөрийнхөө чадвар нөөцийг мэдэх тусам дараагийн төрөл рүү хүч сорих, тэндээс өөрийгөө шинээр таних эрлийн эзэн болгожээ.

ӨӨР ӨНГӨ, ОНДОО ЭРЭЛХИЙЛЭЛ

Түүний өөрийгөө эрэх аяллын хамгийн амттай, мөнхүү сонирхолтой нь дуу. “Universe best songs-2014” наадмаар түүнтэй танилцаж, сэтгэлд дотно дуу хоолой, шинийг хайсан үзүүлбэрт нь дурлан үзэх үзэгчид өдгөө ч түүний номер нэг сонсогчид. Дуу, клипт тэр үргэлж өөр өнгө, ондоог эрэлхийлэгч байдаг. Үүнийг дууных нь дүрс, клип, дуулалтынх нь илэрхийлэлээс нь харж болно. Сэтгэлийнх нь дотор үргэлж оргилон байдаг дуулах хүсэл мөрөөдөл нь биелж, өдгөө хэдийнэ өөрийн гэсэн өнгө аястай уран бүтээлч болсон. Өөрөөсөө үргэлж шинийг эрж, нэхэж, сорилт бүхэнд бие, сэтгэлээ дайчлан, хичээх бүрдээ өсөн хөгжиж, дараагийн шат руу ахиж байдаг нь бүжиг, дуу алинаас нь ч илт байдаг.

Хичээл зүтгэл, тууштай зан, шантрашгүй итгэл гурав түүний дотор ямагт “нөхөрлөнө”.

МӨРӨӨДӨЛ ДҮҮРЭН “ХҮҮ”

Итгэл, зориг, мөрөөдөл дүүрэн залуугийн дүр түүнийх байдаг. “Тэнгэрийн продюсер”, “Бүхнээс дээгүүр” гээд үзэгчид андахгүй дээ. Дандаа л амьдрал, мөрөөдлийнхөө төлөө шаргуу тэмцэж, шантрашгүйгээр зүтгэж, алдартай дуучин, нэртэй бүжигчин, дэлхийн боксчин болж буй түүний дүрүүд. Амжилт амаргүй. Өөрөө өөртөө эзэн болж, цуцашгүйгээр зүтгэхгүй л бол тэр бүр оргилд нь хүрэх нь үгүй. Гэхдээ өөрт байгаа нөөц боломж, хүч чадал, авьяас билгээ дайчилж чадвал заавал оройд нь гарч чаддаг гэдгийг тэр “Амьдралын урт замд-2” киноны Хангалын дүрээр харуулсан. Хайраар өлгийдүүлж, дэмжиж, тэтгэж өсгөсөн хүүхэд ямархан өр зөөлөн, зөв хүн болдгийг ч энэ бүтээл бидэнд хэлж өгдөг. Амжилтын түүх ямагт сонирхолтой, амттай байдаг. Ингээд харахаар .Шижирболдын анхны дүрүүд амьдрал дээрх өөртэй нь төстэй, зорьсон, тэмүүлсэн, мөрөөдсөн бүхэндээ өөрийгөө бүрэн зориулж чаддаг, шат шатаар өсгөж, хөгжүүлж чаддаг дүрүүд юм байна. Үүгээрээ хүүхэд, залуусын итгэл, мөрөөдлийн гэрлийг асааж, тэдэнд дүрээрээ үлгэрлэгч юм байна, тэр. Мөрөөдөл мөнхийн сэдэв, хүсэл тэмүүлэл түүний гүйцэтгэгч, хичээл зүтгэл, хөдөлмөр бол байнгын үнэнч туслахууд.

Түүнчлэн Шижирээд “Хожлын нүүдэл”, “Эможи”, “Киносутра” зэрэг кинонд гаргасан өөр өнгийн дүрүүд ч бий. Дурлана, хайрлана. Адал явдал, дурсамж ч хөтөлнө.

ЭСРЭГ ТУСМАА СОНИРХОЛ ТАТАХ ДҮРҮҮДИЙНХ НЬ ТОДРОЛ

Дүр эсрэг байх тусмаа үзэгчдийн сонирхлыг татдаг. Баргийг нь ч тэгээд найруулагчид эсрэг дүрээр зогсоочихдоггүй. Монголын кино урлагт ч хүчирхийлэгч, алуурчин, босс, хар тамхичин, шоронгийн атаман болсон чадварлаг дүр олон бий. Харин залуу уран бүтээлчдээс цөөн байхын дотор түүний бүтээсэн дүрүүд анхаарал татаж байна. Эзэндээ мөнгө л олж өгч байвал юуг л бол юуг ч хийж, хүсвэл хүний амь хөнөөж, хэнийг ч хайрлахаа больсон үнэнч зүтгэгч гэж байдаг даа. Тийм нэг дүрийг, тэр тусмаа бүр хүйтэн цэвдэг, өршөөлгүй дарамтлагчийн дүрийг тэр “Хавтаст хэрэг” кинонд бүтээсэн.

Одоо ч өөрөөс нь айгаад хонгилын өрөөнд нуугдах охиныг хэрхэн олж, ямархнаар тарчлаан зовоож байсныг нь бодохоор айдас төрдөг. Эсрэг дүрд тэр ингэж эхлээд, хар тамхинд донтогчоор үргэлжилсэн.

Хар тамхичин хүн ямар байдаг, хяналтаа алдахаараа хүний ч аминд торохгүй хүрчихэж байгааг түүний дүр харуулсан. Байж ядталаа чичирч, салганаж, солиорч, юу ч хийхээс буцахгүй мансуурсан нэгнийг яг л үзүүлсэн. Эдгээр дүрээс нь харахад тэр кино урлагт ч, эсрэг дүрд ч яах аргагүй тодорч байгаа уран бүтээлч. Эсрэг дүрийн рингин дээр дороос өсөн томорч байгаа тамирчин. Одоо түүнд хүчтэй өрсөлдөгч болохын тулд улам илүү хичээх, дахиад өөрийг нь бүрэн сорих том тулаан л хэрэгтэй. Тодрол дөнгөж эхэлж байна. Бүр ч өөрийгөө дайчлах хэрэгтэй.

Б.ШИЖИРБОЛДЫН ТОДРОЛ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид