БҮТЭЭЛҮҮДЭЭРЭЭ "ШУУГИАН ТАРИГЧ"

Д. Бямбасүрэн:
Соёл урлаг

2026-04-30, 340

Д.Галбаяр найруулагчийг бүтээлээрээ “Шуугиан таригч” гэвэл тун зохихоор. Найруулсан кино бүрийнх нь аль нэг хэсэг, эсвэл дүр нь үзэгчдийн сэтгэлд үлддэг. “Шуугиан таригч” кинон дээр гэхэд гудамжны архичин эр унтаад сэрэхэд компаний захирал, тэрбумтан болсон байх бөгөөд энэ азтай нэгний дүрд тэр өөрөө тоглосон байдаг.

Түүний энэ дүр хөгжилтэй атлаа хүнд нэгийг бодогдуулахаар. Өөрийн сурсан дадсан, эвлэрч дассан амьдралаасаа өөр амьдрал руу ороход, хүн гэнэт нэр хүндтэй, их мөнгөтэй болоход хэрхэн хувирч болдгийг ч харж болохоор. Санаа нь сонирхолтой, дүрүүд нь ч чанартай чадварлаг тийм бүтээл. Галаа өөрөө найруулаад, гол дүрд нь тоглосон. Ийнхүү цаашлаад ярьвал тэр хайрыг их олон талаас нь харуулдаг найруулагч юм байна. Мэдээж нийгэмд тулгарч буй асуудлыг ч хөндөнө. Ингээд уншигч танд түүний бүтээлээс онцлон хүргэж байна.

“ХАЙРЫН РЕКОРД”

Ээдрээ, тэр дунд гаргаж буй хүний хөгжилтэй араншин, төөрөгдөл, тэр бүхний эцэст учирч буй хайр дурлал. Д.Галбаяр найруулагчийн бүтээлийн үйл явдал товчхондоо ийм байх бөгөөд тэр хэлэх санаа, киноныхоо агуулгыг үзэгчдэд хөнгөн байдлаар үзүүлдгээрээ онцлог аж. Тухайлбал, “Хайрын рекорд” киноны дүрүүдэд үл ойлголцол, бүтэлгүйтэл, асуудал тулгарч байгаа ч эцэсдээ бүх зүйл аз жаргалтайгаар, учир зүйгээ ололцон төгсөнө. Хайрын хамгийн гоё түүхийг тэр эхнээс нь дуустал ямар ч нэмэлт хачиргүйгээр алдаа, оноо, андуурал эндүүрэлтэй нь үзүүлчихээд сая нэг амарч жаргадаг нэгэн шиг. Харин сайхан хайрын түүхэд саатсан үзэгчид ч сэтгэл ханаж, уран бүтээлчийн дараагийн бүтээлийг хүлээнэ. Түүний эхнэр Т.Хулан ч энэ киног гол амилуулагч дүрийн нэг. Хөгжилтэй, гэгээлэг, ихэмсэг, зөөлөн дүрийг чадварлаг бүтээсэн. “Хайрын рекорд”-ын тухайд ийм байна. Энэ бол Галаагийн найруулсан хайрын тухай киноны нэг өнцөг, нэг илэрхийлэл мөн.

“НАМРЫН СИНДРОМ”

Мөн л хөгжилтэй байдал, бүтэлгүй үйл явдал. Гэсэн ч тэр дунд хайр оршиж, хайрын тухай өрнөнө. Сэргэлэн Батаа хоёр хөлбөмбөгт үнэн хоббитой. Үүнээсээ болж оюутны байрнаасаа хөөгдөнө. Ингээд л байрнаасаа хөөгдсөн хоёр хажуу өрөө хөлслөх мэргэн ухаан гаргана. Гэвч хоёр залууг гэртээ суулгах айл олдсонгүй. Сэргэлэн Батаа хоёр нэгэн худал түүх зохион нэгэн бүсгүйн хажуу өрөөнд амьдрахаар болсноор бүх зүйл эхэлнэ. Тэндээс адал явдал, хайр, үл ойлголцол, зөрчил төрнө. Гэхдээ хөнгөн атлаа хүн хүнээ хайрлах, залуу насны тухай гүнзгий ухаарлыг үзэгчдэд өгнө. Мөн л өөр нэгэн хайрыг тэр энэ бүтээлээрээ харуулна. Үзсэн нэг нь инээх атлаа хайрын тухай эргэцүүлнэ. Инээдмийн атлаа романтик бүтээл ингэж сэтгэл гэгэлзүүлж нэг, ухаан нэмж нэг хүнд очдог байх нь.

“МИНИЙ НУУЦ”

"Хувьсал” продакшнтай хамтарсан түүний найруулсан нэгэн бүтээл бол “Миний нууц” кино. Хүний амьдралд тэмцэх биш тэвчих ёстой үе бий гэх эшлэл дор эл бүтээлийн үйл явдал өрнөнө. Монголын томоохон группын эзэн Түшиг, түүний халамжит эхнэр Хандмаа нар Мөнхжин, Энхжин хэмээх хоёр хүүгийнхээ хамт амьдарна. Тансаг байшинд юугаар ч үл дутах баян чинээлэг, элэг бүтэн амьдрал дунд Хандмааг яагаад ч юм ганцаардлын сүүдэр дагана. Харин нэг л өдөр түүний амьдралд Алтангинж хэмээх залуухан эр гэнэт гарч ирснээр тэр сүүдэр нь үргэх мэт болж, тэдний хооронд ер бусын харилцаа үүснэ. Ганцаардсан амьдрал нь чухал уу, Алтангинж чухал уу гэсэн Хандмаагийн тоо томшгүй эргэлзээ ар араасаа хөвөрсөөр. Энэ үед түүний жинхэнэ амьдралын хань болох Түшиг түүнд маш том эргэлт авчирна. Энэ эргэлт юу байсан бол. Хором хормоор холдож буй эхнэрээ мэдрэх Түшиг энэ бүхэнтэй тэмцэж гарах уу, эсвэл тэвчиж үлдэх үү гэх асуултыг тавьсан бүтээл. Хайрын тухай бас л нэг өнцөг.

"ГЭР ДҮҮРЭН ОХИД”

Энэ кинонд тэрбээр нас насны дөрвөн охинтой ганц бие аавын дүрд тоглосон. Мөн л бүтэлгүй, хөгжилтэй, хэнэггүй нэгний дүр атлаа охиддоо бол хэр сайн, ямар мундаг аав вэ гэдгийг харж болохоор онцлогтой бүтээл. Аав, охидын хайрыг харуулсан. Хайр гэхээр зөвхөн учрал хайрын тухай биш ээж охид, аав, охидын хайрыг ч тэр харуулсан. Охид өөр өөр араншинтай. Нэг нь хичээлдээ сайн, үргэлж ном уншдаг байхад нөгөө нь гоёж гангалж гадуур зугаалах дуртай. Бас нэг нь амттай хоолонд дуртай ч байх нь бий. Энэ ч үүднээс охид юу хүсэж, аав нь тэднийг хэрхэн ойлгож, хүслийг нь биелүүлж байгааг адал явдал, хөгжилтэйгээр бид энэ бүтээлээс үзэх юм. Галаа бол тун сайн аав, ухаалаг нэгэн байж чаддаг бөгөөд олон ч аавд үлгэр болсон байх гэж бодож байна.

“ЭМЭГТЭЙН КЭЙС”

Түүнчлэн зөвхөн хайрын тухай өгүүлдэг гэвэл өрөөсгөл болно. Хайрыг олон талаас нь үзүүлдэг шигээ нийгэмд тулгарч буй асуудал, тэр дундаа хүүхэд, эмэгтэйчүүдэд тохиолддог асуудлыг ч тэр барьж авч хөнддөг. Үзэгчид мэднэ дээ, түүний найруулсан “Түц”-ний охид” гэж кино бийг “Эмэгтэйн кэйс”-ийн хувьд яг л нийгэмд байгаа, илчлэх ёстой сэдэв. Сэтгэл зүйч мэргэжилтэй Уянга бүсгүйд нэгэн ток шоуны ярилцлагын үеэр үзэгчдийн зүгээс нэгэн санал ирдэг. Тэр санал нь “Түр хамгаалах байр” буюу хүчирхийллийн эсрэг төвд түр хугацаагаар ажиллах явдал байлаа. “Түр хамгаалах байр”-нд ирээд Уянга хүчирхийллийн олон кэйсүүдтэй танилцдаг. Түүний анхаарлыг хамгийн ихээр татсан нь 78 настай Хажид хэмээх эмгэн байдаг. Хажид эмгэн төрсөн хүүдээ байнга зодуулж дарамтлуулдаг бөгөөд тэр болгондоо хамгаалах байран дээр ирдэг байлаа. Ингээд Уянга Хажид эмгэнтэй ажиллахаар шийдэн түүнд тусалж эхэлнэ. Гэвч энэ шийдвэр нь Уянгыг санаанд оромгүй үйл явдал руу түлхэж орхидог. Т.Хулан жүжигчин энэ бүтээл дээр мэргэжилдээ чадварлаг, зоримог, дайчин эмэгтэйн дүрийг гаргасан.

Ингээд харахаар түүний бүтээл бүр үзэгчдэд хүрч, тэр бүтээлээрээ үнэхээр шуугиан тарьж чаддаг найруулагч байгаа биз. Хөнгөнөөр санаагаа илэрхийлдэг жор Д.Галбаяр найруулагчийн бүтээлүүдийнх.

БҮТЭЭЛҮҮДЭЭРЭЭ "ШУУГИАН ТАРИГЧ"

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0

Шинэ мэдээ

Нийтлэлчид