"ЭВДЭРХИЙ ХҮН"-ИЙ СЭТГЭЛИЙН ГҮНЭЭР АЯЛАХАД...

Д. Бямбасүрэн:
Соёл урлаг

2025-01-28, 2340

Рокит бэйгийн ертөнц рүү ороод хаан боллоо, харц ч боллоо. “Эвдэрхий хүн”-ий сэтгэлийн гүнээр “аялахад”, түүний дуунд гардаг шиг “Сэтгэл санаа яг лифт мэт”. Тэгээд тэр харин даруухан, гэхдээ дуугүйхэн толгой дохиод “Миний ертөнцөд тавтай морил. Сэтгэл хөдлөлийнхөө ертөнцөөр би та нарыг аялуулъя” гээд цааш хөтөчлөн орлоо. Тэгээд “Хүсвэл энд нэг өдөр хаан болж болно шүү” гэнэ. Мэдээж түүний ийм нэг орон зай руу нэвтэрч, бүтээл бүрийг нь сонсохын урьд иргэний үнэмлэхний нэрийг нь цохон танилцуулах нь зүйтэй. Одонгийн Баярсайхан гэх нэрийг хүмүүс төдийлөн мэдэхгүй ч аав, ээжээс нь өгсөн нэр. Аав нь дөрвөн настай байхад нь өөд болж, эмээ, ээж хоёр дээрээ өссөн байдаг. Тэр дундаа эмээтэйгээ илүү дотно өсөж, амьдралын захад хүртлээ түүний хайранд өндийжээ. Тэрбээр Америкаас ирээд анхны уран бүтээлээ эмээдээ сонсгоход эмээ нь 80 гарсан хэрнээ хөгжмийн хэмнэлд толгойгоо дохичихсон сууж байсан гэдэг. Ингэж л хүүгээ дэмждэг, урам хайрладаг байж.

Эмээгээ уран бүтээлдээ төдийлөн дурдаад байдаггүй ч "Бор арьст гамп" дуунд,

"Эмээ минь хэлэхдээ

Өөрийнхөө яг ихэр шиг

Хань ижилтэй болвол

Амьдрал яг чихэр шиг

Байдаг юм тэгэхээр миний хүү чи

Заяаныхаа ханийг олчихвол наалдан пад шиг наалдаад ав..." гэж хэлсэн үгийг нь бүтээлээрээ дамжуулна. Бүтээлээ ихэвчлэн сонирхолтой, шинэлгээр үзэгчдэд хүргэнэ.

Эрдмийн ундраа цогцолбор сургуулийг төгсөхдөө тэр англи хэлний хичээлдээ дуртай учир бие даан сурч, зураг, биеийн тамиртаа түлхүү идэвхтэй, дүйтэй байжээ. Англи хэл, зураг, биеийн тамир, хөгжим гээд багаасаа эхлэн өөрийгөө хөгжүүлсэн бүх л зүйл нь өнөөдрийн Рокит бэйг бий болгох бүрдэл хэсгүүд яах аргагүй мөн юм. Ингэж өөрийнхөө амьдрал, үзэл бодол, байр суурийг дуу, үглэлт бүрдээ дурдан багтааж, "дэлгэн ярьдаг".

Тухайлбал, аавынхаа тухай төдийлөн ярьж байгаагүй ч тэр "Хоосон зай" бүтээлдээ

"Миний амьдралд хэзээ ч би дүүргэж чадахгүй том зай бий.

Хүний амьдралд ээдрээ би, бусдын мэддэгийг би мэдрээгүй

Надад байгаагүй үлгэр дуурайлал авах хүн манай гэрт

Авах ёстой байсан хүн нь дөрвөн настайд намайг гэнэт

Орхиод унтаад маргааш өглөө нь ахиж хэзээ ч сэрээгүй

Орвонгоор нь өөрчилсөн тэр гэр бүлийнхээ ирээдүйг

Жаахан байсан болохоор надад мэдэгдээгүй цохилт нь

Хэлж ирээгүй цохилтод, эдгэрхээргүй цохигдсон

Хүмүүст бол хүүгээ алдсан эмгэн, нөхрөө алдсан эмэгтэй

Утга учир гэдэг зүйл нь сөхрөөд унасан тэдэнтэй" гэж дуулна. Үүнээс ямархан хоосон орон зайтай өдгөө хүртэл амьдарч ирсэн, бусдад тэр ямархан нөлөөлж байсан, мэдэрч чадаагүй зүйл нь энэ байсныг "уудална".

Тийм ч болохоор түүний ертөнцөд дуугаар нь өртөөлөн хүрч, "хэсэн тэнүүчлэх" бүрэн боломжтой аж. Яг ингээд дотогш орох гэтэл түрүүхэн өөрийнхөө ертөнцийн өрөө бүрээр дагуулахаар тохирсон реппер маань

"Би бол эвдэрхий хүн

Миний сэтгэлийн гүн

Зөвхөн байгаа балгас

Тэгэхээр намайг алгас..." гэнэ. Гэсэн ч "Эвдэрхий хүн"-ий ертөнц бусдынхаас юугаараа өөр нь улам ч сонирхолтой. Тэгээд бүр энд нэг өдөр хаан ч болж болох учир өөр яриангүй цааш "алхлаа".

."..Энгийн байх надад утга учиргүй мэт санагдана

Эндээс мултрахын тулд хурдхан гүймээр санагдана...".

Нээрээ тийн, нэг зүйлийг мартаж. Рокит бэйгийн гарцаагүй нэгэн онцлог бол өөр байх. Гэхдээ өөр байя гэж зорихоос илүү түүний өөрийгөө олсон, ойлгосон, жим гарган алхсан зам нь өөрөө энэ. Энэ эхлэл 2007 оноос эхлэлтэй бөгөөд Асуулт” форумд “Nevalast” нэрээр уран бүтээлээ туурвиж эхэлжээ. Түүний бүтээл төрөх агшин бол тухайн үед юу мэдэрч, мөн юуг үзсэнээс төрдөг гэмээр. Учир нь бүх л дууныхаа үг, аяыг өөрөө зохиодог. "Пуужин Баяраа", "Эвдэрхий хүн", "Хариуцлага", тун удахгүй гарах "Одиссей" гэсэн дөрвөн цомогтой. Өөр өөрийн ертөнц, гэрэл өнгө, үзэл бодол, үйл байдал, санаатай дуунууд эдгээр цомогт багтсан бөгөөд алинаас нь ч сонгон сонсоход түүний ертөнц рүү төвөггүй хөтөлж, хувь хүнийх нь зарчим, зан чанарыг илүүтэй товойлгоно. Үзэгчид мэднэ дээ. Тоотой хэдэн удаа л хэвлэлд ярилцлага өгч, хувийн амьдрал гэхээс илүү уран бүтээл болон зарим зүйлийн талаар л үзэл бодлоо товчхон хуваалцаж байсныг. Харин "Авьяаслаг монголчууд" шоугаар илүү ойр танилцаж, зөөлөн, шударга, чадварлаг уран бүтээлч гэдгийг нь илүүтэй танисан. Дуундаа гардаг шиг юунд ч бууж өгөхгүй хатуу төлөвтэй, дууны дүрс, шийдэмгий харц, шулуухан үглэлтээс харахад харь хөндий, ширүүн дориун мэт боловч угтаа зөөлөн, дулаан, хүн бүртэй эелдэг дотно нэгэн гэдгийг хэн хүнгүй мэддэг болсон.

Тэр дэлгэцийн хэд хэдэн уран бүтээлд ажилласан бөгөөд анхны уран бүтээл нь Лос Анжелес хотод 2009 онд хийгдсэн “Маргаашгүй” хэмээх уран сайхны кино юм. Мөн “Алтан ус”, “Эцсийн зогсоол Э цэг”, "Маргаашгүй" зэрэг кинонд ажилласан. Кинонд тоглох санал хүлээн авсан тухайгаа тэрбээр надад их сонирхолтой, өөр нэгэн сорилт шиг санагдсан гэнэ. Энгийн, нэгэн хэвийн байх гэхээс илүү сорьсон, хийж байгаагүй бүхнээ чадах гэсэн хүсэл түүнийх. Үүний нэгэн төлөөлөл зүйл нь Монголын анхны олон тоглогч холбогдон тоглох боломжтой аймшгийн 3D видео тоглоом болох “Carnival Hunt” нь түүний үүсгэн байгуулсан “Beer Night Studio”-ийн шинэ бүтээл юм. Тэрбээр “Beer Night Studio”-ийг 2017 онд үүсгэн байгуулсан байдаг. Монголын анхны бүрэн хэмжээний анимейшин цуврал “Онц дүмд” болон “Fragile” хэмээх видео тоглоомыг ч бүтээгч.

Рокит бэйгийн дуунууд нэгэн хэвийн, тогтсон дүрэм журамтай амьдрал, оршихуйг "хагалан" эвдэж, эрх чөлөөт, дур зоргоор ахуй руу татдаг. Яагаад ч юм нэг тийм давчидмал, баригдмал вакум орчинд байгаа мэт бачуухан үедээ сонсоход "Бүхнийг орхиод харсан зүг рүүгээ гүй" гэж чангахан "хашгирах" шиг санагддаг. Үгээр тайлбарлах гэхээс илүүтэй үг нь өөрөө хэлээд, ойлгуулдаг. "Нэг өдрийн хаан" дуунд,

"...Байж чадахгүй нь би хавчиг жижиг завсарт зайнд

Ийм учраас эндээс явахаар гал дундуур би алхаж байна

Хананы нөгөө талд гарах замдаа би алхана

Хөлөө би зөөж ядна

Нэг биш удаа би шантарна

Золиос зөндөө гаргана..." гэх мэтээр дуунууд нь амьдрал дундуур алдаа, оноотой туучин яваа хэн бүхэнд хүч тамирыг өгч, "татан босгодог". Ийм л үзэл бодолтой, амьдралын өнгө тоон, хөг хэмнэлтэй түүний ертөнцөд "Хөрөө", "Дуу муутай хүн, "Сахилга сул", "Инээдтэй хүмүүс", "Диваажингийн нулимс", "Тасархай залуус" зэрэг олон бүтээлийг нь залгуулан сонсож саатлаа. Хамгийн сүүлд мэдээж жингүйдсэн пуужинг сонслоо. Тэр өөрийн гэсэн бүхнээ бат байгуулсан дуу хөгжим, үзэл бодлын томоос том "цайз" юм байна. Нэвтрэх тусам живэх, сонсох тусам эрх чөлөөт ертөнц.

"ЭВДЭРХИЙ ХҮН"-ИЙ СЭТГЭЛИЙН ГҮНЭЭР АЯЛАХАД...

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.