“Хэцүү анги” киноны эрх танхи мөртлөө хэрсүү арван жилийн сурагч Билгүүний дүрээр үзэгчдэд мартагдахааргүй танил болсон жүжигчин М.Наранмөнхийн төрсөн өдөр өнөөдөр тохиож байна.

      Тэрбээр “Код”, “Миний ах атаман”, “Ах, дүүс”, “Би эмэгтэй хүн”, “Тэнгэрийн хүү”, “Хүсэл”, “Зам”, “Хадмын хайр”, “Галзуу дурла”, “Эцсийн хүсэл”, “Онцгой эрх”, “No Rulеs” зэрэг уран бүтээлийн гол болон туслах дүрийг чадварлаг бүтээсэн билээ. Монголчуудын үзэх дуртай “Гарьд магнай” киноны Равсал панзын дүрийг сэтгэлд хоногштол бүтээсэн жүжигчин Б.Магсаржавын хүү тэрбээр өдгөө кино урлагт авьяас, чадвараа гаргаж яваа залуу, шаггүй уран бүтээлч юм. Түүний аав эсрэг дүрийн гарамгай жүжигчин байсныг Монголын ард түмэн мэдэх билээ.

       Тэгвэл М.Наранмөнх ч мөн чамгүй сайн эсрэг дүрийн жүжигчин гэдгээ харуулж яваа бөгөөд үеийнхээ залуу уран бүтээлчид дундаа бол түүнийг гүйцэх амьтай, дотортой эсрэг дүрийн жүжигчин ховор гэхэд хилсдэхгүй болов уу.

           Аавынхаа тухай тэрбээр хэвлэлд өгсөн ярилцлагадаа “Би уг нь багадаа онгоцны нисгэгч болно гэж боддог байсан. Харин мэдээ орох тусмаа аавынхаа тоглосон кино, жүжгийг үзэх дуртай болсон. Аавыгаа тайз, дэлгэцээр гарч байгааг харах сайхан санагддаг. Хүмүүс аавын минь киног үзээд сайхан сэтгэгдэлтэй байгааг харах бүр ч гоё. Тэр дундаа жүжгийг нь үзээд алга ташиж байгааг нь харах сайхан” гэж ярьжээ. Тэгэхээр аавынх нь ажил, мэргэжил, уран бүтээлд тоглодог чанар нь түүнийг урлагийн хүн болох, аавынхаа авьяас билгийг өвлөн уран бүтээлч болох замд хөтөлжээ. Ингээд тэрбээр зургадугаар ангиадаа "Жүжигчин болно" гэж эрс шийдэж, "Монгол" телевизийн "Цоглог" студийн Д.Саранхүү багшид шавь орсон гэнэ. Энэ шийдвэрээс хойш тэрбээр жүжигчин мэргэжлээр суралцах  болсон ч дундуур нь өөр чиглэл рүү сонирхож байгаад, эргээд урлагийн замдаа орсон байна. Тэрбээр мөн хэвлэлд "Би аавынхаа хийж чадаагүй бүхнийг хийнэ. Яагаад гэвэл, би Б.Магсаржав гэж хүний үр удам шүү дээ" гэж ярьж байв. Энэ хүсэл тэмүүлэл нь ч түүнийг үеийнхнээсээ өөр байх, илүүтэй чадварлаг уран бүтээлч байхад нь нөлөөлсөн болов уу.

    Нөгөөтэйгүүр урлагийн сайхан залуу хэмээх тодотголд багтаж явдаг тэр нэг хэсэг уран бүтээлээсээ хөндийрч байгаад сүүлд OI Entertaiment продакшнд жүжигчнээр ажиллаж эхэлсэн билээ. Хамгийн сүүлд гэхэд тэрбээр "No Rules" киноны Цэрэнгийн дүрийг чадамгай гаргаж, үзэгчдэд үзэн ядагдаж, мөнхүү сайшаагдсан. Түүний бүтээсэн эсрэг дүр угаас үзэгчдийн уурыг хүргэж, эгдүүцлийг төрүүлдэгийг тоглосон олон дүрээс нь харж болно. 

         М.Наранмөнх жүжигчин багаасаа л урлагийн авьяастай, юм бүхний түрүүнд гүйж, оролцож явдаг байснаа хэвлэлд өгсөн ярилцлагадаа өөрөө дурдсан байдаг. Түүний хамгийн анхны уран бүтээл бол “Камертон” хамтлагийн ахлагч, Төрийн соёрхолт Д.Болдын “Захиа” дууны клипэд тоглосон нь аж. Үзэгчдийн хэлж байгаагаар дөлгөөхөн төрхтэй түүний харц болон нүүрний хувирал эсрэг дүрд тоглохоороо яг л дүрээ онодог гэх. Харин түүний үзэгчдэд танил болсон эсрэг дүрүүдээс өөр нэгэн дүр бол “Тэнгэрийн хүү” киноны Тулгын дүр. Удган хүүгийн дүр түүний амьдрал дээрх М.Наранмөнхийн зан чанарыг илүүтэй тусгасан гэх хүмүүс ч байдаг. Харин "Хэцүү анги" киноны Билгүүний дүр бол насны хувьд, зан чанар, хүсэл мөрөөдлийн хувьд ч түүнтэй илүүтэй төстэй дүр болов уу. Одоо ч хүмүүс түүнийг М.Наранмөнх гэхээс илүү Билгүүн хэмээн харах нь ч бий.

   Мэдээж хүү нь аавынхаа энд хүрэхгүй ч байж мэднэ. Гэхдээ бидний мэдэх, хэний ч таних Равсал Панзын дүр шиг бүгдийн сэтгэлд хоногшсон дүрийг М.Наранмөнх бүтээнэ гэдэгт итгэлтэй байна. Харин хэзээ бол гэдэг л хүлээлт байна.