МУСТА  жүжигчин Ц.Батхуяг буюу Амбий агсны төрсөн өдөр өнөөдөр тохиож байна. Монголын тайз, дэлгэцийн нэгэн цаг үеийг түүчээлэн алхаж, үзэгчдийн хайртай дүрүүдийг гаргасан тэрбээр Дорнод аймгийн хүү бөгөөд хүнд өвчний улмаас нас барсан билээ.

   Түүний “Наран ургахыг хүлээхүй” киноны хатиг Даваа, “Уулын төмөр” киноны шилийн сайн эрийг барих гээд хүлээж байгаа зальжин цагдаагийн дүр бол уран бүтээлчийн хувьд бүтээсэн хамгийн сайн бөгөөд сонирхолтой дүрүүд. Түүний араас “Помогети нам-1”, “Помогети нам-2” болон “Би чамд хайртай-2” киноны гол дүрийн залуугийн бүтэлгүй найз, “Шарталт” киноны архичин залуу, “Танхай тээгч” киноны тээгч эмэгтэйн нөхөр, “Содура” киноны омгийн ахлагч  зэрэг олон уран бүтээлийн эзэн шиг эзэн байж, оногдсон дүрдээ орсон шиг орсон тэр.

   “Амбий” гэх нэрийг түүнд үзэгч түмэн өгч, Монголын урлагийн авьяаслаг хүү “Амбий” байсан тэрбээр өдгөө  байхгүй ч бүтээл туурвил нь өнөд бидний дунд байж, үүрд оршино. Хошин урлагийн тайзнаас уран бүтээлчийнхээ гарааг эхэлж, хошин шогийн сонирхолтой, содон, хөгжилтэй, хөгтэй, бүтэлгүй дүр түүнийх байсан. Түүнийг ойр дотны, тайз, дэлгэцийн урлагт хамтран зүтгэж байсан уран бүтээлчид нь нөмөр нөөлөгтэй, нуруутай, хээ, гүндүүгүй нэгэн байсныг дурсан ярьдаг.  Мөн шинэ, залуу уран бүтээлчдэд сайн зөвлөгч, найз нөхдөдөө жудагтай сайн анд нөхөр, аав, ээж, ахан дүүсийнхээ сайн хүү, ах, Монголын урлагт авьяаслаг нэгэн уран бүтээлч байсныг нь бахархан өгүүлдэг  юм.

   Түүний хүү нь аавынхаа талаар хэвлэлд өгсөн ярилцлагадаа “Аав минь маш мэдрэмж өндөртэй, ухаантай хүн. Хүнийг инээлгэнэ гэдэг маш том филисофи, ухаан шүү дээ. Аав нэг удаа “Энэ мэргэжилд дуртай байгаад хүсэл байлаа гээд чи хийж чадахгүй,  тиймээс энэ мэргэжлийг чин сэтгэлээсээ хайрла. Битгий шантар” гэж хэлж байсан” хэмээн аавынхаа тухай дурссан байдаг.