Үндэсний сэтгүүл зүй үүсэж хөгжсөний 109 жилийн ой, Монголын сэтгүүлчдийн нэгдсэн эвлэлийн 71 жилийн ойг тохиолдуулан салбартаа үр бүтээлтэй ажиллаж, дөрөв дэх засаглалд үнэтэй хувь нэмэр оруулсан эрхмүүдийг Төрийн өндөр дээд одон медалиар шагналаа. Тэдний нэг нь УИХ-ын Тамгын газрын Хэвлэл мэдээлэл, олон нийттэй харилцах хэлтсийн гэрэл зурагчин Г.Эрдэнэтуяа байлаа. Түүний хийсэн ажил, бүтээсэн дүрийг нь Хөдөлмөрийн гавьяаны улаан тугийн одонгоор шагнаж, мялаасан юм.

Бид гэрэл зурагчин Г.Эрдэнэтуяатай холбогдож, баярын сэтгэгдлийг нь хуваалцсанаа уншигч танд хүргэж байна. Тэрбээр "Ардын эрх" сонингоос ажлын гараагаа эхэлж, "Өнөөдөр" сонинд "бойжиж", өдгөө УИХ-ын Тамгын газрын гэрэл зурагчнаар гурав дахь жилдээ ажиллаж байгаа билээ. 

            Тэрбээр “Миний аав сонинд гэрэл зургийн сурвалжлагч байлаа. Аавынхаа мэргэжлийг эзэмшиж, 1997 онд гэрэл зурагчин болж байлаа. Энэ салбарт хоёргүй сэтгэлээр 25 жил зүтгэсэн зүтгэлийг минь төр өндрөөр үнэлж, Хөдөлмөрийн гавьяаны улаан тугийн одонгоор шагнаж байгаад туйлын баяртай байна. Салбарын нөхөдтэйгөө, дөрөө харшуулж, өөр өөрсдийн өнцгөөр дурангаа нийлүүлдэг гэрэл зурагчидтайгаа хамт баяраа тэмдэглэж, өнгөрсөн, ирээдүйн тухайн хуучилж, сууна. Хөдөлмөрөө үнэлүүлж, салбарын нөхөдтэйгөө сайн, муугаа ярилцаж суух л хамгийн сайхан байна даа. Хийсэн ажлыг минь, бүтээсэн дүрийг минь үнэлсэнд баярлалаа гэж хэлмээр байна. Намайг үнэлсэн энэ үнэлэмж, ганцхан намайг бус, гэрэл зурагчдыг, гэрэл зургийг үнэлж байгаа үнэлгээ гэж бодож байна. Гэрэл зургийн хөгжилд хувь нэмэр оруулж байгаадаа баяртай байна. Амьдралаа гэрэл зурагтай холбосон хамгийн том  шагнал байх. Энэ өдөр хамгийн сайхан өдөр болж байна даа” гэлээ.

Тэрбээр өмнө нь Алтан гадас одон, Хэвлэл мэдээллийн тэргүүний ажилтан гэх эрхэм хүндтэй шагналыг хүртэж байсан билээ. Мөн тэрбээр "Ертөнцийн өнгө" "Бүсгүй мэлхий" гэх томоохон гэрэл зургийн хамтарсан болон бие даасан гэрэл зургийн үзэгслэнгээ гаргаж, үзэгчдийн хүртээл болгож байсан юм. Тэрбээр 25 жилийн хугацаанд дурангаа чиглүүлсэн бай нь амьд ертөнц, байгаль эх, хүн...