ТАНИЛЦ: Гуравдугаар сарын 8-нд болох үзвэрүүд

2022-03-07, 926

“Олон улсын эмэгтэйчүүдийн эрхийг хамгаалах өдөр”-ийг тохиолдуулан соёл урлагийн салбарт ямар, ямар арга хэмжээ зохион байгуулагдах талаарх мэдээллийг эргэлт.мн мэдээллийн сайтын уншигч та бүхэнд хүргэж байна.

Дэлхийд нэр алдраа цуурайтуулсан их зохиолч Ф.М.Достоевскийн "Гэм Зэм" романаас сэдэвлэсэн "Гэм Зэм" постдрамын жүжгийг "Орфей театр" нь Монголдоо анх удаа олны хүртээл болоод буй билээ. Оросын театрын шилдэг сургууль болох ГИТИС-ийг амжилттай дүүргэж, Монголдоо "ФАУСТ" постдрамын жүжгийг анхлан найруулсан Мягмарнарангийн Батболд нь "Гэм Зэм" жүжгийн ерөнхий найруулагчаар ажиллаж байгаа юм. Хайр, үзэн ядалт, харуусал, шаналал, гэмшил, ганцаардал бүгдийг мэдэрч харанхуйн гүнд төөрөлдсөн ч гэрэл гэгээ рүү тэмүүлж буй нэгний түүх билээ.

Монгол Улсын Соёлын тэргүүний ажилтан Д.Бурмаа 13 дахь удаагийн бие даасан тоглолтоо хийхээр төлөвлөөд байна. Энэ удаагийн тоглолтоо “Уянгалаг” хэмээн нэрэлсэн бөгөөд гуравдугаар сарын 8-ны өдөр тоглох аж. Тэрбээр цахим хуудсандаа "Сайн байцгаана уу, Миний хувьд жил бүрийн Мартын 8 -нд уламжлал болгон толилуулдаг байсан уламжлалт тоглолтоо "Уянгалаг" нэртэйгээр энэ жил Соёлын Төв өргөөнд хоёр өдөр тоглохоор боллоо. Уран бүтээлийнхээ 13 дахь тоглолтыг 100%дүүргэлттэйгээр тоглохоор боллоо. Өнгөрсөн жил энэхүү тоглолт маань цар тахлын улмаас хойшлогдож бүх бэлтгэл хангагдсан боловч цуцлагдаж үнэхээр харамсалтай байсан шүү. Сайхан цаг ирж байна" хэмээжээ.

"Олон улсын эмэгтэйчүүдийн эрхийг хамгаалах өдөр"-ийг тохиолдуулан үзэсгэлэнт охид бүсгүйчүүддээ зориулж 2022 оны гуравдугаар сарын 08-ны өдрийн 17:00 цагаас Дэлхийн сонгодог бүтээл болох П.И.Чайковский "Хунт нуур" балетыг дахин нэг удаа тоглогдох гэж байна.

Үндэсний урлагийн их театр “Олон улсын эмэгтэйчүүдийн эрхийг хамгаалах өдөр”-т зориулан “Монголын их хатад” бүжгэн жүжгээ гуравдугаар сарын 7, 8-нд толилуулах гэж байна. “Монголын их хатад” бүжгэн жүжиг нь Монголын түүхэнд домог болсон есөн хатны түүхэн гавьяаг тод томруун толилуулсан бүтээл юм.

2013 онд анх тайзнаа бүтээгдэж байсан уг бүтээлийн энэ удаагийн тоглолтод гол дүрүүд буюу есөн хатны дүрүүдэд

Гоо Маралын дүрд-бүжигчин О.Дөлгөөн

Алунгоо эхийн дүрд-бүжигчин М.Бүжидмаа

Өэлүн хатны дүрд-бүжигчин Л.Энхболор

Бөртэ хатны дүрд-бүжигчин Б.Отгонцэцэг

Дөргөнэ хатны дүрд-бүжигчин Э.Номин

Сорхугтани хатны дүрд-бүжигчин М.Бямбаа

Чимбай хатны дүрд-бүжигчин О.Жавзан

Самар хатны дүрд-Ш.Батгэрэл

Мандухай хатны дүрд-бүжигчин Ж.Мандухай нар тоглохоор болжээ.

"ҮРТЭЙ ХҮН ЖАРГАЛТАЙ" уламжлал болсон баярын тоглолт 2022 оны гуравдугаар сарын 8нд 19:00 цагаас Монгол бөхийн өргөөнд тоглогдох юм байна. Тоглолтонд: Ардын Жүжигчин А.Долгор, Харанга хамтлагийн МУГЖ Х.Лхагвасүрэн, МУГЖ У.Далантай, МУГЖ С.Эрдэнэцэцэг, МУГЖ С.Ганзориг, МУГЖ С.Жавхлан, МУГЖ Ч.Мөнх-Эрдэнэ, МУСТА Г.Эрдэнэчимэг, Д.Намсрайноров, СТА А.Хосбаяр, Voice шоуны шилдэг оролцогч Э.Дашням нар оролцох аж.

ТАНИЛЦ: Гуравдугаар сарын 8-нд болох үзвэрүүд

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.