Зохиолч, яруу найрагч Г.Аюурзанын “Тэдний сүүдэр бидний сэтгэлээс урт” романы хэсгээс уншигч танд онцлон хүргэж байна. Тэрбээр өмнө нь  “Бөөгийн домог”, “Шүгдэн”, “Цагаан Хар Улаан”, “Судасны чимээ”, “Сахиуст хангайн нууц”, “Сүнсний томьёо”, “Өчигдөр уулзъя” зэрэг роман мөн “Дурлалгүй ертөнцийн блюз”, "Амь тавьж буй шувууны далавч”, “Дурлал зохион бүтээгч” зэрэг богино хүүрнэлийн түүврүүд хэвлүүлсэн билээ.

Чиний үнэнийг өөр хүний өнцөг худлаа болгож харагдуулна. Яг түүн шиг, тэдний үнэнийг олж харахад чиний олж зогссон өнцөг садаа болоод байна. Энэ амьдралд үнэн мөн ч гэж, худал хуурмаг ч гэж байхгүй. Үнэн харагдах өнцөг, худал харагдах өнцөг л гэж бий.

Бурхан гэж оршин буй юм бол гагц хүмүүсийн төсөөллөөр хүмүүсийн төлөө оршин байх боломжгүй шиг боломжгүй. Бурхан бүхий л ертөнцийн төлөө түүн дотроо  бас шувуудын төлөө ч оршдог байх учиртай.

Ямар нэгэн гайхамшгийг насан туршдаа хүлээсэн, тийн хүлээж явснаа өөрөө ч мэдээгүй, мөнөөхөн гайхамшиг аль хэдийнэ тохиогоод бүр мөсөн үгүй болсон хойно л давтагдашгүй үнэ цэнтэй зүйлээ алдаж гээснээ ухааран дэмий л аргаа баран халаглах хэн нэгэн...

Шувууд бол мэднэ. Бас биднийг дурсамжийн маань гүнд буцаан аваачих цэг арьсны маань хаа нэгтээ цочрол хүлээн чимчигнэж буйг тэд мэднэ.

Ухаан солиорсон хүмүүс дотоод ухамсаргүй оюун санааныхаа хаа нэгтээ булагдаж дарагдсан зүйлсийг уудлан гаргаж ирээд, өвчилсөн төсөөллөөрөө баяжуулж түүндээ итгэсэндээ л элдвийн хий хоосон дуу хоолой сонсдог.

Ачлал гэж мэдэхгүй. Ачлалгүй эцэг, эхээс ачлалгүй л үр төрнө. Ангаахай нь үүрний эздийн үр удмыг түлхэж унаган хөнөөгөөд гагц өөрийгөө тэжээлгэх зөн совинтой төрдөг. Хүйтэн цустай могой ч цагариглаж биеэрээ ороогоод өндгөө  дардаг атал хөхөө арай ч дээ. Шувуун төрөлхтөний нэрийг гутаагсад.

Хараацай шиг гэж намайг бодоход “Ураацай шиг гээч” хэмээн сөргөх шиг санагдсан нь шувуутай хэл нэвтрэлцсэн анхны яриа.

Би маргааш үхэхээс ч айхгүй. Айна л даа гэхдээ нэг их тоохгүй.

Миний амьдралд товхондоо ийм. Анхнаасаа надгүйгээр сэдэгдэж эхлээд, өдий хүртэл миний оролцоо ерөөсөө байхгүй ч юм шиг нэг л ойлгомжгүй урссаар байгаа худлаа зүйл ч юм шиг.

Намайг молигдож, тохуурхаж, бүр дээрэлхэж эхэллээ. Тэр өөрөө худалдагдаж, тэр солилцоогоороо зориг, зүрх худалдан авчээ.