Бяцхан дуучин Б.Бат-Энэрэл хоёрдугаар сарын 17- нд “Талархал” бие даасан тоглолтоо хийсэн билээ. Тоглолтын үеэр түүнд Соёлын тэргүүний ажилтан гэх цол тэмдэг гардуулж өгсөн байдаг.

Тэгвэл Соёлын яамнаас Б.Бат-Энэрэл МУСТА гэх цол, тэмдгийг олгоогүй ажээ. Тодруулбал, Б.Бат-Энэрэлийг шагналд тодорхойлсон бичиг, баримтыг холбогдох хүмүүс яаманд хүргүүлээд байгаа гэнэ. Түүнээс яамнаас тушаал гаргаж, хүүд цол, тэмдэг олгоогүй талаар албаныхан мэдээллээд байна.

Б.Бат-Энэрэлийн тоглолтын үеэр Монголын зохиолчдын эвлэлийн шагналт яруу найрагч В.Нэргүй шагналыг гардуулж өгсөн. Тэрбээр тоглолтын үеэр үг хэлэхдээ “Соёлын яамны Захиргаа, удирдлагын хэлтсийн дарга Ч.Энх-Амгалан гардуулж өгөх ёстой байсан ч ажил амжихгүй, ирж чадсангүй. Ч.Энх-Амгаланг төлөөлж би ирлээ. Б.Бат-Энэрэл дүүдээ баяр хүргэе, баяртай байна” гэсэн юм.

Бид энэ талаар Соёлын яамны Захиргаа, удирдлагын хэлтсийн дарга Ч.Энх-Амгалангаас тодруулахад “Б.Бат-Энэрэлд миний нэрийг барьж, СТА цол зүүж өгсөн яруу найрагч В.Нэргүй надаас уучлалт гуйсан. Би ямар нэгэн тушаал гаргаж, СТА цол олгоогүй. Олгох эрх бүхий ч хүн биш. Харин хүүгийн бичиг, баримтыг яамны шагнал тодорхойлох албанд хүргүүлчихээд байна лээ” гэсэн юм.

Тэгвэл бид яруу найрагч В.Нэргүйтэй холбогдож, энэ талаар тодрууллаа.

            -Дуучин Б.Бат-Энэрэлийн “Талархал” тоглолтын үеэр та СТА цол олгосныг гардуулж өгсөн шүү дээ. Ингэхдээ Соёлын яамны Захиргаа, удирдлагын хэлтсийн дарга Ч.Энх-Амгалан тушаал гаргасан, гардуулж өгөх ёстой байсан гэж хэлсэн. Гэтэл Соёлын яамнаас Б.Бат-Энэрэлд СТА цол олгоогүй гэдгийг мэдэгдээд байна. Энэ ямар учиртай вэ?

-Соёлын яаманд Б.Бат-Энэрэлийн холбогдох бичиг, баримтыг хүргүүлсэн байгаа. Би Соёлын яамны Захиргаа, удирдлагын хэлтсийн дарга Ч.Энх-Амгалантай холбогдож, энэ хүүд цол, тэмдгийг нь гардуулаад өгөхийг хүссэн. Нэгэнт холбогдох бичиг, баримт нь хүргэгдсэн учраас СТА цол олго нь тодорхой. Тийм учраас би өөрийнхөө цол, тэмдгийг зүүгээд өгчихсөн юм. Хүүхдийн урам, үзэгчидтэйгээ үлдэх сэтгэл шүү дээ. Энэ хүү чинь эрүүл мэндийн шалтгаанаар таван жил дахиж тайзан дээрээ гарч чадахгүйд хүрээд байгаа.

-Төрийн шагналыг гараагүй байхад нь хуурамчаар гардуулж өгөх нь зөв юм уу. Зүүлгэж өгсөн цол, тэмдэг нь хэнийх байсан юм бэ?

-Өгөх нь тодорхой учраас ийм арга хэмжээ авсан юм. Би өөрийнхөө цол, тэмдгийг зүүж өгсөн. Уг нь анх СТА цолоор шагнуулж байгаа тухай мэдээллийг зарлаад л орхих байсан ч хүүхдийн урмыг бодоод ийм шийдвэр гаргачихсан.

-Тодорхойлолтоо өгсөн хэдий ч шагнал нь гарахгүй бол яах вэ?

-Би энэ асуудлаар Соёлын сайдтай уулзах гээд хоёр хоног хүлээж байна. Өгөх нь тодорхой шүү дээ. Таван оронд тоглолтоо зохион байгуулсан хүүхэд шүү дээ. Хэрэв СТА цолыг нь олгохгүй бол бид эцсээ хүртэл явна.