-ЭРДЭНЭБҮРЭНГИЙН УСАН ЦАХИЛГААН СТАНЦЫН ОРЧИН, НӨЛӨӨЛЛИЙН БҮСЭД БАЙГАА 270 АЙЛД 3-130 САЯ ТӨГРӨГ, 270 АЙЛЫН ИРГЭН БҮРД 15.2 САЯ ТӨГРӨГИЙН НӨХӨН ОЛГОВОР ОЛГОЖ, ХОХИРОЛГҮЙ БОЛГОХ ТУШААЛ ГАРСАН

Эрдэнэбүрэнгийн усан цахилгаан станц төслийн нэгжийн дарга Ч.Гантулгыг үүрэгт ажлаас нь чөлөөлсөн гэх мэдээлэл цацагдсан. Тодруулбал, түүнийг УЦС-ын төслийг иргэдэд ойлгуулж, хангалттай мэдээлэл өгч чадаагүй гэх шалтгаанаар нь ажлаас нь чөлөөлсөн гэсэн юм. Тэгвэл бид мэдээллийг бодитой хүргэх үүднээс Эрдэнэбүрэнгийн усан цахилгаан станц төслийн нэгжийн дарга Ч.Гантулгатай холбогдож, тодрууллаа.

            -Таныг үүрэгт ажлаас нь чөлөөлсөн гэх мэдээлэл хэвлэлээр цацагдаж эхэллээ. Та ажлаа хийж байгаа юу?

            -Тийм мэдээлэл цацагдаж, мэдээллийн сайтууд гаргасан байна лээ. Мөн цахим орчинд зохион байгуулалттайгаар ийм мэдээлэл тарааж байх шиг байна. Одоогоор би ажлаа хэвийн хийж байгаа. Тушаал шийдвэр гараагүй байна. Гэхдээ тун удахгүй ажлаас чөлөөлөх тушаал гарах байх. Энэ ажлыг авахаар санаархаж байгаа олон хүн бий. Тэр хүмүүсийн хийж байгаа ажил байх даа.

-Тушаал удахгүй гарна байх гэлээ. Ямар үндэслэлээр ажлаас тань чөлөөлөх гэж байгаа юм бэ. Иргэдэд хангалттай мэдээлэл өгч чадаагүй гэж үзэж байгаа гэсэн. Үүнтэй та санал нийлэх үү?

            -Нийлэхгүй. Иргэдэд хангалттай мэдээлэл өгсөн. Иргэдэд мэдээлэл өгөх уулзалтыг төрөөс таван удаа зохион байгуулсан. Хамгийн сүүлд Эрчим хүчний сайд өөрийн биеэр очиж, иргэдтэй нэгдсэн уулзалт зохион байгуулж, мэдээлэл өгсөн шүү дээ. Эсэргүүцэж байгаа иргэд, зохион байгуулж байгаа төрийн болон төрийн бус байгууллагын ажилтнууд оролцсон. Хангалттай мэдээлэл авсан хэрнээ дараа нь “Бид мэдээлэл байхгүй, аваагүй” гэж хэлдэг. Эсэргүүцлийн нэг хэлбэр байх. Мөн бид хэвлэл мэдээллийн байгууллагаар хангалттай мэдээлэл өгсөн. Мэдээлэл сонсоогүй нэг ч хүн байхгүй. Биднээс дутахааргүй мэдээлэлтэй байгаа шүү дээ. Иргэдэд мэдээлэл өгсөн, үнэлгээ хийх явцад цөөнгүй бэрхшээлтэй тулгарсан. Үнэлгээний компанийн ажилтан гараа хугалуулж, толгойгоо хагалуулж, зодуулсан. Иргэдэд мэдээлэл өгч чадаагүй гэх үндэслэлээр ажлаас чөлөөлөх нь үндэслэл биш. Ганцхан иргэд ч эсэргүүцэл үзүүлээд, үүнээс нь болоод бэрхшээл тулгараад байгаа юм биш.

-Иргэд, малчдад олгох нөхөн олговрын судалгаа хийгдээд дууссан юм уу. Хэчнээн төгрөгийн нөхөн олговор олгохоор болсон юм бэ?

            -Хийгээд дууссан. 2021 оны арваннэгдүгээр сард БОАЖЯ дээр мэргэжлэлийн зөвлөлөөр  хуулийн дагуу батлагдсан. Орчин, нөлөөллийн бүсэд байгаа 270 айлд нөхөн төлбөр олгохоор болсон. Айл болгонд олгох нөхөн төлбөрийн хэмжээ харилцан адилгүй байгаа. Айлуудад 3-130 сая төгрөгийн нөхөн олговор олгох шийдвэр гарсан. Мөн 270 айлын иргэн бүрд 15.2 сая төгрөг өгнө. Ойролцоогоор таван ам бүлтэй айл нөхөн олговрын 76 сая төгрөг аваад, дээрээс нь өвөлжөө, хаваржаа, бэлчээрийнхээ олговрыг авч, газраа чөлөөлж өгсөн гэсэн үг.  

-Цахим сүлжээнд гарсан зургийг та харсан уу. “Энэ гоё байгаль усан дор орно” гэсэн тайлбартай байсан. Станц барих газар нь үнэхээр тийм юм уу?

             -Тусгай хэрэгцээнд авсан 28 мянган га газар байгаа шүү дээ. Үүний 9871 га талбайд нь усан сан үүснэ. Энэ талбай нь усан цахилгаан станцын гол хөдөлгөх усан сан нь байна. Усан сан үүсгэх үед иргэдийг нөлөөллийн бүсээс гараад, сан үүссэний дараа усаа тойроод ажиллах, амьдрахад нээлттэй гэдгийг хэлсэн. Цахим сүлжээнд цацагдаад байгаа шиг сүйтгэх талбай байхгүй.

-Таны хувьд ажлаа өгөхөд бэлэн байгаа юу?

           -Амаргүй ажил руу дайраад, авах гээд зүтгээд байна. Яг ямар үндэслэл гаргаж ирэхийг харна. Энэ төслийг унагаах хүн ирэх юм уу, хэний хүнийг томилох гээд байгаа гэдгийг харж, анхаарч ажиллана. Тэрний дараа шийдвэр гаргах болно.

-Сонгон шалгаруулалтаар төслийн удирдагчийг томилдоггүй юм уу. Та хэний хүн юм бол?

           -Би сонгон шалгаруулалтаар орсон. Яаман дээр шалгаруулсан сонгон шалгаруулалтад тэнцэж, таслийн удирдагч болсон. Хаана ч, аль ч газар очсон надад хэлэх үг бий.

-Энэ төслийг явуулахгүй байх ашиг сонирхол бий юү, хүмүүст?

-Байгаа, байгаа. Гадаадад ч, дотоодод ч энэ төслийг унагах зорилготой олон хүн бий. Би бүгдийг нь мэдэж байгаа. Эсэргүүцээд байгаа төрийн бус байгууллагууд хэнийг захиалгаар ажиллаж, иргэдийг турхирч байгааг сайн мэдэж байна.

-Турхираад, захиалгатай ажиллаж байгаа гэх хүмүүсийг нээлттэй, баримттайгаар хэлж болох уу?

           -Нээлттэй л байгаа шүү дээ. Хэн, ямар сумын Засаг дарга, удирдах албан тушаалтнууд гадаад руу албан бичиг бичиж, хэний захиалгаар явуулаад байгааг хууль хяналтын байгууллагынхан мэдэж байгаа. Тагнуулынхан шалгаж байгаа.