Ардчилсан намын гишүүд, дэмжигчид ОХУ-ын Гадаад хэргийн сайд Сергей Лавровын айлчлал, дайныг эсэргүүцэн жагсаж байна. Тодруулбал, жагсаалд Д.Монголхүү, Э.Бат-Үүл, Д.Сосорбарам тэргүүтэй хүмүүс оролцож байгаа юм. Жагсаал Төв талбайн баруун хаалга, хэлмэгдүүлэлтийн хөшөөний ойролцоо болж байгаа билээ. Жагсаалд оролцож байгаа Ардчилсан намын гишүүн Д.Монголхүүгийн зорчих эрхийг нэг жилээр хязгаарласан гэх мэдээлэл өнгөрсөн тавдугаар сард гарсан.

          Энэ талаар Д.Монголхүүгээс тодруулахад “Украйн, ОХУ-ын дайн эхлэхэд бид эсэргүүцэн жагсаж байсан. Украйнд суралцаж байгаа хүүхдүүдийг эсэн мэнд эх орондоо авчрахыг Гадаад харилцааны яамнаас шаардаж, жагссан юм. Тэр үед бид дайныг хүсээгүй, энх тайван байхыг хүссэн. Энэ зарчмаараа л өнөөдөр жагсаал зохион байгуулж байна. Мөн ОХУ-аас Монгол Улсад суугаа Элчин сайдыг манай улсын тусгаар тогтнолд хүндэтгэлтэй хандахыг шаардаж байгаа. Хэрэв хүндэтгэлтэй хандаж чадахгүй бол эх орноос минь явахыг шаардаж байна. Баянзүрх дүүргээс гарах эрх минь нээлттэй байгаа учраас жагсаалд оролцож байгаа. Давж заалдах шатны шүүх хурал болоогүй учраас миний зорчих эрх нээлттэй байгаа гэсэн үг. Шүүхийн гурван шатны шийдвэр албажаагүй учраас зорчих эрх нээлттэй. Өнгөрсөн хугацаанд цагдаагийн хамгаалалтад байлаа" гэв.