-ХАМГИЙН СҮҮЛИЙН ҮЕИЙН ЗАГВАРЫН ХАВДАР ЭРТ ИЛРҮҮЛЭГЧ ЭХОНЫ АППАРАТ МОНГОЛ УЛСАД ХОЁР ШИРХЭГ БАЙГАА-

            Хошин урлагийнхан жүжигчин Ц.Ганбаярын гэгээн дурсгалд зориулж Хавдар судлалын үндэсний төвд хавдар эрт илрүүлэгч, 260 сая төгрөгийн эхоны аппарат хандивласан. Тус аппаратаар хавдрыг түлж, устгах боломжтой юм. Уг мэдээлэлтэй холбоотойгоор цахим сүлжээнд “Монгол Улсад энэ аппарат ганцхан байдаг” гэх мэдээлэл гарсан билээ.

Тэгвэл энэ талаар ХСҮТ-ийн захирал Н.Эрдэнэхүүгээс тодрууллаа.

-Хошин урлагийнхан ХСҮТ-д хавдар эрт илрүүлдэг эхоны аппарат бэлэглэлээ. Энэ аппарат Монгол Улсад ганцхан байдаг байсан юм уу?

               -Хошин урлагийн жүжигчдийн бэлэглэсэн хавдар эрт илрүүлэгч эхоны аппарат Монгол Улсад хоёр байгаа нь үнэн. Нэг нь, “Гранд мед” эмнэлэг, нөгөө нь өчигдөр манай эмнэлэгт хандивласан аппарат. Хавдрыг илрүүлдэг багаж гэдэг нь маш олон төрөл байдаг. Түүний нэг нь эхоны аппарат. Эхоны аппаратыг Монгол Улс даяар хэрэглэгдээд, 20, 30 жил болж байгаа. Өчигдөр манай эмнэлэгт бэлэглэсэн эхоны аппарат нь хүчин чадал нь хамгийн сүүлийн үед хийгдсэн, хиймэл оюун ухаантай, 2022 онд гарсан загвар. Өмнө нь эхоны эмч үзээд, өвчтөнөө оношилдог байсан. Уг аппарат нь эмчийн ажлыг хөнгөвчилж, автоматаар бодолт хийж, хавдрыг илрүүлнэ. Тухайлбал, туршлага багатай, эмч өөрийн нүдээр хараагүй тохиолдолд “Тийм юмны хавдар байж болзошгүй. Тэдэн см өргөссөн, тэлсэн байна” гэдгийг нь тодорхой харуулж, зааж өгнө гэсэн үг. Орлуулж Iphone гар утсаар тооцоолбол, хамгийн сүүлийн үеийн загвар нь гэсэн үг юм. Өмнөх загвараас нь манай эмнэлэгт дөрөв бий. Бид хэрэглээндээ хэрэглээд явж байгаа.

-2022 онд гарсан эл загварын аппаратыг дахиж авах боломж бий юү?

          -Хавдар судлалын эмнэлэг байгууллагын хөрөнгөөрөө хоёр ширхгийг авах гэж байгаа. Улсын төсвийн хөрөнгөөр биш шүү. Үнэлгээ нь 260 сая төгрөг гэдэг юм байна лээ. Хамгийн сүүлд гарсан загвар учраас авч амжаагүй, захиалга өгчихсөн байсан.

-Хавдрын тасагтай орон нутгийн эмнэлгүүдэд авах боломж байгаа болов уу?

           -Эмчийн гарт сайн, шинэлэг техник байх ёстой. Хавдрын тасагтай орон нутгийн эмнэлгүүддээ хамгийн сүүлийн үеийн загварын хавдар илрүүлэгч эхоны аппаратыг аваад өгөх боломж улс оронд байгаа байх. Гэхдээ энэ нь миний мэдлээс хэтэрсэн асуудал. ХСҮТ-ийн эмнэлгийнхэн эмч нартаа байнгын сургалт семинарыг явуулж, мэргэшүүлж байдаг.

-Өчигдрийн аппаратаар хүний биед байгаа хавдрыг түлж устгаж байгаа харагдсан. Хүмүүс “Энэ аппаратаар нь хавдраа түлж, устгуулаад эрүүл болох боломжтой юм байна” гэж ойлгосон байх. Энэ талаар мэдээлэл өгөөч?

         -Өндөр хүчин чадалтай аппаратыг оношилгооноос гадна эмчилгээнд хэрэглэдэг. Эхогоороо харж байгаад, бусад аппаратын тусламжтайгаар хүний бие рүү зүү оруулж, түлэх ажилбарыг хийдэг. Өндөр хүчин чадалтай байх тусмаа устгах хавдраа хурдан хугацаанд олох боломжтой. Маш бага хэмжээний хавдар байгаа тохиолдолд хүний биеийн хэвлийгээр зүү оруулж, түлж устгах боломжтой. Том хавдрыг бол түлж устгах боломжгүй. Заавал ч үгүй мэс заслын аргаар эмчилнэ шүү дээ. Эрт илрүүлсэн, бага байхад нь энэ аппаратаар хавдрыг устгаж болно гэж ойлгож болно.

-Өчигдөр хэдэн хүний хавдрыг түлж, устгасан бэ?

        -Аппарат бэлэглэх үед нь дөрвөн хүнийг эмчилж, эрүүл болголоо. Хүчин чадалтай аппаратаар дөрвөн хүний маш бага хэмжээтэй аппаратыг түлж, устгалаа. Өөрөөр хэлбэл, өчигдөр аппаратаар оношилсон дөрвөн хүнд хавдрын голомт үүсэж байсан, дөнгөж илэрсэн гэсэн үг. Маш жижиг хэмжээтэй хавдрыг эрт илрүүлсэн учир зүүгээр түлж, устгасан. Дахиад хоёр аппарат аваад, хүмүүсээ эмчлэх боломжтой. Гагцхүү эрт илрүүлэх нь маш чухал.