Төр нийгмийн нэрт зүтгэлтэн С.Зориг агсны амийг хөнөөсөн хэрэгт буруутгагдаж, гурван шатны шүүхээс 20-25 жилийн хорих ял сонссон Б.Содномдаржаа, Т.Чимгээ нар батлан даалтад гараад нэг жилийн хугацаа өнгөрчээ. Шинэ нөхцөл байдал үүссэний улмаас хэргийг нэмэлт мөрдөн байцаалтад буцааж, тэднийг батлан даалтад гаргасан юм. Ингэснээр гурван шатны шүүхийн шийдвэр хүчингүй болж, Т.Чимгээ, Б.Содномдаржаа нарт холбогдох хэргийг дахин шалгахаар болсон ч хэрэг хэрхэх нь тодорхойгүй байгаа.

       Одоогийн нөхцөл байдлын талаар Б.Содномдаржаагийн ээж Б.Жавзмаатай холбогдож тодрууллаа. Тэрбээр “Миний хүү суллагдаад нэг жилийн хугацаа өнгөрлөө. Өнгөрсөн хугацаанд яах нь тодорхойгүй, ажилд ч орж чадахгүй хэцүү байдалтай л байлаа. Хүүгийн минь бие өвдөж, эмнэлгээр явж, эмчилгээ хийлгэж байна. Хэрэв энэ хэргээс хоёр яс бүтэн салбал, ажил төрөл олж хийгээд, амьдрал ахуйгаа өөд татмаар л байгаа байх. Даанч хэзээ шалгаад унах бол, хэзээ бас дуудах бол гэсэн айдастай л өдөр хоногийг барж байна даа. Энэ сарын 11-нд шүүгч О.Бархасбадийн шүүх хурал болно. Энэ хүний шүүх хурлын дараа л яах нь тодорхой болох болов уу. Бусдаар бидэнд мэдэх зүйл алга даа” гэлээ.