Нийслэлийн Засаг дарга бөгөөд Улаанбаатар захирагч асан Э.Бат-Үүл нарын хүмүүст холбогдох хэргийн шүүх хурал өнгөрсөн оны арванхоёрдугаар сард болж, шүүх хорих ял оноосон байдаг. Тодруубал, түүнийг эрх мэдлээ урвуулан ТОСК-ын гүйцэтгэх захирал А.Гантулгыг удаа дараа дарамталж, Хөгжлийн банкнаас орон сууц барих зориулалтаар олгосон зээлийн хөрөнгөөс есөн тэрбум төгрөгийг “Бэрэн групп” рүү шилжүүлэх шийдвэр гаргуулсан гэх үндэслэлээр шалгасан байдаг. Шүүхээс Э.Бат-Үүлд дөрвөн жил хорих, түүний хүү Б.Чулуудайг 15 сая төгрөгөөр торгох, ТОСК-ын захирал асан А.Гантулгад таван жил хорих ял тус тус оноосон билээ.

      Тэгвэл Шүүхийн шийдвэр гүйцэтгэх ерөнхий газрын харьяа хорих 409 дүгээр ангид  хоригдож байгаа хотын дарга асан Э.Бат-Үүлийн хэвлэн нийтлэх эрх чөлөөг  хязгаарласантай холбоотой тэрбээр энэ сарын 23-ны өдөр өлсгөлөн зарлаж байгаагаа мэдэгдсэн. Энэ талаар түүний өмгөөлөгч хэлэхдээ “Монгол Улсын Үндсэн хуульд хэвлэн нийтлэх эрх чөлөөний тухай тусгасан байдаг. Гэтэл дамжин өнгөрөх 409 дүгээр ангид ял эдэлж байгаа миний үйлчлүүлэгчийн хэвлэн нийтлэх эрх чөлөөг анх хоригдсон цагаас нь хязгаарласан. Тиймээс өлсгөлөн зарлахаас өөр аргагүй байна. Энэ хүн өөрийгөө гэм буруугүй, намайг суллаач гэж өлсгөлөн зарлаагүй.  Манай улсад Ардчилсан хүний эрх маш аюултай түвшинд хүрсэн байна. Энх тайвныг л уриалсны төлөө түүний хэвлэн нийтлэх эрх чөлөөг хаасан" гэсэн юм. Тэгвэл өнгөрсөн  мягмар гараг прокурорын байгууллагаас түүний хэвлэн нийтлэх, үзэл бодлоо илэрхийлэх эрх чөлөөг сэргээсэн тул тэрбээр өлсгөлөнгөө зогсоосон талаар Ардчилсан намын дэд дарга Ц.Оюундарь мэдээллийн үеэр хэлсэн билээ.

Бид энэ талаар ШШГЕГ-ын Хэвлэл мэдээллийн төвийн дарга, хошууч Х.Баясгалангаас тодрууллаа. Тэрбээр  “Э.Бат-Үүл өлсгөлөн огт зарлаагүй. Тиймээс өлсгөлөнгөө зогсоосон гэдэг мэдээлэл бодит бус, ташаа мэдээлэл байна. Иймд та бүхнийг үнэн, бодит мэдээллийг авч байхыг хүсье. Бид ч өмнө Э.Бат-Үүлийг өлсгөлөн зарлаагүй талаар мэдээлж байсан” гэв.