Нийслэлийн Баянзүрх дүүргийн 97 дугаар сургуулийн бага ангийн багш Ц нь сурагчаа зодож, танхайрсан хэрэг гарсан. Тодруулбал, тус багш нь хоёрдугаар ангийн сурагч охиныг тэгш шугамд цэвэрхэн бичээгүй гэх шалтгаанаар толгой, гар хэсэг рүү нь зодож, бэртээсэн юм.

         Охины ар гэрийнхэн гомдолтой байгаагаа илэрхийлж, цахим сүлжээнд охиныхоо гарын зургийг нийтэлснээр эл хэрэг ил болсон билээ. Сурагчаа зодож, танхайрсан багш өөрийн хүсэлтээр ажлаасаа чөлөөлөгдөх өргөдлөө өгч, хэргийг Баянзүрх дүүргийн хоёрдугаар хэлтэст шалгаж байгаа. Охины биеийн байдал хэвийн бөгөөд сургуульдаа явж байгаа аж.

      Тэгвэл сургууль дээр нь хэд хэдэн удаа асуудал гарч, олон нийтийн шүүмжлэл дагуулаад байсан 97 дугаар сургуулийн захирал Б.Алтанцэцэг ажлаасаа чөлөөлөгдөх өргөдлөө мөн өгчээ. Энэ талаар түүнээс өөрөөс нь тодруулахад “Би өөрийн хүсэлтээр ажлаасаа чөлөөлөгдөх өргөдлөө өгөөд, ажлаа хүлээлгэж өгсөн байгаа. Гэхдээ бага ангийн багш Л.Цэрэндуламыг асуудал гаргахаас өмнө нь өргөдлөө өгсөн байсан. Миний ажлаа өгсөн шалтгаан нь Л.Цэрэндулам багштай холбоогүй. Надад ажлын санал ирчихсэн байсан. Би цаашид боловсролын салбартаа ажиллана” гэв.