Хэдхэн сарын өмнө Сонгинохайрхан дүүргийн Тохижилт, нийтийн аж ахуйн хэлтсийн хоёр ажилтан гараараа мөс хайлуулах давс, бодис цацаж байгаа бичлэг цахим орчинд цацагдаад байсан билээ. Тэгвэл өнөөдөр Орхон аймгийн Хот тохижилтын газрын ажилтнууд машин дээр суугаад, гараараа давс цацаж байгаа бичлэг мөн л цахим сүлжээнд цацагдаад байна.

         Энэ талаар тус аймгийн Хот тохижилтын газрын Б.Оюунбаяраас тодрууллаа. Тэрбээр “Өнөөдөр манай аймагт цас орж, халтиргаа гулгаа нэмэгдсэн. Манай газарт зориулалтын давс, бодис цацах машин байхгүй. Харин механикжсан машин бол байдаг. Тус машин маань мотор нь эвдэрчихсэн учраас өнөөдрийн нөхцөл байдал үүслээ. Цас орсон үед хугацаа алдахгүйгээр арга хэмжээ авч, халтиргаа гулгаанаас сэргийлэхгүй бол иргэд эд хөрөнгөөрөө хохирох аюултай. Ийм учраас манай гурван ажилтан гараараа давс цацах арга хэмжээ авсан байна” гэлээ.