БШУ-ны яаманд өнөөдөр төсвийн тогтолцоог цахим хэлбэрт шилжүүлэх төслийн нээлт боллоо. Нээлтийн арга хэмжээнд Сангийн сайд Б.Жавхлан оролцож, үг хэлсэн юм. Энэ үеэр сэтгүүлчид Б.Жавхлан сайдаас цаг үеийн зарим асуудлуудыг тодрууллаа.

-Долдугаар сарын 1-нээс “Ковид-19” халдварын үед хэрэгжүүлж буй хөнгөлөлт болон бусад арга хэмжээ дуусч байна. Үүнд ямар нэг зохион байгуулалт төлөвлөж байгаа юу?

-Ирэх долдугаар сарын 1-нээс бүх халамжийн арга хэмжээ зогсоно. Хүүхдийн мөнгө 20 мянга болж, тог, дулаан, ус зэргийн төлбөр төлөгдөж эхэлнэ. Энэ асуудал улсын төсвийн хувьд тулгамдсан асуудал. Иймд эрсдэлийн шинжилгээ хийж байна. Төсвийн хөрөнгө оруулалт, төрийн өмчит компаниуд яаж ажиллах вэ зэрэг хүчин зүйлүүд хамаарна. Ямар дэглэм рүү шилжих ёстойг ковидын нөхцөл байдалтай уялдуулан тооцож байна. Тодорхой төлөвлөгөө гараагүй. Энэ асуудлыг чухалчлан анхаарна.

-Боловсролын зээлийн сан санхүүжилтгүй болсны улмаас өндөр оноо болон буцалтгүй тусламжаар суралцаад төгсөж буй оюутнуудаас төлбөр нэхэж байна гэх асуудал гараад байгаа. Ямар учраас Боловсролын зээлийн сангийн санхүүжилт тасарсан юм бэ?

-Ер нь их, дээд сургуулийн оюутнуудад олгож буй хавтгайрсан тусламж, зээлээр санхүүжүүлдэг тогтолцоог хална. Цаашид аливаа тусламж, санхүүжилт олгохдоо тодорхой шалгуур үзүүлэлт тавьж, шаардлагатай мэргэжлээр суралцаж буй оюутнуудад хүртээх чиглэлд ажиллана. Мөн шилдэг 10 их сургуульд амжилттай суралцаж буй оюутнуудыг идэвх, сурлага зэрэг тодорхой шалгуурын үндсэнд тусламжид хамруулна. Зөвхөн тооны хойноос хөөцөлддөг оюутнуудад зээлээр санхүүжилт олгохгүй. Сангийн яам ийм байр суурьтай байна.