Манай улс арваннэгдүгээр сарын 12-нд Бүх нийтийн бэлэн байдлын зэрэг тогтоож, хөл хорионы хатуу дэглэмд шилжсэн. Гэвч хөл хорионы хатуу дэглэмийн энэ үед архи согтууруулах ундаа худалдан борлуулсан, улмаар согтууруулах ундаа хэрэглэсэн иргэд гэр бүлийн хүчирхийлэл үйлдэх, бусдын биед халдах зэрэг хэрэг, зөрчил гарсаар байна. Тухайлбал, нийслэлд өнгөрөгч лхагва гарагт гэр бүлийн хүчирхийллийн шинжтэй 40 дуудлага бүртгэгдэж, 83 иргэн эрүүлжүүлэгдсэн. Тэгвэл БГД-ийн Цагдаагийн II хэлтсийн алба хаагчид тус дүүргийн IV хорооны нутаг дэвсгэр, архи согтууруулах ундаа худалдан борлуулсан аж ахуйн нэгж байгууллагыг илрүүлж, таслан зогсоосныг сурвалжиллаа.

Тодруулбал, БГД-ийн IV хорооны “Зоос” гэх дэлгүүр хөл хорионы журам зөрчин, нууцаар архи согтууруулах ундаа худалдан борлуулж байсан бөгөөд тус дэлгүүрээс архи худалдан авсан иргэн 37 настай эрэгтэй Э архидан согтуурсан үедээ гэр бүлийн хүчирхийлэл үйлдэж, хохирогч эмэгтэй О 22:00 цагийн үед дуудлага мэдээлэл өгчээ. Дуудлагын дагуу цагдаагийн алба хаагчид “Зоос” дэлгүүрт худалдаалагдаж байсан 289 шил архийг хураан авч, согтууруулах ундаа худалдах, түүгээр үйлчлэх тусгай зөвшөөрлийг цуцаллаа. Харин архидан согтуурсан үедээ гэр бүлийн хүчирхийлэл үйлдсэн иргэн Э-г эрүүлжүүлэх байранд түр саатуулаад байна.