ДАВХАР ДЭЭЛҮҮДДЭЭ “ТҮҮРТСЭН” ДАРГА НАРЫН ХОТ БОЛЖЭЭ, УЛААНБААТАР

2025-05-09, 95

Хотын дарга Х.Нямбаатар өөрөө албан тушаалд “нугасгүй” хүн. Хууль зүй, дотоод хэргийн сайд байхдаа Засгийн газрын бүх л Ажлын хэсгийг ахалдаг, даргалдаг байлаа. Засгийн газраас зөвхөн 2022 онд Архидалттай тэмцэх, Авлигатай тэмцэх, Нүүрсний хулгайг шалгах гэх мэт 53 Ажлын хэсэг байгуулсны 22-ыг нь Х.Нямбаатар даргалж, төрийн түүхэнд тэмдэглэгдэж үлдэх рекорд тогтоож байв. Өдгөө ч Х.Нямбаатарын нэрний өмнөх гуншин богино биш, НИТХ-ын төлөөлөгч, Нийслэлийн Засаг дарга бөгөөд Улаанбаатар хотын Захирагч, Нийслэлийн МАН-ын хорооны дарга гэх мэтээр.

Гол нь, өдгөө НИТХ-ын 45 төлөөлөгч дунд дан “тэрлэг”-тэй төлөөлөгч нэг ч үлдсэнгүй. Багадаа хоёр, тэгээд таван хүртэлх давхар дээлтэй сууцгааж байна. Төлөөлөгч бүр зөвлөх, захирал, захирагч, зохицуулагч, Засаг дарга гэсэн давхар сэтрүүдтэй. Тэгээд болоогүй, ийм ч төслийн удирдагч, тийм ч ТУЗ-ийн дарга, энэ ч газрын дарга, тэр ч үйлдвэрийн дарга гээд бүр утгаа алдаж. Газрын зураг дээр Сонгинохайрхан дүүргийн нутагт “Агро-Сити” эдийн засгийн бүс гэж байгуулаад л НИТХ-ын нэг төлөөлөгчийг Захирагч сэтэртэй болгочихож байгаа юм. Налайх дүүрэгт ч мөн ялгаагүй. Дүүрэг нь Засаг даргатай, дүүрэг дотроо бүстэй, тэр нь бүс нь тусдаа Захирагчтай, бүр завхарч байгаа биз дээ. Эгээ л Төв талбайн Түр асарын Захирагч гэж томилох нь холгүй байна.

Цаашлаад, “Нийслэлийн орон сууцны корпораци” гэж том бүтэцтэй компанитай мөртөө “Улаанбаатар орон сууцжуулалт” гэж шинэ компани байгуулаад л нэг төлөөлөгчийг захирал, таван төлөөлөгчийг ТУЗ-ийн дарга, гишүүны нэмэлт сэтэртэй болгочихож байгаа юм. Нийслэлийн хөрөнгө оруулалтын газар гэж аппарат бий, атал “Улаанбаатар хөрөнгө оруулалт, менежмент” гэж бас нэг нүсэр бүтэцтэй компани байгуулчихсан. Гэх мэтээр НИТХ-ын төлөөлөгчид давхар дээл, даргын сэтэрт “донтсон” мэт л аашилцгааж байна.

Ингээд болоогүй, хэдхэн хоногийн өмнө “Түлшний хяналтын газар” НӨҮГ, “Улаанбаатар кабел кар” НӨҮГ, “КОП-17 хөрөнгө оруулалт, бүтээн байгуулалтын газар” НӨҮГ, “Дулааны тавдугаар цахилгаан станц” НӨҮГ, “Барилгын хог хаягдлыг дахин боловсруулах үйлдвэр” НӨҮГ тус тус шинээр байгуулагдлаа. Тус бүрд нь дарга, захирал, ТУЗ-ийн дарга, гишүүд төлөөлөгчдөөс томилогдоно. Бас жилийн дараа тамгаа авах 14 хотын Захирагчийн томилгоонууд ч төлөөлөгчдийн дунд яригдаад эхэлсэн. Тэгэхээр тун удахгүй 10 албан тушаал зэрэг хашдаг төлөөлөгч “төрөх”-ийг ч үгүйсгэх аргагүй болж байна.

Гол нь, замын цоорхой нөхөх, зуух тараах, бродюр солих, ТҮЦ журамлах, автомашины дугаар хязгаарлахаас өөр нүдэнд харагдах "гавьяа"-гүй яваа Хотын дарга Х.Нямбаатар ба түүний НИТХ-ын төлөөлөгчдийн сэтэр нь ихдэж, сэтгэл нь багадаад байна, үрж байгаа мөнгө нь ихдээд байгаа мөртөө үр дүн огт харагдахгүй байна.

Танилц: НИТХ-ын 45 төлөөлөгч ба тэдний гуншин

А.Баяр- НИТХ-ын төлөөлөгч, НИТХ-ын дарга, НИТХ-ын Зөвлөлийн дарга, Нийслэлийн гэмт хэргээс урьдчилан сэргийлэх ажлыг зохицуулах салбар зөвлөлийн дарга

Б.Ану-Үжин- НИТХ-ын төлөөлөгч, СДМЗХ-ны Нийслэлийн салбар хорооны дарга, “Улаанбаатар Трамбай” төслийн Удирдагч

А.Амартүвшин- НИТХ-ын төлөөлөгч, Хотын даргын Нийгэм, ногоон хөгжил, агаар орчны бохирдлын асуудал хариуцсан Хоёрдугаар орлогч, Нийслэлийн өмчит “Тархмал эрчим хүчний дэд бүтэц” ХХК-ийн ТУЗ-ийн дарга, “Багахангайн үйлдвэрлэл, технологийн парк” ХК-ийн ТУЗ-ийн дарга

Л.Ариунтуяа- НИТХ-ын төлөөлөгч, Нийслэлийн Соёлын төв өргөөний захирал, Нийслэлийн Бүсчилсэн хөгжлийн хорооны дарга

Д.Бадарсан- НИТХ-ын төлөөлөгч, Хотын даргын орлогчийн статустай Нийслэлийн бүтээмжийн менежер

Г.Батбаяр- НИТХ-ын төлөөлөгч, “Агро-Сити” эдийн засгийн тусгай бүсийн Захирагч, “Улаанбаатар хөрөнгө оруулалт, менежмент” ХХК-ийн ТУЗ-ийн гишүүн

Г.Батсайхан- НИТХ-ын төлөөлөгч, Нийслэлийн Зам тээвэр, хөдөлгөөн зохицуулалтын хорооны дарга, Хотын даргын Шинжлэх ухаан, технологи, инновацын асууудал хариуцсан зөвлөх, “Улаанбаатар-2040” лобби бүлгийн дарга, Нийслэлийн өмчит “Улаанбаатар түншлэл төв” ХХК-ийн ТУЗ-ийн дарга

Ц.Баттөр- НИТХ-ын төлөөлөгч, Сонгинохайрхан дүүргийн Засаг дарга, “Нийслэлийн хөрөнгө оруулалтын газар” НӨҮГ-ын ТУЗ-ийн гишүүн

Г.Батзориг- НИТХ-ын төлөөлөгч, Улаанбаатар хотын Ерөнхий менежер бөгөөд Захирагчийн Ажлын албаны дарга, Нийслэлийн өмчит “Тархмал эрчим хүчний дэд бүтэц” ХХК-ийн Гүйцэтгэх захирал, “Хот төлөвлөлт, судалгааны институт” НӨҮГ-ын Удирдах зөвлөлийн дарга

Т.Батцогт- НИТХ-ын төлөөлөгч, НИТХ дахь АН-ын бүлгийн дарга, Нийслэлийн АН-ын дарга, “Улаанбаатар хотын хөгжлийн корпораци” ХК-ийн ТУЗ-ийн гишүүн

Ч.Батзориг- НИТХ-ын төлөөлөгч, Хотын даргын Санхүү, дэд бүтцийн хөрөнгө оруулалт хариуцсан зөвлөх, “Хэсэгчилсэн инженерийн хангамжийн удирдах газар” НӨҮГ-ын Удирдах зөвлөлийн дарга

Ж.Батбаясгалан- НИТХ-ын төлөөлөгч, “Орон сууц, нийтийн аж ахуйн удирдах газар” НӨҮГ-ын ТУЗ-ийн дарга, “Ус сувгийн удирдах газар” НӨҮГ-ын ТУЗ-ийн дарга

Т.Даваадалай- НИТХ-ын төлөөлөгч, Хотын даргын Эдийн засгийн хөгжил, дэд бүтцийн асуудал хариуцсан Нэгдүгээр орлогч, “Улаанбаатар хотын хөгжлийн корпораци” ХК-ийн ТУЗ-ийн гишүүн, “Зорчигч тээвэр хоёр” НӨҮГ-ын Удирдах зөвлөлийн дарга

С.Даваасүрэн- НИТХ-ын төлөөлөгч, Багануур дүүргийн Засаг дарга

Б.Дөлгөөн- НИТХ-ын төлөөлөгч, Монголын хөрөнгийн биржийн захирал, Ерөнхий сайдын дэргэдэх Эдийн засгийн бодлогын зөвлөлийн Ажлын албаны дарга, “Улаанбаатар хөрөнгө оруулалт, менежмент” ХХК-ийн ТУЗ-ийн гишүүн

Д.Жавхлан- НИТХ-ын төлөөлөгч, “Улаанбаатар орон сууцжуулалт” ХХК-ийн ТУЗ-ийн гишүүн

Г.Жаргалсайхан- НИТХ-ын төлөөлөгч, Баянзүрх дүүргийн Засаг дарга, “Зорчигч тээвэр гурав” НӨҮГ-ын ТУЗ-ийн гишүүн

Б.Золтуяа- НИТХ-ын төлөөлөгч, Нийслэлийн Ногоон хөгжлийн хорооны дарга

О.Зундуйдорж- НИТХ-ын төлөөлөгч, “Орон сууц, нийтийн аж ахуйн удирдах газар” НӨҮГ-ын ТУЗ-ийн гишүүн, “Зорчигч тээвэр хоёр” НӨҮГ-ын ТУЗ-ийн гишүүн

Д.Ихбаяр- НИТХ-ын төлөөлөгч, НИТХ дахь МАН-ын бүлгийн дарга, “Улаанбаатар хотын хөгжлийн корпораци” ХК-ийн ТУЗ-ийн дарга, “Улаанбаатар орон сууцжуулалт” ХХК-ийн ТУЗ-ийн дарга

Н.Мандуул- НИТХ-ын төлөөлөгч, Чингэлтэй дүүргийн Засаг дарга

Б.Мөнхбат- НИТХ-ын төлөөлөгч, Нийслэлийн хөрөнгө оруулалтын газрын дарга

Б.Мөнхбаатар- НИТХ-ын төлөөлөгч, “Сэлбэ хорин минутын хот корпораци” ХХК-ийн ТУЗ-ийн гишүүн, “Эмээлт эко аж үйлдвэрийн парк” ХК-ийн ТУЗ-ийн гишүүн

Ч.Мэндбаяр- НИТХ-ын төлөөлөгч, Нийслэлиийн орон сууц, нийтийн аж ахуйн удирдах газрын дарга

Б.Мягмар- НИТХ-ын төлөөлөгч, Нийслэлийн өмчит “Эмээлт эко аж үйлдвэрийн парк” ХХК-ийн Гүйцэтгэх захирал

Д.Наянбаяр- НИТХ-ын төлөөлөгч, Налайх дүүргийн Засаг дарга

Д.Отгонсүрэн- НИТХ-ын төлөөлөгч, Шадар сайд С.Амарсайханы зөвлөх, Налайх дүүргийн “Налуу-Ухаа” эдийн засгийн тусгай бүсийн Захирагч

Т.Отгонболд- НИТХ-ын төлөөлөгч, “Зорчигч тээвэр гурав” НӨҮГ-ын ТУЗ-ийн дарга

Ү.Оюунзул- НИТХ-ын төлөөлөгч, Нийслэлийн Хүний хөгжлийн хорооны дарга, Гэрлэх ёслолын ордны захирал

З.Одонтуяа- НИТХ-ын төлөөлөгч, Нийслэлийн өмчит “Сэлбэ хорин минутын хот корпораци” ХХК-ийн Гүйцэтгэх захирал, “Нийслэлийн Соёлын төв өрөө”НӨҮГ-ын Удирдах зөвлөлийн гишүүн

Ж.Сандагсүрэн- НИТХ-ын төлөөлөгч, Нийслэлийн эдийн засаг, төсөв, хөрөнгө оруулалтын хорооны дарга, “Улаанбаатар хотын хөгжлийн корпораци” ХК-ийн Гүйцэтгэх захирал, Нийслэлийн өмчит “Эмээлт эко аж үйлдвэрийн парк” ХХК-ийн ТУЗ-ийн дарга

Ө.Сумъяабаатар- НИТХ-ын төлөөлөгч, Баянгол дүүргийн Засаг дарга

Б.Сэмжидмаа- НИТХ-ын төлөөлөгч, Нийслэлийн Засаглал, эрх зүйн хорооны дарга

Б.Сэргэлэнбаатар- НИТХ-ын төлөөлөгч, Төв аймгийн МАН-ын хорооны дарга, “Нийслэлийн хөрөнгө оруулалтын газар” НӨҮГ-ын ТУЗ-ийн гишүүн

З.Төмөртөмөө- НИТХ-ын төлөөлөгч, Нийслэлийн өмчит “Улаанбаатар орон сууцжуулалт” ХХК-ийн Гүйцэтгэх захирал, “Налайхын үйлдвэрлэл технологийн парк” ХК-ийн ТУЗ-ийн дарга

Ц.Төрхүү- НИТХ-ын төлөөлөгч, Нийслэлийн Ус сувгийн удирдах газрын дарга, “Зорчигч тээвэр нэг” НӨҮГ-ын ТУЗ-ийн гишүүн

Г.Ууганбаяр- НИТХ-ын төлөөлөгч, Хотын даргын Хот, нийтийн аж ахуйн асууудал хариуцсан зөвлөх

Д.Ундармаа- НИТХ-ын төлөөлөгч, “Нийслэлийн жижиг, дунд үйлдвэр, үйлчилгээг дэмжих төв”-ийн дарга

Л.Хосбаяр- НИТХ-ын төлөөлөгч, Нийслэлийн Санхүү, эдийн засаг, хөгжлийн бүтээн байгуулалтыг эрчимжүүлэх төсөл, хөтөлбөрийн зохицуулагч, Хотын даргын орлогчийн статустай Нийслэлийн бүтээмжийн менежер, “Улаанбаатар хөрөнгө оруулалт, менежмент” ХХК-ийн ТУЗ-ийн дарга

Б.Хуягбаатар- НИТХ-ын төлөөлөгч, “Зорчигч тээвэр нэг” НӨҮГ-ын захирал, “Багануур үйлдвэрлэл, технологийн парк” ХК-ийн ТУЗ-ийн дарга

Э.Энхтөр- НИТХ-ын төлөөлөгч, “Зорчигч тээвэр хоёр” НӨҮГ-ын захирал

Б.Эрдэнэсүх- НИТХ-ын төлөөлөгч, Сүхбаатар дүүргийн 16-р хорооны Засаг дарга

Ж.Энхжаргалан- НИТХ-ын төлөөлөгч, Хотын даргын Нийгмийн хөгжил, бүтээн байгуулалтын бодлого хариуцсан зөвлөх, Нийслэлийн өмчит “Төв цэнгэлдэх хүрээлэн” ХК-ийн Гүйцэтгэ захирал, “Зорчигч тээвэр гурав” НӨҮГ-ын ТУЗ-ийн гишүүн

Э.Хулан- НИТХ-ын төлөөлөгч, “Түлшний хяналтын газар” НӨҮГ-ын ТУЗ-ийн гишүүн, “Нийслэлийн хөрөнгө оруулалтын газар” НӨҮГ-ын ТУЗ-ийн гишүүнээр тус тус ажиллаж байна.

ДАВХАР ДЭЭЛҮҮДДЭЭ “ТҮҮРТСЭН” ДАРГА НАРЫН ХОТ БОЛЖЭЭ, УЛААНБААТАР

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.