-УИХ-ЫН ГИШҮҮН Г.ДАМДИННЯМЫГ ЦАГДАА БИТГИЙ ХЭЛ, МОНГОЛЧУУД “ХУЛГАЙН” ХЭРГЭЭР НЬ ТАНЬДАГ БОЛЖ, “САХАЛ” ХОЧИТ Ж.БАТ-ЭРДЭНЭД ӨМДӨӨ ӨМСӨХ ЗАВ ОЛДЖЭЭ

Өнгөрсөн жилийн өдийд манай УИХ-ын гишүүд бужигнуулж байлаа. Нэг нь цахим чуулганыхаа хойморт дотоожтойгоо гүйгээд, нөгөө нь “Танай цагдаа нар намайг танихгүй 30 минут зогсоож, шалгалаа. Би чинь УИХ-ын гишүүн хүн” гэж цээж, хошуу хоёроо дэлдэж, Хууль зүйн сайддаа чуулганы индэрээс хов хүргэж байлаа. Нөгөө нэг нь УИХ-ын цахим хуралд чээж зургаа үлдээгээд, “зугаалж” явлаа.

                Тодруулбал, хатуу хөл хорио тогтоож, хот, хөдөөгүй л “Төрийн эрх баригчдаас ямар шийдвэр гарч, иргэдийн амьдралд бодитой нэмэр болох нь вэ” гэж нүдээ ширгэтэл харуулдаж суугаа тэр цаг үед УИХ-ын гишүүн Ц.Мөнхцэцэг гал тогооны өрөөндөө боов, боорцог эргүүлсэн шиг Чуулганы хуралдаа “оролцож” байв. Оролцож байсан ч гэж дээ, түүнийг төлөөлж чуулганд "суусан" чээж зураг нэг ч үг хэлэлгүй, хэдэн цаг томоотой “суусан” байдаг. Өөрөөр хэлбэл, тэр Монгол Улсын Засгийн газрыг, Монголын ард түмнийг хууран мэхэлж, зургаа дэлгэцэнд харуулчихаад гэрийн эзэгтэйн ажлаа хийгээд алга болж байсан юм. Тэгээд түүнийгээ “За, та хэд минь хурлын үеэр зургаа тавьлаа гээд байгаа бололтой. Ер нь гэрээс онлайн хурал хийхэд хүүхэд, гэрийнхэн үймүүлэх зүйл бишгүй байх юм. Тиймээс гишүүд үг хэлээгүй үедээ вирталь, чээж зургаа тавих, эсвэл камераа хаах зэргээг бүтэн өдрийн чуулгандаа оролцож байгаа шүү” хэмээн гомдоллож, бүр арьсаа хамгаалаад авсан. Хамгийн муухай нь өөрийнхөө хэнэггүй, хуурамч зангаа хүүхэд рүүгээ “чихэж” орхисон байдаг. Харин одоо эрхэм гишүүн тойргийнхоо ард иргэдийн төлөө чээж зургаа биш, төрсөн биеэрээ ажиллаж байгаа бололтой.

         Харин УИХ-ын гишүүн Ж.Бат-Эрдэнэ дотоожтойгоо чуулгандаа сууж, бужигнуулаад авсан. УИХ-ын гишүүн, “Сахал” хочит Ж.Бат-Эрдэнэ Монгол Улсын 2021 оны төсвийг батлах цахим чуулганд “бандааш”-тайгаа оролцож, улстөрчдийн “бандааш”-ны асуудлыг түүчээлж байлаа. Энэ оны төсвийн орлого тасалдах гээд, алдагдалтай төсөв батлагдах гээд дээр дооргүй бухимдалтай, хажуугаар нь хэсэг бүлэг нь ирэх Ерөнхийлөгчийн сонгуульд хэдэн төгрөг илүү гаргачих гээд ядаж байх үед “хар бандааш”-тай нэг нөхөр л аягатай айраг барьчихаад босож харайгаад байсан нь Ж.Бат-Эрдэнэ байсан юм. Өнөө “Сахал” ч улсын төсвийг бандааштай баталсандаа гэмшсэн, гэрэвшсэн янзгүй “Уг нь ёс зүйгээ бодоод зангиа хүртэл зүүсэн юм сан”, “Гонжоомтой жомбоолтой биш. Харин ч түмнээ хүндэлж зангиа зүүсэн шүү. Хаха” гэж доромж утгаар пээдэлзэж байв. Тэгснээ “Хүүхдийнхээ дуртай шарсан төмсийг нь хийж өгье дөө” хэмээн “гонжоом”-той зургаа цахим хуудастаа оруулж даапаалж байлаа. Одоо харин түүнд өмдөө өмсөх зав, зай олдсон бололтой. Ямартай ч Чуулганы хуралдаа өмдтэйгөө оролцдог болжээ.

Дараагийн бужигнуулсан “нөхөр” УИХ-ын гишүүн Г.Дамдинням байв. УИХ-д анх удаа Дархан-Уул аймгаас сонгогдсон Г.Дамдинням гишүүн өөрийг нь 30 минут зам дээр зогсоосон төрийн цагдааг сайдад нь “матаж”, гомдоллож байсан удаатай. Г.Дамдинням гишүүн “Намайг замын цагдаа саатуулж, 30 минут зогсоолоо. УИХ-ын гишүүн би төрийн ордонд яаралтай хуралтай байсан. Цагдаа нарын зан харилцаанд анхаарах хэрэгтэй” гэж Х.Нямбаатар сайдад дайж байсан юм.

Харин одоо өөрийг нь таниагүй цагдаад туньж явсан шинэхэн гишүүн Г.Дамдиннямыг монголчууд таньдаг болжээ. Таних танихдаа Хөгжлийн банкны хулгайн хэргээр нь андахгүй мэддэг болжээ.