Ханхүүгийн гэр бүл засварын мөнгийг буцаан төллөө

Их Британийн ханхүү Харригийн гэр бүл Фрогмор харшид хийсэн засварын мөнгийг эргүүлэн төлжээ. Ханхүү Харри, түүний гэргий Меган Маркл нарт зориулан Виндзорын шилтгээний ойролцоох Фрогмор харшийг засварлахад 2.4 сая фунтийг төсвөөс зарцуулсан нь дуулиан болж байв. Залуу хос хуримаа хийснийхээ дараа Кенсингтоны ордонд амьдарч эхэлсэн агаад хүү Арчигаа төрөхөөс өмнө Фрогморт нүүж очиж байжээ. Энэ оны эхээр ханхүү Харри болон түүний гэр бүл Хааны гэр бүлийн албан ёсны бүр үүрэг, хариуцлагаас татгалзаж, харшид засвар хийсэн мөнгийг улсын төсөвт эргүүлэн төлөхөө мэдэгдсэн билээ. Ташрамд, Харри болон Меган нар “Нетфликс”-ийн төслүүд дээр хамтран ажиллах гэрээг өнгөрсөн долоо хоногт байгуулсан юм.

Хүүхдийн хүчирхийлэл нэмэгдсээр байна

Цар тахлын үеэр олон улсын хэмжээнд гэр бүлийн хүчирхийлэл өсөх хандлагатай байна. Тэр дундаа бага насны хүүхэд бэлгийн хүчирхийлэлд өртөх нь нэмэгдсээр байгааг судлаачид онцолжээ. Интерполын цахим хуудсанд мэдээлснээр сургууль, боловсролын байгууллагууд хөл хорионы улмаас хаагдсантай энэ нь холбоотой гэнэ. Хүүхдүүд эцэг эх, асран хамгаалагчидтайгаа үлдэх, интернэтэд цагаа өнгөрүүлж, олон нийтийн сүлжээнд хувийн мэдээллээ оруулж буй нь хүчирхийлэгч, гаж донтнуудад боломж олгож, сэтгэл санаа болон бэлгийн хүчирхийлэлд өртөх эрсдлийг нэмэгдүүлж буйг Интерполын ерөнхий нарийн бичгийн дарга ЮргенШток сэрэмжлүүлжээ.

Беларусь ээлжит бус сонгууль явуулж магадгүй

Беларусийн Төрийн тэргүүн А.Лукашенко Үндсэн хуульд өөрчлөлт оруулж, Ерөнхийлөгчийн ээлжит бус сонгууль зохион байгуулах боломжтой гэж мэдэгдлээ. Ерөнхийлөгчийн сонгуулийн дүнг эсэргүүцсэн жагсаал, арга хэмжээ таван долоо хоногийн турш орон даяар өрнөж, үйлдвэр, албан газрын ажилтан, ажилчид ажил хаяад буй юм. Жагсагчид Үндсэн хуульд өөрчлөлт оруулах, ээлжит бус сонгууль явуулах, сөрөг хүчнийхэн болон сэтгүүлчдийг шоронгоос суллахыг шаардаж байгаа билээ.