Сонгинохайрхан дүүргийн усан бассейнд “D.BAYARAA CUP-2026” усанд сэлэлтийн тэмцээн 2026 оны аравдугаар сарын 3-4-ний өдрүүдэд боллоо. Тус тэмцээнд 24 клубийн 418 тамирчин хурд хүч, ур чадвараа сорин өрсөлдлөө. Тамирчид 25 м болон 50 м-ийн зайн төрлүүдэд өрсөлдсөн нь тус тэмцээний нэгэн онцлог байлаа.

   Монголын пара усан спортын үндэсний холбооны харааны бэрхшээлтэй гурван тамирчин амжилттай оролцов. Тэдний нэг болох Ө.Мөнхтөр пара Азийн наадамд эх орноо төлөөлөн оролцох гэж байна. “Special Swimming Academy Mongolia”-ийн аутизм болон даун синдромтой хоёр тамирчин тэмцээнд оролцсон нь онцгой бахархалтай мөч байсан. Тус академийн тамирчин Ган-Од 2027 онд Чили Улсад болох тусгай олимпын наадамд оролцохоор бэлтгэж байна.

   Тэмцээний шүүлтийн чанар, ил тод байдлыг дээшлүүлэх зорилгоор “VAR” системийг амжилттай ашиглаж, тамирчдыг даган бичлэг хийх камераар уралдааны явцыг хянах зэргээр олон улсын стандартад нийцүүлэн зохион байгуулахыг зорин ажиллалаа. Тэмцээний уралдаануудыг үзэгчдэд “LIVE” шууд дамжуулалтаар хүргэсэн бөгөөд дамжуулалтыг мэргэжлийн, чанарын өндөр түвшинд бэлтгэн хүргэв.

Багийн нийлбэр дүнгээр:

1-р байр — “We Aquatics” Club

2-р байр — “Сэлэм Загас” клуб

3-р байр — “Говийн-Усчид” клуб.