Авлигатай Тэмцэх Газараас Нийслэлийн Засаг дарга бөгөөд Улаанбаатар хотын захирагч асан Х.Нямбаатарыг эрүүгийн хэрэгт яллагдагчаар татах саналаа прокурорын байгууллагад албан ёсоор хүргүүлсэн байна.

        Тодруулбал, түүнийг Нийслэлийн Засаг даргаар ажиллаж байх хугацаандаа Эрүүгийн хуулийн тусгай ангийн 22.1 дүгээр зүйлд заасан "Эрх мэдэл, албан тушаалын байдлаа урвуулан ашиглах" гэмт хэрэг үйлдсэн байж болзошгүй гэх үндэслэлээр мөрдөн шалгаж байгаа юм. Уг хэрэг нь олон нийтийн дунд шүүмжлэл дагуулаад байсан, нийт 2.3 их наяд төгрөгийн төсөвт өртөг бүхий "Туулын хурдны зам" болон "Тойрог зам 1, 2" төслүүдтэй холбоотой аж. Засгийн газар болон одоогийн хотын удирдлагуудын зүгээс уг төслүүдийг албан ёсоор зогсоох шийдвэр гаргаад байгаа билээ.

       АТГ-ын мөрдөн шалгах хэлтсээс гаргасан яллагдагчаар татах саналыг одоогоор Нийслэлийн прокурорын газарт хянан хэлэлцэж байна. Прокурорын байгууллага уг саналыг үндэслэлтэй гэж үзвэл Х.Нямбаатарт албан ёсоор ял сонсгож, мөрдөн байцаалтын ажиллагааг үргэлжлүүлэх юм.

     Түүнчлэн уг хэрэгтэй холбогдуулан Х.Нямбаатарыг хотын дарга байх үед хамт ажиллаж байсан орлогч нарыг нь шалгаж эхэлжээ. Тодруулбал, Эдийн засгийн хөгжил, дэд бүтцийн асуудал хариуцсан нэгдүгээр орлогч асан Т.Даваадалайг ашиг сонирхлын зөрчлийн хэргээр шалгаж дуусан, хэргийг шүүхэд шилжүүлээд байгаа бол Ногоон хөгжил, агаар орчны бохирдлын асуудал хариуцсан орлогч асан Л.Хосбаярын гэр болон ажлын байранд АТГ-аас нэгжлэг хийн, мөрдөн шалгах ажиллагааг үргэлжлүүлж байгаа ажээ.