ДХИС-ийн Онцгой байдлын сургууль болон Цахилгаан холбоо, автоматжуулалтын инженерүүдийн холбоо хамтран цахилгаан тоног төхөөрөмжийн галын аюулгүй байдал, урьдчилан сэргийлэлт, эрт илрүүлэлт, мэдээлэх систем болон галын дохиоллын автомат системийн чиглэлээр мэргэшүүлэх сургалт зохион байгуулж, оролцогчдод гэрчилгээ олгожээ.

    Олон улсын магадлан итгэмжлэгдсэн “Онцгой байдал–Гамшиг судлал” бакалаврын сургалтын хөтөлбөрийн хүрээнд зохион байгуулсан 28 багц цагийн сургалтад Онцгой байдлын сургуулийн багш, төгсөх дамжааны сонсогчид хамрагдсан байна.

   Сургалтыг тус сургуулийн “Цахилгаан тоног төхөөрөмжийн галын аюулгүй байдлын лаборатори”, “Автомат систем, усан хангамжийн лаборатори”-ийг түшиглэн зохион байгуулж, онолын мэдлэгийг практик дадлагатай хослуулжээ. Сургалтаар гал түймрийг эрт илрүүлэх, зарлан мэдээлэх, автомат унтраах тоног төхөөрөмж, системийн талаарх мэдлэг олгохын зэрэгцээ барилга, байгууламжийн галын автоматжуулалтын системд үзлэг, шалгалт хийх, тоног төхөөрөмжийн бэлэн байдал, найдвартай ажиллагаа болон стандартын шаардлагад нийцэж буй эсэхийг үнэлэх арга зүйд сургажээ.

     Ингэснээр оролцогчид цахилгаан тоног төхөөрөмжөөс үүдэлтэй гал түймрийн эрсдэлийг бууруулах, галын автомат системийн ажиллагаанд мэргэжлийн үнэлгээ хийх чиглэлээр практик ур чадвар эзэмшсэн байна.