Еврогийн ханш сүүлийн 17 сарын хамгийн доод түвшинд хүрлээ

2026-10-06, 77

Бүс даяарх улс төрийн тодорхойгүй байдал болон эдийн засгийн түгшүүртэй нөхцөлөөс шалтгаалан еврогийн ханш сүүлийн 17 сарын доод түвшнийг заалаа. Нөгөө талд АНУ-ын засгийн газрын бондын өгөөж дээшилснээр долларын ханш үргэлжлэн өсөж байна.

Азийн бүсийн санхүүгийн зах зээл нээгдэж, арилжаа эхлэх үеэр еврогийн ханш бага зэрэг буурч 1.1220 ам.долларт хүрсэн. Өнгөрсөн долоо хоногийн 1.2%-ийн уналт улам даамжирч 2025 оны тавдугаар сараас хойших хамгийн доод цэгтээ хүрч байна. Франц дахь өрийн өндөр түвшин болон улс төрийн мухардал, мөн Испанид болох гэж буй ээлжит бус сонгууль зэрэг хүчин зүйлсийн нөлөө Европын нэгдсэн валютад багагүй дарамт үзүүлээд байна. Еврогийн ханш унаж байгаа нь Францын зээлийн өртөг огцом өсөлтөд төдийгүй евро бүсийн бусад орнуудад хүртэл нөлөөлж эхэлсэн.

Commonwealth Bank of Australia-ийн стратегич Жозеф Капурсо "Еврогийн ханш цаашид ч унах төлөвтэй байгаа. Ханш 1.10 ам.доллароос буурна гэж таамаглаж байна. Энэхүү ханшийн сулралд гайхах зүйлгүй... Еврогийн ханш өсөхийн тулд газрын тосны үнэ эрс буурах, эсвэл Европын мөнгөний бодлого эрс чангарах шаардлагатай. Мөн төсвийн алдагдлаа хумих тал дээр эмх цэгцтэй ажиллах ёстой. Гэвч ойрын хугацаанд тийм зүйл болох ямар ч боломжгүй" гэсэн юм.

Санхүүгийн зах зээлд ам.долларын ханш дээшилж, өнгөрсөн шөнө сүүлийн хэдэн арван жилийн хамгийн дээд цэгтээ хүрсэн. Үүнд АНУ-ын бондын өндөр өгөөж голлох үүрэгтэй байлаа. Японы иений эсрэг ам.долларын ханш яльгүй өсөж 157.92 болж чангарсан бол стерлинг фунт 0.02%-аар буурч 1.3222 ам.доллар болжээ. Ам.долларын индекс 102.16 нэгжид тогтворжоод байна.

АНУ-ын хөдөлмөрийн зах зээлийн мэдээлэл хүлээлтээс сул гарсан. Тиймээс энэ сард Холбооны Нөөцийн Сан (ХНС) бодлогын хүүгээ нэмэгдүүлэх багадлал буурч байгаа. Гэхдээ төв банк мөнгөний бодлогоо цаашид ч улам чангаруулах шаардлагатай гэж хөрөнгө оруулагчид тооцож буй учир ам.долларын хүчтэй байдал хадгалагдсаар байна. Barclays банкны шинжээчид: "Хэдий инфляц болон бусад тоо баримтууд мөнгөний бодлогоо яаралтай чангаруулах шаардлагыг багасгаж байгаа ч өртгийн дарамт инфляцыг 2%-д хадгалах эсэхэд эргэлзээ төрүүлж байна" хэмээн тэмдэглэжээ.

АНУ-ын үйлчилгээний салбарын идэвхжил есдүгээр сард сааарсан ч дотоодын эрэлт сайн байгаа тул нийлүүлэлтийн тогтвортой байдлыг хангаж чадсан. Инфляц ирэх он хүртэл өндөр түвшинд хадгалагдаж магадгүй байна.

Эх сурвалж: Reuters.com

Еврогийн ханш сүүлийн 17 сарын хамгийн доод түвшинд хүрлээ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.