АНУ-ын тэнгисийн бүслэлт Ираны санхүүгийн гол судал болох газрын тосны экспортыг тасалсан. Үүний улмаас өргөн хэрэглээний бараа бүтээгдэхүүний үнэ нэмэгдэж, иргэд байрны түрээсээ ч төлж чадахгүйд хүрээд байна.

    Ираны жирийн иргэд өндөр түрээсийн улмаас Техранаас нүүхээс өөр аргагүй болж байгаа, эмээ авч дийлэхгүйд хүрсэн олон мянган хүн дайны дам хохирогч болсоор байгаа юм.

         Иран Улс АНУ болон дэлхий даяар бензин, газрын тосны үнийг өсгөн, Ормузын хоолойгоор гарах Персийн өвөрмөц бүс нутгийн эрчим хүчний экспортод хаалт тавьж буй. Энэхүү эдийн засгийн дарамт дипломат буулт хийхэд түлхэц болж чадах эсэх нь одоогоор тодорхойгүй байна.

Гэхдээ Ираны баримталж буй дипломат харилцааны сүүлийн үеийн идэвхжил нь дээрх эдийн засгийн хүндрэлээс үүдэлтэй гэж АНУ, Ойрхи Дорнод болон дотоодын эх сурвалжууд өнгөрсөн долоо хоногт мэдээлсэн. Ираны засгийн газар нийгэмд эмх замбараагүй байдал үүсэхээс сэрэмжилж байгаагаа удаа дараа илэрхийлсэн. Эсэргүүцэл, үймээн самууны шинж чанартай ямар нэгэн үйлдэлд хатуу арга хэмжээ авч байгаа гэлээ.

      АНУ болон Израил Ираны эсрэг дайныг эхлүүлэхээс сар гаруйн өмнө буюу нэгдүгээр сард олон жилийн турш урхагшсан эдийн засгийн дарамтад бухимдсан иргэд эсэргүүцэл илэрхийлэн мянга мянгаараа жагссан. Тухайн үед жагсагчдыг эрх баригчид буудан хөнөөсөн байдаг.

Ройтерс агентлагтай ярилцсан олон арван иран иргэн өдөр тутмын асуудалдаа түүртсэн байгаа тул жагсаал цуглааны талаар бодох сөхөөгүй байгаагаа илэрхийллээ.

   Дайны улмаас хувийн хэвшлийн салбар даяар олон мянган хүн ажлын байраа алдсаар байна. Амьжиргааны түвшин буурч, иргэдийн худалдан авах чадвар эрс багассаныг эх сурвалжууд мэдээлж байна.