“Дэлхийн соёлын фестиваль – Ханой 2026” арга хэмжээ 2026 оны аравдугаар сарын 1-4-ний өдрүүдэд Ханой хотноо Танг Лонгийн Эзэн хааны цайзад “Өв соёлыг нэгтгэж – Ирээдүйг цогцлооё” уриан дор ёслол төгөлдөр болж өнгөрөв. БНСВУ-ын Соёл, спорт, аялал жуулчлалын яам, Гадаад хэргийн яам, Ханой хотын Ардын хорооноос хамтран зохион байгуулж буй тус фестивальд 50 улс, олон улсын байгууллага оролцсон байна.

      Монгол Улсаас БНСВУ-д суугаа Элчин сайдын яам тус улсад суралцаж буй оюутнуудын хамт тус фестивальд оролцож, Монгол Улс эх орныхоо түүх, соёл, уламжлал, нүүдлийн иргэншил, үндэсний өв, зан заншилыг Вьетнамын ард иргэд болон олон улсын зочид, төлөөлөгчдөд сурталчлан таниулжээ. Монголын үндэсний асарт Монгол орны түүх, соёл, уламжлал, байгаль, нүүдлийн ахуйг харуулсан гэрэл зураг, мэдээллийн материал, үндэсний өв соёлын үзүүлэнгүүдийг дэлгэн толилуулж, зочдод Монгол Улсын түүх, соёлын онцлог, баялаг өв уламжлалыг танилцуулсан байна.

    Мөн фестивалийн хүрээнд зохион байгуулагдаж буй Үндэсний хувцасны загварын парад (Fashion Parade)-д оролцож, монгол үндэсний хувцас загварын онцлогийг олон улсын үзэгчдэд сурталчлан таниулав. Тус арга хэмжээ нь Монголын түүх, соёл, уламжлал, үндэсний өвийг Вьетнамын ард иргэд болон олон улсын зочид төлөөлөгчдөд сурталчлан таниулахын зэрэгцээ Монгол, Вьетнамын ард түмний найрамдал, нөхөрлөлийг бэхжүүлэх, соёлын солилцоог өргөжүүлэн хөгжүүлэхэд чухал ач холбогдолтой болжээ.