“The Voice of Mongolia” шоуны шилдэг оролцогч Ц.Мөнхбаяр буюу Мөнхлэйг энэ удаагийн “Залуус” буландаа урьж, ярилцлаа.

-Танд энэ өдрийн мэнд хүргэе. “The Voice of Mongolia” шоунд тун амжилттай оролцлоо шүү дээ. Анх шоунд оролцохоор шийдсэн үеэс нь яриагаа эхлэх үү?

            -Баярлалаа. Та бүгдэд энэ өдрийн мэндийг хүргэе. “The Voice of Mongolia” шоунд оролцсондоо туйлын их баяртай байгаа. Миний амьдралын хамгийн тод дурсамжуудын нэг болон үлдэж байгаа. Шоуны реклам зурагтаар явах болгонд оролцох, өөрийгөө сорьж үзэх хүсэл үргэлж төрдөг байсан. Тэгээд энэ жил ““The Voice of Mongolia” шоуны бүртгэл явагдаж эхэллээ” гэсэн рекламыг үзсэн даруйдаа зориг гарган оролцох шийдвэрээ гарган оролцохоор шийдсэн. Өөрийгөө өөр талаас нь нээж, гайхалтай баг хамт олонтой танилцаж хамтран ажилласандаа маш их баяртай байдаг.

-Эхний шатанд шүүгчдийг эргэх мөчид ямар мэдрэмж төрсөн бэ?

            -Тайз руу гарахаар алхаж байх мөчөөс л сандрал дээд цэгтээ тулсан. Хөл, гар бадайрч, адреналин маань хүчтэй ялгарч өмнө нь авч байгаагүй их сандралыг мэдэрсэн гэхэд болно.

            Шүүгчид эргэх болов уу яах бол, үзэгчид яаж хүлээж авах бол гээд олон бодлууд толгойд эргэлдэж байсан. Хөгжим явж эхлэхэд нүдээ аниад өөрийн дотоод ертөнцдөө очоод дуулж эхэлсэн. Нүдээ нэг нээхэд Биг Жий ах эргээд харчихсан байсан. Нүдээ эргэж хаагаад буцаад нээхэд Ука шүүгч эргээд харчихсан хамтдаа инээгээд дуулж байсан. Billie Eilish-ийн “Birds of a feather” дууг сонгон дуулсан маань багагүй зориг надаас шаардсан. Хэдийнээ хит болсон дууг өөрийнхөөрөө илэрхийлэн дуулж, хүмүүст сонсгоно гэдэг маш их зориг байсан. Шүүгчид эргэж харсан байгааг хараад энэ бүх санаа зовнил, олон бодлууд маань намжиж маш их баяр бас догдолсон. Бас би өөрөө өөрийгөө ялан дийлж тайзан дээр гарч чадсан маань үнэхээр сайхан байсан.

-“The Voice of mongolia” шоуны аяллын хамгийн гайхалтай мөч нь хэзээ байсан бэ?

            -Quarter Final шатанд Lil Thug E "Odoo" дууг дуулж хүргэсэн мөч энэ шоуны  хамгийн гайхалтай мөч байсан. Шүүгч маань надад итгэж энэ дууг дуулах боломжийг олгосонд маш их баяртай байдаг. Аль хэдийн үзэгч сонсогчдын хайртай уран бүтээл болсон дууг шоуны тайз дээрээс өөрийнхөө зүгээс дуулж толилуулах нь миний хувьд нэр төрийн бас хэзээ ч мартагдашгүй үйл явдал байсан. Эх хэл дээрээ дуулна гэдэг бас ямар сайхныг мэдэрч байснаа хэлмээр байна.

-Бие даасан уран бүтээлийн ажилдаа орсон байгаа юу. Цаашдаа ямар жанраар уран бүтээл туурвих бодолтой байгаа вэ?

            -Хамтран уран бүтээл хийхээр төлөвлөж байгаа хэд хэдэн ажлууд маань эхэлчихсэн явж байгаа. Түүний дараагаар өөрийн бие даасан уран бүтээл гаргахыг мөн зорьж байна. Шинэ уран бүтээлээрээ уулзах өдрийг тэсэн ядан хүлээж байна.

-Туршиж үзэхийг хүсдэг зүйл бий юү?

            -Туршиж үзэхийг хүссэн олон зүйл байдаг. Мэдээж хүн болгонд тийм хүсэл байдаг гэдэгт эргэлзэхгүй байна. Миний хувьд кино урлагт дүр бүтээж, өөрийгөө сорьж үзэх хүсэлтэй байдаг.

-Өөрийнхөө өнөөдрийг хүртэлх амьдралын түүхийг нэг өгүүлбэрээр илэрхийлбэл?

            -Миний өдөр бүр Зул сар шиг өнгөрдөг.

-Таны бага нас хаана, хэрхэн өнгөрсөн бэ?

                        -Би Өмнөговь аймагт төрж өссөн. Говийн өглөөний нар, нар шингэх дүр зураг хамгийн үзэсгэлэнтэй. Төрж өссөн газрын минь байгалийн гоо үзэсгэлэн миний дотоод сэтгэлд том нөлөө үзүүлсэн гэж боддог. Уян зөөлөн мөн төсөөлөн бодох чадварт суралцахад гол суурь болж өгсөн гэж боддог юм. Миний хүүхэд нас маш энгийн, эрх дураараа, хайраар дүүрэн болж өнгөрсөн. Энгийн юмс бүхэнд гайхамшиг оршдог гэдгийг улам бүр мэдэрсээр л байна.

-Та хэзээнээс урлагийн салбарыг сонирхож, дуучин болохоор зэхэж эхлэв. Хүүхэд байхаасаа урлагтай ойр байв уу?

            -2013 оноос эхлэн урлагийн салбарт орох шийдвэрийг гаргаж байсан. Хүүхэд байхаас л шүлэг унших, бүжиглэх, дуулах дуртай хүүхэд байсан. Төрөл бүрийн хөгжим сонсож, таалагдсан хөгжим дээрээ өөрөө бүжиг зохиож бүжиглэж дуулах дуртай хүүхэд байлаа. Манай аав маань сайхан дуулдаг, дуунд дуртай хүн бий. Харин ээж минь сайхан ардын бүжиг бүжиглэдэг хүн байдаг. Ээж аавынхаа авьяасыг аль алиныг нь өв тэгш өвлөж авсандаа өөрийгөө азтай хүн гэж боддог.

-Гэр бүлийнхээ талаар яриа дэлгэж болох уу?

            -Манайд урлагийн салбарт хүн байдаггүй. Гэхдээ урлагт дуртай, урлагийг хайрладаг гэр бүлд өсөж өндийсөн. Манай гэр бүлийнхэн багш сурган хүмүүжүүлэгч, эмч, цагдаа нар олонтой. Анхдагч урлагийн хүн нь бараг би гэж хэлж болохоор. Гэсэн ч гэр бүлийнхэн маань миний хийж буй зүйлийг үргэлж дэмжиж, намайг араас түлхэж, ар тал минь болж өгдөг. Тэдэндээ үргэлж баярлаж талархаж явдгаа энэ завшаанд хэлмээр байна.

-Та урлагаас өөр мэргэжилтэй бил үү?

            -2019 онд СУИС-ыг театр кино судлаач буюу урлаг судлаач мэргэжлээр сурч төгссөн. Театр болоод кино урлагт хийгдэж буй уран бүтээлүүдэд задлан шинжлэл хийж, ололттой шинэлэг талуудыг бичвэртээ тусгаж бичихийг эрмэлздэг.

-Таны хувьд уран бүтээлчдээс хэнийг нь түлхүү сонсож, үлгэр дуурайлал авч байна вэ?

            -Үлгэр дуурайлал авдаг олон уран бүтээлч бий. Яг нэгийг нь сонгож хэлэх бэрх байгаа ч бүхий л уран бүтээлчдэд өөрийн гэсэн онцлог шинж чанарууд байдаг. Олж авсан туршлагаа амьдралдаа хэрэгжүүлж хийхийг зорьж буй дууны уран бүтээлээрээ бусдад урам зориг, итгэл, хайрыг түгээж бэлэглэхийг хүсдэг.

-Танд урлагаас өөр хобби байдаг уу, чөлөөт цагаа хэрхэн өнгөрүүлж байна вэ?

            -Чөлөөт цагаараа иоганы сургалтад явдаг. Иога нь өөрөө өөрийгөө танин мэдэх аялал гэж хэлж болно. Бидний бие маш ухаалаг бас дахин давтагдашгүй зүйл гэдгийг ойлгож байгаа. Биеийн булчинд санах ой байдаг гэдгийг анх сонсоод явж эхэлж байсан юм. Миний хувьд иогт явж эхэлснээрээ өөрөө өөрийгөө хайрлах урлагт суралцаж байгаа гэж хэлж болно.

-Цаашдын хамгийн том зорилго юу вэ?

            -Өөрийн хийхийг хүссэн зорьсон бүхнээ хийж амжих их хүсэлтэй явдаг. Боломжгүй зүйл гэж байдаггүй. Санаанд чинь багтсан бүхэн заяандаа ирдэг гэж хэлээд урам зориг дүүрэн, ирээдүйдээ айх айдасгүй, адал явдал дүүрэн амьдарч чадах нь миний зорилго гэж боддог.

-Ярилцсанд баярлалаа. Цаашдын уран бүтээлд нь амжилт хүсье.